ប៉ូឡូញ ថា ទ័ពណាតូ កំពុងធ្វើប្រតិបត្តិការនៅ អ៊ុយក្រែន 

“ទាហានណាតូកំពុងធ្វើប្រតិបត្តិការជួយអ៊ុយក្រែនរួចទៅហើយ ប៉ុន្តែប្លុកដឹកនាំដោយសហរដ្ឋអាមេរិកមួយនេះ មិនចង់ចូលរួមដោយផ្ទាល់ នៅក្នុងជម្លោះជាមួយរុស្ស៊ីទេ”។ នេះគឺជាចម្លើយរបស់នាយករដ្ឋមន្ត្រីប៉ូឡូញ លោក Donald Tusk តបទៅសំណួររបស់ក្មេងស្រីជាអ្នកសារព័ត៌មានម្នាក់ឈ្មោះ Sara Malecka-Trzaskos ដែលចោទសួរថា ហេតុអ្វីបានជាអង្គការសហប្រជាជាតិនិងណាតូ មិនទាន់ចូលធ្វើអន្តរាគមន៍នៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, ពេលជួបជាមួយអ្នកសារព័ត៌មាននៅរដ្ឋសភាប៉ូឡូញ កាលពីថ្ងៃព្រហស្បតិ៍ទី៩ខែឧសភា លោក Tusk អះអាងថា “សព្វថ្ងៃនេះ ណាតូកំពុងជួយឲ្យបានច្រើនតាមដែលអាចធ្វើទៅបាន។ ច្បាស់ណាស់ បើគ្មានជំនួយពីណាតូទេ អ៊ុយក្រែន នឹងមិនអាចការពារខ្លួនបានយូរឡើយ។ មែនហើយ មានទាហានខ្លះនៅទីនោះមែន តែខ្ញុំចង់សំដៅទៅលើទាហានធ្វើជាអ្នកសង្កេតការណ៍ និងកងវិស្វករ ដែល​កំពុង​ជួយអ៊ុយក្រែន ប៉ុណ្ណោះ”។

ទោះបីជាយ៉ាងណាក៏ដោយ នៅព្រឹកថ្ងៃដដែលនោះ អគ្គលេខាធិការអង្គការណាតូ លោក Jens Stoltenberg បានចេញមុខប្រកែកថា ប្លុកនេះ នឹងមិនដាក់ពង្រាយកម្លាំងទៅអ៊ុយក្រែនឡើយ ព្រោះទីក្រុងកៀវ មិនព្រមស្នើសុំ។

លោក Stoltenberg ប្រាប់អ្នកយកព័ត៌មានពេលកំពុងធ្វើដំណើរទៅកាន់ប្រទេសអ៊ីតាលីថា ​“ណាតូ ​គ្មាន​ចេតនា​ដាក់​ពង្រាយ​កម្លាំង​ទៅ​អ៊ុយក្រែន​ទេ ព្រោះពេលខ្ញុំទៅអ៊ុយក្រែន កាលពីសប្តាហ៍មុន ពួកគេមិនបានស្នើសុំកងទ័ពណាតូឡើយ អ្វីដែលពួកគេស្នើសុំគឺជំនួយបន្ថែម”។

រឿងដែលគេចាំមិនភ្លេច ជុំវិញការបញ្ជូនទ័ពណាតូទៅអ៊ុយក្រែននេះ គឺការលើកឡើងរបស់ប្រធានាធិបតីបារាំង Emmanuel Macron ដែលតែងបំផុសគំនិតថា​ គួរបញ្ជូនទ័ពណាតូទៅអ៊ុយក្រែន ដើម្បីរារាំងរុស្ស៊ី កុំឲ្យយកឈ្នះនៅលើសមរភូមិបាន។

កាលពីដើមសប្តាហ៍នេះដែរ នាយករដ្ឋមន្ត្រីលីទុយអានី លោកស្រី Ingrida Simonyte បានប្រកាសក្តែងៗថា ប្រទេសរបស់លោកស្រីត្រៀមខ្លួនរួចជាស្រេច ក្នុងការដាក់ពង្រាយទ័ពទៅអ៊ុយក្រែន ហើយប្រសិនបើទីក្រុងកៀវហាមាត់សុំភ្លាម ទ័ពនឹងបញ្ជូនទៅភ្លែតតែម្តង ប៉ុន្តែកងទ័ពនឹងត្រូវបញ្ជូនទៅដើម្បីតែចូលរួមក្នុងប្រតិបត្តិការបណ្តុះបណ្តាលកងកម្លាំងអ៊ុយក្រែនប៉ុណ្ណោះ ហើយសភាក៏អនុញ្ញាតដែរ។

ស្របពេលជាមួយគ្នានោះ នាយករដ្ឋមន្ត្រីរូបនេះ អះអាងថា លោកស្រីមិនខ្វល់ចំពោះប្រតិកម្មរុស្ស៊ីយ៉ាងណានោះទេ ពាក់ព័ន្ធការបញ្ជូនទ័ពទៅអ៊ុយក្រែន ហើយនៅតែទទូចថា រដ្ឋាភិបាលទីក្រុង វីលនីញ៉ូស ចង់ជួយទីក្រុងកៀវពង្រឹងកងកម្លាំងប្រដាប់អាវុធរបស់ខ្លួន ឲ្យខ្លាំងដូចមុនម្តងទៀត។ 

យ៉ាងណាក្តី រុស្ស៊ី​ក៏​ព្រមានរួចហើយដែរទៅ​អាមេរិកនិង​សម្ព័ន្ធមិត្តរបស់ខ្លួនថា ពួកគេកំពុងលេង​ជាមួយភ្លើងជុំវិញ​ការបញ្ជូនទ័ព ផ្តល់សព្វាវុធ គ្រាប់រំសេវ និងសាច់​ប្រាក់​ដល់​អ៊ុយក្រែន។

សូមបញ្ជាក់ជាថ្មី​ បស្ចិមប្រទេស ​បាន​ផ្តល់ជំនួយយោធាដល់ទី​ក្រុង​កៀវ អស់លុយ​ជាង ២០០​ពាន់​លាន​ដុល្លារហើយ ប៉ុន្តែនៅតែទទូចថា ការផ្តល់ជំនួយបែបនេះ​ មិន​ធ្វើ​ឲ្យ​ពួកគេ​ចូលរួម​ក្នុង​ជម្លោះ​នោះ​ទេ៕

អត្ថបទ៖ សុខ សុវណ្ណ

ចុចអាន៖ សមាជិកណាតូមួយប្រទេស ប្រកាសត្រៀមរួចរាល់ បញ្ជូនទ័ពទៅ អ៊ុយក្រែន