អ៊ីស្រាអែល បង្កើនការទម្លាក់គ្រាប់បែកនៅហ្គាហ្សា មុនអនុវត្តបទឈប់បាញ់

ត្បិតមានការឯកភាពចំពោះបទឈប់បាញ់ក៏ដោយ ប៉ុន្តែពេលវេលាអនុវត្តមិនទាន់ត្រូវបានប្រកាសទេ ហើយកងកម្លាំងអ៊ីស្រាអែល កំពុងបង្កើនការវាយប្រហាររបស់ខ្លួននៅទូទាំងជ្រោយហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កសិដ្ឋានមួយនៅតំបន់ Khan Younis ត្រូវរងការទម្លាក់គ្រាប់បែក ហើយការវាយប្រហារមួយ បានធ្វើឡើងលើជំរំជនភៀសខ្លួន Nuseirat ដោយសម្លាប់ប្រជាជនប៉ាឡេស្ទីនរាប់សិបនាក់។

នៅភាគខាងជើង, តំបន់ជុំវិញមន្ទីរពេទ្យឥណ្ឌូណេស៊ី និងមន្ទីរពេទ្យ Kamal Adwan ត្រូវបានកំណត់គោលដៅ ហើយរថយន្តសង្គ្រោះបន្ទាន់ ក៏ត្រូវបានគេរាយការណ៍ថា រងគ្រាប់ផ្លោងដែរ។

ជំរំជនភៀសខ្លួន Jabalia ក៏រងការទម្លាក់គ្រាប់បែកដែរ ខណៈប្រជាជនប៉ាឡេស្ទីនជាង ២០០០នាក់ នៅតែត្រូវបានគេរាយការណ៍ថា កំពុងបាត់ខ្លួននៅក្រោមគំនរអគារបាក់បែក។

មុននេះ គណៈរដ្ឋមន្ត្រី​​អ៊ីស្រាអែល ​បាន​អនុម័តក្នុងសំឡេងភាគច្រើនលើ​កិច្ចព្រមព្រៀង​មួយ ​ដែល​នឹងនាំឲ្យ​មាន​ការ​ដោះលែង​ចំណាប់ខ្មាំង​ខ្លះ​ពី​តំបន់​ហ្គាហ្សា។

គណៈរដ្ឋមន្ត្រី បានបោះឆ្នោតលើផែនការ ដែលនឹងផ្អាកការវាយលុករបស់ខ្លួននៅហ្គាហ្សា រយៈពេលច្រើនថ្ងៃ ជាថ្នូរនឹងការដោះលែងចំណាប់ខ្មាំង ដែលកំពុងស្ថិតនៅក្នុងដៃក្រុមហាម៉ាស។

ទោះបីជាយ៉ាងណាក៏ដោយ មានអ្នក​ជាប់​ឃុំ​តែ​១៥០​នាក់​ប៉ុណ្ណោះ​ ដែលគេ​រំពឹង​ថា ​នឹង​ត្រូវ​ដោះ​លែង​ក្នុងដំណាក់កាលដំបូងនេះ៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ អ៊ីស្រាអែល បញ្ចេញឈ្មោះអ្នកទោសប៉ាឡេស្ទីន៣០០នាក់ ដែលនឹងត្រូវដោះលែង ក្រោមកិច្ចព្រមព្រៀងជាមួយក្រុម ហាម៉ាស