វៀតណាម ស៊ើបអង្កេតអ្នករៀបចំកម្មវិធីប្រគំតន្ត្រី Balackpink ជុំវិញផែនទីសមុទ្រចិនខាងត្បូង

ប្រទេសវៀតណាមកំពុងបើកការស៊ើបអង្កេតលើគេហទំព័ររបស់អ្នករៀបចំដំណើរទេសចរណ៍របស់ក្រុម Blackpink មុនពេលការប្រគំតន្ត្រីរបស់ក្រុមនេះនឹងមកដល់នាចុងខែកក្កដា នៅរដ្ឋធានីហាណូយ ជុំវិញការបង្ហាញផែនទីនៃសមុទ្រចិនខាងត្បូងដែលជាព្រំដែនជម្លោះ។

ការស៊ើបអង្កេតបានធ្វើឡើង បន្ទាប់ពីវៀតណាមសម្រេចហាមឃាត់ខ្សែភាពយន្ត Barbie មិនឱ្យចាក់បញ្ចាំងនៅក្នុងប្រទេស ក្រោយរងភាពចម្រូងចម្រាសពាក់ព័ន្ធនឹងផែនទីដែនទឹកនៃប្រទេសចិន និងវៀតណាម។

ក្រសួងវប្បធម៌របស់ប្រទេសវៀតណាមបាននិយាយ កាលពីល្ងាចថ្ងៃពុធ ទី៥ ខែកក្កដាថា ខ្លួនបានបញ្ជាឱ្យត្រួតពិនិត្យគេហទំព័រ iME ព្រោះសង្ស័យថា ក្រុមហ៊ុនរៀបចំកម្មវិធីប្រគំតន្ត្រី Blackpink មួយនេះបានផ្សព្វផ្សាយខ្សែបន្ទាត់ រាងអក្សរ U លើផែនទីចិន ដែលបង្ហាញពីការទាមទារតំបន់ដ៏ធំនៃសមុទ្រចិនខាងត្បូង ដែលវៀតណាមចាត់ទុកថាជារបស់ខ្លួន។

ពាក់ព័ន្ធបញ្ហានេះ ទីភ្នាក់ងារផលិតកម្ម YG Entertainment ដែលជាទ្រនំរបស់ Blackpink មិនមានការអត្ថាធិប្បាយឆ្លើយតបនោះទេ។

ដោយឡែក កាលពីល្ងាចថ្ងៃព្រហស្បតិ៍ លោក Brian Chow នាយកប្រតិបត្តិនៃក្រុមហ៊ុន iME បាននិយាយនៅក្នុងសេចក្តីថ្លែងការណ៍មួយថា បញ្ហាខាងលើជាកំហុសឆ្គងដោយអចេតនារបស់ខ្លួន។ ជាមួយគ្នានោះ លោក Brian Chow បានបន្ថែមថា ក្រុមហ៊ុនពិតជាគោរពអធិបតេយ្យភាព និងវប្បធម៌នៃប្រទេសទាំងពីរ ពុំមានបំណងអាក្រក់អ្វីឡើយ ហើយក្រុមហ៊ុននឹងធ្វើការកែតម្រូវឡើងវិញ៕

ប្រែសម្រួល៖ សន្យា

ប្រភព៖ Rueters

ចុចអាន៖ YG ច្រានចោលពាក្យចចាមអារ៉ាមល្អក់កករពីការប្រគំតន្ត្រី Born Pink នៅវៀតណាម

ចុចអាន៖ ក្រុមហ៊ុន Warner Bros ឆ្លើយតបយ៉ាងខ្លីទៅវៀតណាម ពាក់ព័ន្ធផែនទីក្នុងរឿង Barbie