សេកិច្ចសិង្ហបុរីរំពឹងថានឹងកើនចំណូលប្រហែល ៥០០លានដុល្លារ ដោយសារវត្តមានតារាចម្រៀង Taylor Swift

ប្រទេសសិង្ហបុរីត្រូវបានគេរំពឹងថា នឹងរកចំណូលបានរាប់រយលានដុល្លារដោយសារការកើនឡើងនៃចំនួនភ្ញៀវទេសចរ ប្រាក់ចំណាយលើសំបុត្រយន្តហោះ សណ្ឋាគារ និងសំបុត្រទស្សនាការប្រគុំតន្ត្រី The Eras Tour របស់តារាចម្រៀង Taylor Swift ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត The Straits Times បានរាយការណ៍នៅថ្ងៃទី០៤ នេះថា លោក Edwin Tong រដ្ឋមន្ត្រីក្រសួងវប្បធម៌ សហគមន៍ និងយុវជនរបស់ប្រទេសសិង្ហបុរី បាននិយាយនៅចំពោះមុខសភាថា សេដ្ឋកិច្ចសិង្ហបុរី នឹងទទួលបានអត្ថប្រយោជន៍យ៉ាងច្រើនពីការប្រគំតន្ត្រី The Eras Tour រយៈពេល ៦យប់របស់ Taylor Swift ។

លោក Edwin Tong បានមានប្រសាសន៍យ៉ាងដូច្នេះថាអត្ថប្រយោជន៍បានមកពីការប្រគុំតន្ត្រីខាងលើមានដូចជា ការកើនឡើងចំនួនភ្ញៀវទេសចរណ៍ ថ្លៃសំបុត្រយន្តហោះ សណ្ឋាគារ ក៏ដូចជាការចំណាយសម្រាប់ការកម្សាន្ត ការទទួលទានអាហារ និងសកម្មភាពទិញទំនិញនៅក្នុងប្រទេសសិង្ហបុរី។ល។

ជាមួយគ្នានេះដែរលោក Edwin Tong បានបកស្រាយចំពោះការលើកឡើងថា “សិង្ហបុរី ចំណាយលុយច្រើនលើសលប់ ដើម្បីគាំទ្រទៅលើព្រឹត្តិការណ៍ប្រគំតន្ត្រី The Eras Tour” ដោយការលើកឡើងនេះ លោកថា ពុំមែនជាការពិតឡើង សិង្ហបុរី មិនបានចំណាយលុយច្រើននោះទេ ។

ជាមួយគ្នានេះដែរ កាលពីខែមុន កាសែត The Straits Times បានរាយការណ៍ថា អ្នកសេដ្ឋកិច្ចបានប៉ាន់ប្រមាណថា ប្រាក់ចំណូលទេសចរណ៍របស់សិង្ហបុរីនឹងកើនឡើងប្រហែល ៥០០ លានដុល្លារ ដោយសារឥទ្ធិពលនៃតន្ត្រីទេសចរណ៍ The Eras Tour។ ទោះជាយ៉ាងណាចំនួនពិតប្រាកដត្រូវរង់ចាំរហូតដល់ក្រោយការប្រគុំតន្ត្រីចប់នៅថ្ងៃទី៩ ខែមីនា។

សូមជម្រាបថា The Eras Tour គឺជាតន្ត្រីទេសចរណ៍ មកកាន់ទឹកដីអាស៊ីអាគ្នេយ៍លើកដំបូងរបស់ Taylor Swift ដែលប្រព្រឹត្តទៅរយៈពេល ៦យប់ ចាប់ពីថ្ងៃទី ២-៣-៤ ខែមីនា និងថ្ងៃទី ៧-៨-៩ ខែខែមីនាគេឃើញមានវត្តមានសិល្បករអន្តរជាតិជាច្រើនដូចជា Lisa (BlackPink) និង Minho សមាជិកក្រុម SHINee ក៏បានបង្ហាញខ្លួននៅក្នុងកម្មវិធីតន្ត្រីផងដែរ ៕

ប្រែសម្រួលដោយ÷ ប៉ោ កុសល