ក្រៅពីហាវ៉ៃ ភ្លើងឆេះព្រៃ ក៏កំពុងវាយប្រហារប្រទេសជាច្រើននៅអឺរ៉ុប ផងដែរ

គិតត្រឹមថ្ងៃព្រហស្បតិ៍ទី១៧ខែសីហា មនុស្សស្លាប់ដោយសារភ្លើងឆេះព្រៃនៅហាវ៉ៃ បានកើនដល់ ១១០ នាក់ហើយ ហើយថែមទាំងបង្កការខូតខាតយ៉ាងធំធេងផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ អគ្គិភ័យមិនមែនកើតឡើងតែនៅអាមេរិកនោះទេ ពោលគឺភ្លើងឆេះព្រៃ ក៏កំពុងឆាបឆេះនៅកន្លែងច្រើនទៀតផងដែរ ។

នៅទ្វីបអឺរ៉ុប ភ្លើងឆេះព្រៃ កំពុងវាយប្រហារនៅក្នុងប្រទេសនានាដូចជាអេស្ប៉ាញ ព័រទុយហ្គាល់ អ៊ីតាលី ក្រិក ក្រូអាត និងកន្លែងផ្សេងទៀត នារយៈពេលប៉ុន្មានថ្ងៃថ្មីៗនេះ។

ទន្ទឹមនោះ នៅកោះ Tenerife នៃប្រទេសអេស្ប៉ាញ ភ្លើងឆេះព្រៃកំពុងឆាបឆេះក្នុងកម្រិតមិនអាចគ្រប់គ្រងបាន ជាហេតុបង្ខំឲ្យមន្ត្រី បិទតំបន់ទេសចរណ៍ដ៏សំខាន់មួយ និងជម្លៀសមនុស្សចេញពីផ្ទះសម្បែង។

ភ្លើងបានឆាបឆេះនៅក្នុងឧទ្យានជាតិភ្នំមួយ លើកោះអេស្ប៉ាញកាលពីថ្ងៃព្រហស្បតិ៍ ហើយបានរាលដាលដល់ផ្ទៃដី ៤,៤៥០ ហិកតា ត្រឹមរយៈពេល ២៤ ម៉ោង ខណៈអាជ្ញាធរ​ក៏បាន​ដាក់​ពង្រាយ​យន្តហោះ​ចំនួន ១៤ គ្រឿង និង​កង​ពន្លត់​អគ្គិភ័យព្រមទាំង​យោធា ២៥០ នាក់ផងដែរ ។

ចំណែកនៅតំបន់ Odemira ភាគខាងត្បូងប្រទេសព័រទុយហ្គាល់ ភ្លើងឆេះព្រៃបានបង្ខំឲ្យមនុស្សជាង ១,៥០០ នាក់ ត្រូវបានជម្លៀសចេញជាបន្ទាន់ ដោយសារអគ្គិភ័យបានរាលដាលទៅដល់គោលដៅទេសចរណ៍ដ៏ពេញនិយម Algarve។

រីឯនៅប្រទេសស៊ីប ភ្លើងឆេះព្រៃបានផ្ទុះឡើងតាំងពីថ្ងៃទី៦ ខែសីហាមក នៅភាគខាងជើងទីក្រុង Limassol ហើយបានរាលដាលយ៉ាងឆាប់រហ័សតាមតំបន់ភ្នំ ជាហេតុជំរុញឲ្យមានការជម្លៀសមនុស្សចេញពីសហគមន៍ចំនួន ៣ យ៉ាងប្រុងប្រយ័ត្ន ។

ស្របពេលជាមួយគ្នានេះ ភ្លើងឆេះទ្រង់ទ្រាយតូច ក៏ត្រូវបានរាយការណ៍ផងដែរនៅប្រទេសបារាំង ដូចជាក្នុងតំបន់ Nouvelle-Aquitaine, Occitanie, Grand Est, Bouches-Du-Rhone និងកោះ Corsica ជាដើម ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ហេតុផលមួយ បណ្តាលឲ្យភ្លើងឆេះព្រៃនៅ ហាវ៉ៃ រាលដាលកាចសាហាវបែបនេះ