ព័ត៌មានអន្ដរជាតិ

រុស្ស៊ី កំពុងប្រើប្រាស់លុយគ្រីបតូ ដើម្បីគេចពីទណ្ឌកម្មលោកខាងលិច

បានផុស

២ years មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

Chheang

នៅក្រោមច្បាប់ថ្មី ក្រុមហ៊ុនរុស្ស៊ីបានចាប់ផ្តើមប្រើប្រាស់ Bitcoin និងរូបិយប័ណ្ណឌីជីថលផ្សេងទៀតនៅក្នុងការទូទាត់អន្តរជាតិ ដើម្បីប្រឆាំងនឹងការដាក់ទណ្ឌកម្មរបស់លោកខាងលិច។ នេះជាការលើកឡើងរបស់រដ្ឋមន្ត្រីក្រសួងហិរញ្ញវត្ថុរុស្ស៊ី លោក Anton Siluanov កាលពីថ្ងៃពុធទី២៥ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Siluanov បានប្រាប់ប៉ុស្តិ៍ទូរទស្សន៍ Russia 24 ថា៖ «ជាផ្នែកមួយនៃការដកពិសោធន៍ វាគឺអាចធ្វើទៅបានដើម្បីប្រើ Bitcoin ដែលយើងបានរុករកបាននៅទីនេះនៅក្នុងប្រទេសរុស្ស៊ី (នៅក្នុងប្រតិបត្តិការពាណិជ្ជកម្មបរទេស)»។

លោក បន្តថា៖ «ប្រតិបត្តិការបែបនេះកំពុងកើតឡើងរួចហើយ។ យើងជឿថា ពួកវាគួរតែត្រូវបានពង្រីក និងអភិវឌ្ឍបន្ថែមទៀត។ ខ្ញុំមានទំនុកចិត្តថា វានឹងកើតឡើងនៅឆ្នាំក្រោយ» ដោយបន្ថែមថា ការទូទាត់អន្តរជាតិជារូបិយប័ណ្ណឌីជីថលតំណាងឲ្យអនាគត។

ពាណិជ្ជកម្មរបស់រុស្ស៊ី ត្រូវបានរងផលប៉ះពាល់ជាខ្លាំង ព្រោះតែទណ្ឌកម្ម ហើយសូម្បីតែការធ្វើជំនួញជាមួយដៃគូធំៗដូចជា ចិន ឬតួកគី ក៏ជួបប្រទះនឹងផលលំបាកផងដែរ ខណៈធនាគារក្នុងស្រុកមានការប្រុងប្រយ័ត្នខ្ពស់ជាមួយប្រតិបត្តិការដែលទាក់ទងនឹងប្រទេសរុស្ស៊ី ដើម្បីជៀសវាងការត្រួតពិនិត្យពីនិយតករលោកខាងលិច។

នៅឆ្នាំនេះ រុស្ស៊ីបានអនុញ្ញាតការប្រើប្រាស់រូបិយប័ណ្ណគ្រីបតូ ក្នុងពាណិជ្ជកម្មបរទេស ហើយបានចេញច្បាប់ទទួលស្គាល់ការរុករក(mine)លុយគ្រីបតូ ដែលរួមមានទាំង Bitcoin ផងដែរ។ បច្ចុប្បន្ន រុស្ស៊ីគឺជាប្រទេសឈានមុខគេមួយនៅលើពិភពលោក ក្នុងការរុករក Bitcoin ។

កាលពីដើមខែធ្នូ លោកប្រធានាធិបតីរុស្ស៊ី វ្ល៉ាឌីមៀរ ពូទីន បាននិយាយថា រដ្ឋបាលអាមេរិកបច្ចុប្បន្ន កំពុងធ្វើឲ្យតួនាទីរបស់ប្រាក់ដុល្លារអាមេរិកក្នុងនាមជារូបិយប័ណ្ណបម្រុងចុះខ្សោយ ដោយប្រើប្រាស់វាសម្រាប់គោលបំណងនយោបាយ ហើយបង្ខំឲ្យប្រទេសជាច្រើនងាកទៅរករូបិយប័ណ្ណផ្សេងជំនួសវិញ។

លោក ពូទីន បានលើកឡើងអំពី Bitcoin ជាឧទាហរណ៍ ដោយបញ្ជាក់ថា គ្មាននរណាម្នាក់នៅក្នុងពិភពលោកអាចគ្រប់គ្រង Bitcoin បានទេ។ សុន្ទរកថារបស់លោក ពូទីន បានបង្ហាញថា មេដឹកនាំរុស្ស៊ីបានគាំទ្រការប្រើប្រាស់រូបិយប័ណ្ណគ្រីបតូយ៉ាងទូលំទូលាយ៕

ដោយ៖ ឈាង