លោក ត្រាំ គំរាមជាថ្មី ថានឹងដកអាមេរិក ចេញពីអង្គការ ណាតូ

ជាថ្មីម្តងទៀត លោក ដូណាល់ ត្រាំ បានគំរាមដកសហរដ្ឋអាមេរិក ចេញពីអង្គការណាតូ បើសម្ព័ន្ធមិត្តទាំងឡាយ មិនអាចបោះកញ្ចប់ថវិកាឲ្យគ្រប់គោលដៅចំណាយរបស់ប្លុកមួយនេះបានទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីចូលកាន់តំណែងអាណត្តិទី១ លោក ត្រាំ ក៏ព្រមានដកខ្លួនចេញពីណាតូដែរ ដោយរិះគន់ប្រទេសជាសមាជិកថា មិនបានចំណាយឲ្យគ្រប់គោលដៅ ២% នៃ GDP របស់ពួកគេ។

ឆ្លើយតបនឹងសំណួរថាតើ អាមេរិក អាចបន្តឈរជើងនៅជាមួយអង្គការណាតូទៀតដែរឬក៏អត់, ប្រធានាធិបតីជាប់ឆ្នោតអាមេរិករូបនេះប្រកាសក្នុងបទសម្ភាសន៍កាលពីថ្ងៃអាទិត្យទី៨ខែធ្នូឆ្នាំ២០២៤ ជាមួយសារព័ត៌មាន NBC News ថា «បើពួកគេបង់ប្រាក់ ហើយខ្ញុំមើលឃើញថា ពួកគេធ្វើដាក់យើងដោយយុត្តិធម៌នោះ ចម្លើយគឺខ្ញុំនឹងបន្តនៅជាមួយណាតូ ប៉ុន្តែបើមិនអ៊ីចឹងទេ ខ្ញុំនឹងដកខ្លួនចេញ»។

លោក ត្រាំ បានត្អូញត្អែរជាយូរមកហើយថា រដ្ឋាភិបាលអឺរ៉ុបនិងកាណាដានៅក្នុងប្លុកការពារទៅវិញទៅមកនេះ កំពុងដាក់បន្ទុកខ្លាំងពេកលើការចំណាយយោធារបស់សហរដ្ឋអាមេរិក។ ដូច្នេះគាត់មិនពេញចិត្តឡើយ គាត់ចង់ឲ្យសមាជិកទាំងឡាយ ត្រូវធ្វើរឿងឲ្យស្មើភាព។

រម្លឹកទៅកាលពីដើមឆ្នាំ២០២៤ ពេលនោះ លោក ត្រាំ ប្រកាសថា គាត់នឹងមិនការពារប្រទេសណាតូណាមួយឡើយ ហើយលើកទឹកចិត្តរុស្ស៊ីឲ្យវាយប្រហារថែមទៀតផង លើសមាជិកណា ដែលមិនបំពេញតាមគោលដៅចំណាយ។

ងាកទៅឆ្នាំ២០១៤ សមាជិកសម្ព័ន្ធភាពមួយនេះ បានប្តេជ្ញាចំណាយយ៉ាងហោចណាស់ ២% នៃ GDP របស់ពួកគេជារៀងរាល់ឆ្នាំ លើវិស័យការពារជាតិ ប៉ុន្តែកាលពីឆ្នាំមុន សមាជិកភាគច្រើនមិនអាចបំពេញតាមគោលដៅបានឡើយ។

ក្នុងចំណោមនោះ មានប្រទេសធំ២ ដែលមិនអាចបំពេញតាមគោលការណ៍បាន នោះគឺជាបារាំង និងអាល្លឺម៉ង់ ដែលសុទ្ធជាប្រទេសមហាអំណាចសេដ្ឋកិច្ចរបស់សហភាពអឺរ៉ុប និងជាសមាជិកស្ថាបនិកនៃសម្ព័ន្ធភាពនេះទៀតផង៕

អត្ថបទ៖ សុខ សុវណ្ណ

ចុចអាន៖ មេ​ណាតូ៖ កូរ៉េ​ខាង​ជើងបញ្ជូន​ទ័ព​ច្បាំង​នៅ​អ៊ុយក្រែន ដើម្បី​ឲ្យ​រុស្ស៊ី​គាំទ្រ​កម្មវិធី​នុយក្លេអ៊ែរ