ផ្ទុះភ្នំភ្លើងនៅឥណ្ឌូណេស៊ី ជម្លៀសមនុស្សជិត ១ ០០០នាក់ 

ទីភ្នាក់ងារភ្នំភ្លើងរបស់ប្រទេសឥណ្ឌូណេស៊ី បានប្រកាសនៅថ្ងៃពុធទី១៧ខែមេសាថា មនុស្សជិត ១ ០០០នាក់ ក្នុងខេត្ត Sulawesi ខាងជើង ត្រូវបានជម្លៀស បន្ទាប់ពីភ្នំភ្លើង Ruang ផ្ទុះជះកម្អែនិងផេះ ជាច្រើនលើកច្រើនសាចាប់តាំងពីថ្ងៃអង្គារមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Heruningtyas Desi Purnamasari មន្ត្រីនៅមជ្ឈមណ្ឌលគ្រោះមហន្តរាយភ្នំភ្លើង និងភូគព្ភសាស្ត្រ (PVMBG) របស់ឥណ្ឌូណេស៊ី បានប្រាប់រ៉យទ័រថា អាជ្ញាធរបានបង្កើនកម្រិតប្រ​កាសអាសន្ន ដល់ចំណុចខ្ពស់លំដាប់ទីពីរ ដោយសារតែភ្នំភ្លើងមិនថមថយសកម្មភាពទាល់តែសោះ។

លោកស្រីលើកឡើងថា ភ្នំភ្លើងផ្ទុះដោយសារ ការរញ្ជួយដីនាពេលថ្មីៗនៅលើកោះ Ruang ដោយវាបានបាញ់ផេះឡើងលើមេឃដល់ទៅ១.៨គីឡូម៉ែត្រឯណោះ ហើយអាជ្ញាធរ បានបិទសកម្មភាពទាំងស្រុងនៅរង្វង់ចម្ងាយ៤គីឡូម៉ែត្រពីភ្នំភ្លើង ព្រោះថា វាអាចផ្ទុះខ្លាំងជាងនេះ។

កោះ Ruang មានប្រជាជនចំនួន៨៣៨នាក់ ហើយឥឡូវពួកគេត្រូវជម្លៀសទៅកាន់កោះ Tagulandang ដែលស្ថិតនៅជិតនោះបំផុត ដើម្បីសុវត្ថិភាព។

សូមបញ្ជាក់ ប្រទេសឥណ្ឌូណេស៊ី មានទីតាំងស្ថិតនៅលើខ្សែក្រវាត់ភ្នំភ្លើងឬគេស្គាល់ថា “Pacific Ring of Fire” ដែលជាតំបន់ មានសកម្មភាពរញ្ជួយដីញឹកញាប់បំផុត៕

អត្ថបទ៖ សុខ សុវណ្ណ

ចុចអាន៖ ផ្ទុះភ្នំភ្លើងឥណ្ឌូណេស៊ី ស្លាប់អ្នកឡើងភ្នំ ១១នាក់