ណេតាន់យ៉ាហ៊ូ៖ ត្រាំ គឺ​ជាមិត្ត​ដ៏​ល្អ​បំផុត​របស់​អ៊ីស្រាអែល ល្អ​ជាង​ប្រធានាធិបតី​ណាណា​ទាំង​អស់

យោង​តាម​សារព័ត៌មាន ANI នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាស​ក្ដែងៗ​ថា លោក ដូណាល់ ត្រាំ គឺ​ជា​ប្រធានាធិបតី​អាមេរិក​ដ៏​ល្អ​បំផុត​​របស់​ប្រទេស​អ៊ីស្រាអែល។

លោក ណេតាន់យ៉ាហ៊ូ បាន​ថ្លែងអំណរគុណ​ដល់លោក ត្រាំ ដែលបានអញ្ជើញគាត់​ឲ្យ​ក្លាយ​ជាមេដឹកនាំបរទេសដំបូងគេ​ទៅ​បំពេញទស្សនកិច្ចនៅសហរដ្ឋអាមេរិក ហើយបាន​លើក​សរសើរ​មិន​ដាច់​ពី​មាត់​ថា លោក ត្រាំ ជា«មិត្តល្អបំផុតដែលអ៊ីស្រាអែលមិនធ្លាប់មាននៅក្នុងសេតវិមាន»។

អំឡុង​ពេលថ្លែងសុន្ទរកថាក្នុងសន្និសីទសារព័ត៌មានរួមគ្នាជាមួយលោក ត្រាំ កាល​ពី​ថ្ងៃអង្គារ​ទី​៤​ខែ​កុម្ភៈ​ឆ្នាំ​២០២៥ លោក ណេតាន់យ៉ាហ៊ូ បាននិយាយថា៖ «ខ្ញុំមានកិត្តិយសដែលអ្នក (លោក ដូណាល់ ត្រាំ) បានអញ្ជើញខ្ញុំជាមេដឹកនាំបរទេសដំបូងគេដែលមកទស្សនកិច្ចនៅសេតវិមានក្នុងអាណត្តិទីពីររបស់អ្នក។ នេះជាសក្ខីភាពចំពោះមិត្តភាព និងការគាំទ្ររបស់អ្នកចំពោះរដ្ឋជ្វីហ្វ និងប្រជាជនជ្វីហ្វ។ ហើយ​នេះ​ជា​មូលហេតុ​ដែល​ប្រជាជន​អ៊ីស្រាអែល​មាន​ការ​គោរព​យ៉ាង​សម្បើម​ក្រៃលែង​ចំពោះ​អ្នក»។

លោក ណេតាន់យ៉ាហ៊ូ ក៏បានពិភាក្សាអំពីស្ថានភាពសន្តិសុខរបស់អ៊ីស្រាអែលនាពេលបច្ចុប្បន្ន ដោយ​សង្កត់ធ្ងន់លើតម្រូវការដើម្បីធានាអនាគតរបស់អ៊ីស្រាអែល និងនាំមកនូវសន្តិភាពដល់តំបន់។ ទាក់ទិននឹងតំបន់ហ្គាហ្សា លោក ណេតាន់យ៉ាហ៊ូ បានគូសបញ្ជាក់ពីគោលដៅសំខាន់ៗចំនួនបីសម្រាប់អ៊ីស្រាអែល ដូចជា ការបំផ្លាញយោធារបស់ក្រុមហាម៉ាស ការដោះលែងចំណាប់ខ្មាំងអ៊ីស្រាអែលទាំងអស់ និង​ការ​ធានាថា​តំបន់ហ្គាហ្សាលែងបង្កការគំរាមកំហែងដល់អ៊ីស្រាអែលទៀតហើយ។

បើ​យោង​តាមសារព័ត៌មាន ​Al Jazeera លោក ណេតាន់យ៉ាហ៊ូ បានទៅដល់សហរដ្ឋអាមេរិកកាលពីថ្ងៃអាទិត្យ ដើម្បីពិភាក្សាអំពីកិច្ចព្រមព្រៀងបទឈប់បាញ់នៅតំបន់​ហ្គាហ្សា ក៏ដូចជាផែនការសម្រាប់តំបន់មជ្ឈិមបូព៌ាជាមួយលោក ត្រាំ។

នាយករដ្ឋមន្ត្រីអ៊ីស្រាអែល ក៏ត្រូវបានគេរំពឹងថានឹងមានកិច្ចប្រជុំជាមួយមេដឹកនាំយោធាអាមេរិក និងសមាជិកសភាផងដែរ។ កិច្ចប្រជុំទាំងនេះនឹងធ្វើឡើងក្នុងរយៈពេលជាច្រើនថ្ងៃ៕

ដោយ៖ ឈាង