ស្អែកនេះ លោក ថាក់ស៊ីន គ្រោងនឹងអញ្ជើញទៅស្នាក់ការបក្សភឿថៃ

អតីតនាយករដ្ឋមន្ត្រីដ៏មានឥទ្ធិពលរបស់ប្រទេសថៃលោក ថាក់ស៊ីន ស៊ីណាវ៉ាត្រា គ្រោងនឹងអញ្ជើញទៅទីស្នាក់ការកណ្ដាលគណបក្សភឿថៃនាវេលាម៉ោង ១ និង ៤៥ នាទីថ្ងៃត្រង់ថ្ងៃទី២៦ ខែមីនានេះ ដើម្បីជួបជាមួយសមាជិកតំណាងរាស្ត្ររបស់បក្ស ។ នេះបើយោងតាមការចេញផ្សាយដោយសារព័ត៌មាន Thai PBS កាលពីថ្ងៃទី២៤ ខែមីនាកន្លងទៅ ។

ប្រភពដដែលបញ្ជាក់ទៀតថា ការអញ្ជើញទៅទីស្នាក់ការបក្សភឿថៃរបស់លោក ថាក់ស៊ីន នឹងមិនជាប់ពាក់ព័ន្ធរឿងប្រជុំផ្ទៃក្នុងរបស់បក្សនោះឡើយ ពោលនេះគ្រាន់តែជាការសម្រួលដល់សមាជិកតំណាងរាស្ត្រដែលចង់សួរសុខទុក្ខទៅដល់ភូមិគ្រឹះរបស់លោកផ្ទាល់ ប៉ុន្តែទោះជាយ៉ាងណា មិនមែនគ្រប់សមាជិកតំណាងរាស្ត្រទាំងអស់សុទ្ធសឹងតែបានជួបលោកក្នុងពេលនោះទេ ។

ស្របពេលជាមួយគ្នានេះ ដំណើរ​របស់​លោក ថាក់ស៊ីន ទៅ​កាន់​ទីស្នាក់ការ​គណបក្ស​ភឿថៃក៏កំពុងទាញឲ្យសមាជិកតំណាងរាស្ត្រមួយចំនួនមានក្ដីរំភើបសប្បាយរីករាយផងដែរ ព្រោះនេះគឺជា “ឱកាស​ដ៏ពិសេស” មួយ ហើយវាក៏មិនមែនជារឿងចម្លែកនោះដែរ ដោយសារតែអតីតនាយករដ្ឋមន្ត្រីវ័យ ៧៤ ឆ្នាំរូបនេះជាអ្នកបង្កើតគណបក្សថៃស្រឡាញ់ថៃ គណបក្សកម្លាំងប្រជាជន និងគណបក្សភឿថៃនេះឯង ។

ទន្ទឹមនោះ ក្រោយដោះលែងឲ្យមានសេរីភាព លោក ថាក់ស៊ីន បានបង្ហាញខ្លួនជាសាធារណៈជាបន្តបន្ទាប់ ជាពិសេសលោកបានចំណាយពេល ៣ ថ្ងៃហោះទៅលេងស្រុកកំណើតក្នុងខេត្តឈៀងម៉ៃដើម្បីគោរពវិញ្ញាណក្ខន្ធឪពុកម្ដាយរបស់លោក ទៅមើលគម្រោងក្នុងស្រុកមួយចំនួន និងជួបជាមួយមិត្តភក្តិចាស់ៗ បន្ទាប់ពីចាកចេញឆ្ងាយអស់រយៈពេល ១៧ ឆ្នាំ ។

ទោះយ៉ាងណា ក្រុមអ្នកវិភាគបែរជាមើលឃើញជ្រុងផ្សេងទៅវិញ ដោយចាត់ទុកការធ្វើដំណើររបស់លោក ថាក់ស៊ីន ទៅកាន់ស្រុកកំណើតក្នុងខេត្តឈៀងម៉ៃ គឺជាការដាក់មុខព្រួញស្ដារប្រជាប្រិយភាពឲ្យគណបក្សភឿថៃឲ្យកាន់តែមានមុខមាត់សាជាថ្មីម្ដងទៀត ក្រោយខេត្តមួយនេះចាញ់សំឡេងឆ្នោតយ៉ាងច្រើនក្រាស់ក្រែលទៅលើបក្សចលនាឆ្ពោះទៅមុខ ក្នុងការបោះឆ្នោតសកលកាលពីខែឧសភាកន្លងទៅ ។

គួរបញ្ជាក់ថា លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្តីថៃ ត្រូវបានដោះលែងឲ្យមានសេរីភាពឡើងវិញកាលពីថ្ងៃទី១៨ ខែកុម្ភៈ បន្ទាប់ពីអនុវត្តទោសទណ្ឌបានរយៈពេល ៦ ខែ ដោយសារតែស្ថានភាពរបស់លោកស៊ីទៅនឹងលក្ខខណ្ឌនៃការលើកលែងទោសដូចជា លោកស្ថិតក្នុងចំណោមទណ្ឌិត ៩៣០ ដែលចាត់ទុកជាមនុស្សចាស់ និងមានជំងឺ ឬមានអាយុលើស ៧០ ឆ្នាំ បូករួមទាំងស្នាដៃបម្រើប្រទេសជាតិនៅពេលកន្លងមកផងដែរ ៕

ដោយ ៖ សុខ ជីវ័ន្ត

ចុចអាន ៖ សីតុណ្ហភាពថ្ងៃត្រង់នៅ ថៃ ឡើងដល់ ៤០ អង្សាសេ តែពេលល្ងាចបែរជា​អាចមានផ្គររន្ទះ