លោក Netanyahu ថា អ៊ីស្រាអែល នឹងឈ្នះ ហាម៉ាស ឆាប់ៗនេះ

នាយករដ្ឋមន្ត្រីអ៊ីស្រាអែល លោក Benjamin Netanyahu បានលើកឡើងថា ឆាប់ៗនេះ កងកម្លាំងទីក្រុងហ្ស៊េរុយសាឡិមខាងលិច នឹងសម្រេចបានជ័យជម្នះទាំងស្រុងក្នុងសង្គ្រាមប្រឆាំងក្រុម ហាម៉ាស នៅពេលពួកគេបើកការវាយលុកជើងគោកតាមផែនការនៅចុងភាគខាងត្បូងតំបន់ហ្គាហ្សាស្ទ្រីប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មជ្ឈដ្ឋានអន្តរជាតិ បានដាក់សម្ពាធយ៉ាងខ្លាំងឲ្យរដ្ឋាភិបាលរបស់លោក Netanyahu លុបចោលប្រតិបត្តិការនៅទីក្រុង Rafah ដោយសារតែជនភៀសខ្លួនប្រហែល១.៤លាននាក់ កំពុងជ្រកកោននៅទីនោះ ក្រោយរត់គេចពីការទម្លាក់គ្រាប់បែករបស់អ៊ីស្រាអែល។

ថ្លែងក្នុងបទសម្ភាសរបស់ CBS News កាលពីថ្ងៃអាទិត្យទី២៥ខែកុម្ភៈ លោក Netanyahu និយាយថា ការវាយលុកនៅ Rafah នឹងត្រូវពន្យារពេលមួយរយៈសិន ប្រសិនបើបទឈប់បាញ់បណ្តោះអាសន្នណាមួយត្រូវបានព្រមព្រៀងជាមួយក្រុមហាម៉ាស ប៉ុន្តែការវាយលុកក៏អាចកើតឡើងមុនឬក្រោយផែនការដែរ។ លោក​អះអាង​ថា “ប្រសិន​បើ​យើង​មិន​មាន​កិច្ច​ព្រម​ព្រៀង​ទេ យើង​នឹង​បើកប្រតិបត្តិការហើយ។ យើងត្រូវតែធ្វើ ពីព្រោះជ័យជម្នះពេញលេញគឺជាគោលដៅរបស់យើង ហើយការទទួលជ័យជម្នះទាំងមូល គឺជិតមកដល់ហើយ មិនមែនប៉ុន្មានខែទៀតទេ ពោលគឺត្រឹមប៉ុន្មានសប្តាហ៍ទៀតប៉ុណ្ណោះ ពេលដែលយើងចាប់ផ្តើមប្រតិបត្តិការ”។

លោកបន្ថែមថា កងទ័ពការពារអ៊ីស្រាអែល (IDF) បានកម្ទេចកងពលហាម៉ាសចំនួន១៨រួចទៅហើយក្នុងចំណោមកងពលទាំង២៤ នៅហ្គាហ្សា ហើយកងពលនៅរស់រានមានជីវិតចំនួន ៤ កំពុងពូនផ្តុំនៅ Rafah ជិតព្រំដែននៃឧបសម្ព័ន្ធជាមួយអេហ្ស៊ីប។

សូមបញ្ជាក់ជាថ្មី សង្គ្រាមបានចាប់ផ្តើមនៅពេលក្រុមយុទ្ធជនហាម៉ាសប៉ាឡេស្ទីន បើកការវាយប្រហារគួរឲ្យភ្ញាក់ផ្អើល នៅភាគខាងត្បូងប្រទេសអ៊ីស្រាអែល កាលពីថ្ងៃទី៧ខែតុលាដោយបានសម្លាប់មនុស្សជាង១១០០នាក់ និងចាប់រាប់រយនាក់ទៀតទៅហ្គាហ្សា ដើម្បីធ្វើជាចំណាប់ខ្មាំង។

ប្រជាជនប៉ាឡេស្ទីនជិត៣០០០០នាក់ហើយ ត្រូវបានសម្លាប់នៅហ្គាហ្សា ចាប់តាំងពីជម្លោះថ្មីផ្ទុះឡើង ប៉ុន្តែអ៊ីស្រាអែល បានច្រានចោលការចោទប្រកាន់នៃអំពើប្រល័យពូជសាសន៍ ដោយលើកហេតុផលថា ក្រុមហាម៉ាសបានប្រើជនស៊ីវិលធ្វើជាខែលមនុស្ស ហើយត្រូវតែទទួលខុសត្រូវចំពោះការស្លាប់មនុស្សនៅហ្គាហ្សា។

លើសពីនេះ លោក Netanyahu អះអាងថា ជម្លោះអាចបញ្ចប់បានលុះត្រាតែអ៊ីស្រាអែលសម្រេចបាននូវគោលដៅសំខាន់ៗចំនួនបីរបស់ខ្លួន គឺការកម្ចាត់ក្រុមហាម៉ាស ដោះលែងចំណាប់ខ្មាំង និងធានាថា តំបន់ហ្គាហ្សានឹងមិនបង្កការគំរាមកំហែងដល់ក្រុងហ្ស៊េរុយសាឡិមខាងលិចទៀតទេ៕

អត្ថបទ៖ សុខ សុវណ្ណ

ចុចអាន៖ ទ័ពអាកាសអាមេរិក ​ដុត​ខ្លួនឯង​នៅ​ខាងក្រៅ​ស្ថានទូត​អ៊ីស្រាអែល ​ក្នុង​ទីក្រុង​វ៉ាស៊ីនតោន​