រដ្ឋមន្ត្រីការពារជាតិកូរ៉េខាងត្បូង ត្រូវចាប់ខ្លួនជាផ្លូវការ ស្របពេលសង្ស័យថា គាត់បំផ្លាញព័ស្តុតាង

នៅថ្ងៃពុធទី១១ខែធ្នូឆ្នាំ២០២៤ អតីតរដ្ឋមន្ត្រីការពារជាតិកូរ៉េខាងត្បូង Kim Yong-hyun ត្រូវបានចាប់ខ្លួនជាផ្លូវការហើយពីបទបំបះបំបោរ ស្របពេលមានការសង្ស័យថា គាត់បានបំផ្លាញព័ស្តុតាង ក្នុងករណីការប្រកាសច្បាប់អាជ្ញាសឹករបស់លោកប្រធានាធិបតី Yoon Suk Yeol ដែលធ្វើឲ្យប្រទេសធ្លាក់ចូលទៅក្នុងភាពវឹកវរ។ នេះបើតាមការចុះផ្សាយរបស់ AFP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយ លោក Kim ត្រឹមត្រូវបានគេឃាត់ខ្លួនជាបណ្តោះអាសន្នប៉ុណ្ណោះតាមសេចក្តីសម្រេចរបស់តុលាការ ប៉ុន្តែពេលនេះលោកត្រូវបានចាប់ខ្លួនជាផ្លូវការតែម្តងជុំវិញការចោទប្រកាន់ពីបទមានតួនាទីក្នុងអំឡុងពេលបះបោរ និងប្រើអំណាច ដើម្បីរារាំងការអនុវត្តសិទ្ធិ។

ការចាប់ខ្លួនជាផ្លូវការនេះកើតឡើង ចំពេលមានក្តីបារម្ភថា ប្រហែលជាមានការបំផ្លាញព័ស្តុតាង ដែលនឹងលាតត្រដាងថា លោកគីម ពិតជាបានប្រព្រឹត្តអំពើឧក្រិដ្ឋកម្មមែន អាចឲ្យរដ្ឋអាជ្ញាបើកការស៊ើបអង្កេតបាន។

ការចាប់ខ្លួននេះទៀតសោត កើតឡើងបន្ទាប់ពីរដ្ឋសភាកូរ៉េខាងត្បូង អនុម័តតែងតាំងរដ្ឋអាជ្ញាពិសេស ដើម្បីចាប់ផ្តើមការស៊ើបអង្កេតលើលោកប្រធានាធិបតី Yoon និងឈានដល់ការចាប់ខ្លួនពីបទក្បត់ជាតិ ជុំវិញការប្រកាសច្បាប់អាជ្ញាសឹកយ៉ាងតក់ក្រហល់បំផុតកាលពីសប្តាហ៍មុន។

ក្រៅ​ពី​លោក Yoon, រដ្ឋអាជ្ញា​ពិសេស​ ក៏នឹងបើកការស៊ើបអង្កេតលើអតីត​រដ្ឋមន្ត្រី​ការពារ​ជាតិ Kim Yong-hyun, នាយសេនាធិការកងទ័ព Park An-su ដែលត្រូវបានតែងតាំងជាមេបញ្ជាការច្បាប់អាជ្ញាសឹក, នាយករដ្ឋមន្ត្រី Han Duck-soo, មេបញ្ជាការប្រឆាំងចារកម្ម Yeo In-hyung និង​តំណាង​រាស្រ្តគណបក្ស​អំណាច​ប្រជាជន​លោក Choo Kyung-ho ដែល​ទើប​ចុះ​ចេញ​ពី​តំណែង​ជា​ប្រធាន​ជាន់​ខ្ពស់​នៃ​គណបក្ស​កាន់​អំណាចផងដែរ។

អ្នកទាំងអស់ សុទ្ធតែ​ត្រូវរងការចោទ​ប្រកាន់​ថា ​ជំរុញឲ្យមាន​ការ​បះបោរ​ដោយ​ផ្ទាល់​ឬ​ចូលដៃចូលជើង​ឃុបឃិត​គ្នា​ក្នុង​អំពើ​បះបោរកាលពីរាត្រីថ្ងៃអង្គារទី៣ខែធ្នូ៕

អត្ថបទ៖ សុខ សុវណ្ណ

ចុចអាន៖ សភាកូរ៉េខាងត្បូង អនុម័តសេចក្តីព្រាងច្បាប់ តែងតាំងរដ្ឋអាជ្ញាពិសេស ស៊ើបអង្កេតលើលោក Yoon