ទីក្រុង LA មានភ្លើងឆេះព្រៃ ៧កន្លែង កំពុងសម្រុកឆេះសន្ធោសន្ធៅក្នុងពេលតែមួយ 

តាមការចុះផ្សាយរបស់ BBC, គិតត្រឹមរសៀលថ្ងៃព្រហស្បតិ៍ទី៩ខែមករាឆ្នាំ២០២៥ (ពេលវេលានៅកម្ពុជា) ទីក្រុង Los Angeles ដែលគ្រប់គ្នានិយមហៅថា LA​ បានកើតមានភ្លើងឆេះព្រៃកើនដល់ទៅ៧ហើយ ខណៈស្ថានភាពរឹតតែធ្ងន់ធ្ងរឡើងៗ មិនទាន់គ្រប់គ្រងបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លើងឆេះព្រៃដំបូងគឺផ្តើមចេញពីតំបន់ Palisades កាលពីថ្ងៃអង្គារទី៧ខែមករាឆ្នាំ២០២៥ ប៉ុន្តែឥឡូវតំបន់ចំនួន៦ទៀតក៏កើតមានអគ្គិភ័យយ៉ាងកាចសាហាវផ្ទួនៗគ្នាដែរដូចជា Lidia, Olivas, Hurstm, Eaton, Woodley និង Sunset។

នៅ Palisades, អគ្គិភ័យបានឆាបឆេះលើផ្ទៃដី ៦ ៣៩៤ហិកតា ដុតកម្ទេចសំណង់ប្រមាណ ១ ១០០ និងបង្ខំឲ្យជម្លៀសមនុស្សជាង ១០០ ០០០នាក់។

ចំណែកភ្លើងឆេះព្រៃ Eaton បានលេបត្របាក់ផ្ទៃដី ៤ ២៨៩ហិកតា បំផ្លាញសំណង់អគារចន្លោះ ២០០ទៅ៥០០អគារ ខណៈអគ្គិភ័យ Hurst កំពុងឆាបឆេះលើផ្ទៃដី ២០៤ហិកតា រីឯភ្លើងឆេះព្រៃ Woodley បានដុតកម្ទេចលើផ្ទៃដី១២ហិកតា។

ទន្ទឹមនោះ ភ្លើងឆេះព្រៃ Sunset នៅភ្នំហូលីវូដ បានរាលដាលយ៉ាងលឿនលើផ្ទៃដី ៨ហិកតា ខណៈអគ្គិភ័យ Lidia ឆាបឆេះ ៣២ហិកតាប៉ុន្តែទប់ស្កាត់បាន ៣០%។

ភ្លើងឆេះព្រៃថ្មីៗ កើតឡើងស្របពេលសោកនាដកម្មអគ្គិភ័យដ៏សាហាវនេះ ឆក់យកជីវិតមនុស្សចំនួន៦នាក់នៅក្នុងទីក្រុង LA ហើយក្រុមអ្នកព្យាករប៉ាន់ស្មានថា រដ្ឋកាលីហ្វ័រញ៉ា អាចខាតបង់សេដ្ឋកិច្ចក្នុងទំហំទឹកប្រាក់ចន្លោះពី៥២ពាន់លានដុល្លារទៅ៥៨ពាន់លានដុល្លារអាមេរិក។

ចំពោះកត្តាចម្បងដែលធ្វើឲ្យអគ្គិភ័យឆេះរាលដាលក្នុងល្បឿនដ៏លឿនបែបនេះ ត្រូវបានក្រុមអ្នកជំនាញចង្អុលចំៗទៅព្រៃស្ងួតនិងខ្យល់បក់ខ្លាំង៕

អត្ថបទ៖ សុខ សុវណ្ណ

ចុចអាន៖ មហន្តរាយភ្លើងឆេះព្រៃនៅ LA កាន់តែធំធេង ខណៈរកឃើញមនុស្សស្លាប់ជាបណ្តើរៗ