ព័ត៌មានអន្ដរជាតិ

អ៊ីស្រាអែល ពិភាក្សាជាមួយអាមេរិក ត្រៀមវាយកម្ទេចអណ្តូងប្រេងអ៊ីរ៉ង់

បានផុស

២ years មុន

នៅ

ថ្ងៃសុក្រ ៤ តុលា ២០២៤

ដោយ

ឆ្លើយតបសំណួរអ្នកកាសែតនៅពេលចាកចេញពីសេតវិមាន ប្រធានាធិបតិអាមេរិកលោក ចូ បៃដិន ប្រាប់ឲ្យដឹងថា ទីក្រុងវ៉ាស៊ីនតោន កំពុងពិភាក្សាជាមួយទីក្រុងហ្ស៊េរុយសាឡិម អំពីលទ្ធភាពបើកដៃឲ្យអ៊ីស្រាអែល វាយប្រហារកម្ទេចអណ្តូងប្រេងរបស់អ៊ីរ៉ង់។ នេះបើតាមការចុះផ្សាយរបស់ BBC នៅថ្ងៃសុក្រទី៤ខែតុលាឆ្នាំ២០២៤។

ប្រធានាធិបតិអាមេរិកលោក ចូ បៃដិន (រូបថត៖ Rex Features)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ លោក បៃដិន ធ្លាប់លើកឡើងជាច្រើនលើកច្រើនសាមកហើយថា លោកនឹងមិនគាំទ្រការវាយប្រហាររបស់អ៊ីស្រាអែលលើទីតាំងនុយក្លេអ៊ែរអ៊ីរ៉ង់ដាច់ខាត។

ចំណែកអតីតនាយករដ្ឋមន្ត្រីអ៊ីស្រាអែលលោក Naftali Bennett ឯណោះវិញ បានអះអាងដា ការវាយប្រហាររោងចក្រនុយក្លេអ៊ែររបស់អ៊ីរ៉ង់ គឺជារឿងសំខាន់ដែលអាចជួយផ្លាស់ប្តូរមុខមាត់តំបន់មជ្ឈិមបូព៌ា និងកម្ទេចរបបភេរវករនេះបាន។

ស្របពេលជាមួយគ្នានោះ មានផែនការលេចធ្លាយថា អ៊ីស្រាអែលរៀបគម្រោងវាយប្រហារអណ្តូងប្រេងរបស់អ៊ីរ៉ង់ជាមុនសិន ហើយបើអ៊ីរ៉ង់វាយបកវិញ អ៊ីស្រាអែលនឹងកំណត់គោលដៅលើរោងចក្រនុយក្លេអ៊ែររបស់ពួកគេតែម្តង។

សូមបញ្ជាក់ថា គ្រាន់តែលោកបៃដិន លើកឡើងបែបនេះភ្លាម ស្រាប់តែតម្លៃប្រេងឆៅម៉ាក Brent បានឡើងថ្លៃដល់ទៅ ៥% ភ្លាមៗ ហើយបើគិតចាប់តាំងពីអ៊ីរ៉ង់បាញ់មីស៊ីលរាប់រយគ្រាប់លើអ៊ីស្រាអែលកាលពីថ្ងៃអង្គារទី១ខែតុលាមក តម្លៃប្រេងឆៅរបស់ម៉ាកនេះ បានឡើងថ្លៃដល់១០%ទៅហើយ៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល ប្រកាសក្តែងៗថា ខ្លួនវាយប្រហារកន្លែងណាក៏បានដែរ នៅមជ្ឈិមបូព៌ា