ប្តីត្រូវបង់លុយជាង៧ពាន់ដុល្លារ ឲ្យប្រពន្ធសម្រាប់ការងារដែលនាងធ្វើក្រោយរៀបការ

នៅក្នុងសាលក្រមលើកដំបូងនៃករណីមិនធ្លាប់មាននៅក្នុងប្រទេសចិន តុលាការផ្នែកលែងលះ បានចេញបញ្ជាឲ្យបុរសម្នាក់បង់ប្រាក់ដល់អតីតប្រពន្ធរបស់គាត់ចំនួន ៥០,០០០យ័ន (៧,៧០០ ដុល្លារ) សម្រាប់កិច្ចការផ្ទះដែលនាងបានធ្វើ ក្នុងអំឡុងពេលរៀបការរយៈពេល៥ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់កាសែត South China Morning Post បានឲ្យដឹងថា Wang បានជួបប្តីរបស់នាងឈ្មោះ Chen កាលពីឆ្នាំ២០១០ ហើយអ្នកទាំងពីរបានរៀបការជាមួយគ្នានៅឆ្នាំ២០១៥។

ក្នុងឆ្នាំ២០១៨ ពួកគេបានចាប់ផ្តើមរស់នៅបែកគ្នា ដោយកូនប្រុសរបស់ពួកគេរស់នៅជាមួយ Wang។ កាលពីឆ្នាំមុន លោក Chen បានដាក់ពាក្យប្តឹងលែងលះគ្នានៅឯតុលាការមួយក្នុងទីក្រុងប៉េកាំង។

Wang បានចោទប្រកាន់ Chen ថាមានទំនាក់ទំនងស្នេហាជាមួយស្រីផ្សេង ហើយបានយល់ព្រមលែងលះនិងស្នើសុំចែកទ្រព្យសម្បត្តិ ព្រមទាំងសំណងផ្នែកហិរញ្ញវត្ថុ។ នាងនិយាយថា Chen មិនបានជួយបំពេញភារកិច្ចក្នុងផ្ទះនិងមើលថែកូនទេ។

តុលាការបានអនុញ្ញាតឲ្យលែងលះនិងផ្តល់សិទ្ធិដល់ Wang មើលថែកូន ។ លោក Chen ត្រូវបានបញ្ជាឲ្យបង់ប្រាក់ក្រោយលែងលះចំនួន២,០០០យ័ន (៣០៩ដុល្លារ) ក្នុងមួយខែ និងសំណងសម្រាប់ការងារផ្ទះដែលប្រពន្ធបានធ្វើកន្លងមក។

សាលក្រមនេះបានបង្កឲ្យមានការជជែកវែកញែកយ៉ាងក្តៅគគុក លើប្រព័ន្ធផ្សព្វផ្សាយសង្គមចិន ដោយអ្នកខ្លះនិយាយថា សំណងគឺទាបពេកប៉ុន្តែអ្នកខ្លះទៀតលើកហេតុផលថា ការងារមិនគួរប្រៀបធៀបទៅនឹងការងារផ្ទះឡើយ។

ទោះបីជាយ៉ាងណាក៏ដោយ លោក Zhong Wen មេធាវីការលែងលះ បាននិយាយថា សេចក្តីសម្រេចរបស់តុលាការគឺផ្អែកលើច្បាប់អាពាហ៍ពិពាហ៍ថ្មីរបស់ប្រទេសចិន ដែលបានចូលជាធរមានកាលពីថ្ងៃទី១ខែមករា៕

ប្រែសម្រួលដោយ៖ Vann Vann

ប្រភព៖ BBC