ព័ត៌មានអន្ដរជាតិ

មេណាតូ៖ បើសមាជិកនៅតែកំណត់ ២% លើវិស័យការពារ ណាតូនឹងមិនអាចការពារខ្លួនបានទេ

បានផុស

១ year មុន

នៅ

ថ្ងៃសុក្រ ២៤ មករា ២០២៥

ដោយ

Chheang

នៅឯវេទិកាសេដ្ឋកិច្ចពិភពលោកនៅទីក្រុង Davos អគ្គលេខាធិការអង្គការណាតូលោក Mark Rutte បានព្រមានថា បណ្ដាប្រទេសជាសមាជិកអាចប្រឈមមុខនឹងបញ្ហាការពារខ្លួនក្នុងរយៈពេលពី ៤ទៅ៥ឆ្នាំខាងមុខ បើការចំណាយលើវិស័យការពារជាតិបច្ចុប្បន្ននៅតែកំណត់ត្រឹម ២% នៃ GDP ដដែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rutte បានលើកសរសើរលោក ត្រាំ កាលពីអាណត្តិដំបូងធ្វើជាប្រធានាធិបតីអាមេរិកនាឆ្នាំ២០១៧ ដែលបានធ្វើឲ្យការចំណាយរបស់សម្ព័ន្ធមិត្តណាតូមានការកើនឡើង ខណៈកន្លងមកអឺរ៉ុបផ្ដោតសំខាន់លើសេវាសង្គម និងប្រព័ន្ធសុខភាពខ្លាំងពេកជាងការចំណាយលើវិស័យការពារជាតិដ៏សំខាន់។

ប្រធានអង្គការណាតូក៏បានលើកឡើងពីការព្រួយបារម្ភយ៉ាងធ្ងន់ធ្ងរលើសមត្ថភាពផលិតកម្មឧស្សាហកម្មរបស់សម្ព័ន្ធមិត្តផងដែរ ដោយកត់សម្គាល់ថា ផលិតកម្មឧស្សាហកម្មរបស់ណាតូទាំងមូលក្នុងរយៈពេល១ឆ្នាំ បានត្រឹមស្មើអ្វីដែលរុស្ស៊ីផលិតក្នុងរយៈពេល៣ខែប៉ុណ្ណោះ។ លោកបានព្រមានថា អាមេរិកកំពុងប្រឈមមុខនឹងបញ្ហាស្រដៀងគ្នានេះ ដោយចិនបានវ៉ាសហរដ្ឋអាមេរិកក្នុងទិន្នផលឧស្សាហកម្មដល់ទៅ៦ដង។

លោក Rutte បាននិយាយថា ផលិតផលរបស់ចិនមានគុណភាពល្អជាងកាលពី២០ឆ្នាំមុន ហើយល្អជាង ឬមានគុណភាពដូចផលិតផលអាមេរិកនាពេលបច្ចុប្បន្នអ៊ីចឹង។

ទន្ទឹមនោះ លោកក៏បានព្រមានពីការគាំទ្រជាបន្តបន្ទាប់សម្រាប់អ៊ុយក្រែន ដោយសង្កត់ធ្ងន់ថា បើអាមេរិកបន្តផ្គត់ផ្គង់អ៊ុយក្រែននាពេលអនាគត នោះបណ្តាប្រទេសនៅអឺរ៉ុបនឹងទទួលបន្ទុកផ្នែកហិរញ្ញវត្ថុកាន់តែច្រើន៕

ដោយ៖ ឈាង

Related Topics:អង្គការណាតូ (NATO)