ព័ត៌មានអន្ដរជាតិ

Netanyahu គំរាមបញ្ចប់បទឈប់បាញ់ និងប្រយុទ្ធឲ្យក្រុមហាម៉ាសស្គាល់ដៃ បើមិនដោះលែងចំណាប់ខ្មាំងនៅថ្ងៃសៅរ៍

បានផុស

៣ សប្តាហ៍ មុន

នៅ

ថ្ងៃពុធ ១២ កុម្ភៈ ២០២៥

ដោយ

នាយករដ្ឋមន្ត្រីអ៊ីស្រាអែល Benjamin Netanyahu បានព្រមានក្រុមហាម៉ាសថា លោកនឹងបញ្ចប់បទឈប់បាញ់នៅតំបន់ហ្គាហ្សា បើក្រុមនេះ មិនព្រមដោះលែងចំណាប់ខ្មាំងដែលនៅសេសសល់ ត្រឹមរសៀលថ្ងៃសៅរ៍ទី១៥ខែកុម្ភៈឆ្នាំ២០២៥ទេនោះ។ មិនត្រឹមប៉ុណ្ណឹងលោកគំរាមទៀតថា កងទ័ពអ៊ីស្រាអែល នឹងចាប់ផ្តើមបើកការប្រយុទ្ធយ៉ាងសាហាវសាជាថ្មីឲ្យចលនាប្រដាប់អាវុធប៉ាឡេស្ទីនមួយនេះស្គាល់ដៃ បើពួកគេមិនធ្វើតាមឱសានវាទ។

នាយករដ្ឋមន្ត្រីអ៊ីស្រាអែល Benjamin Netanyahu (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, សេចក្តីប្រកាសរបស់លោក Netanyahu ធ្វើឡើងបន្ទាប់ពីកិច្ចប្រជុំគណៈរដ្ឋមន្ត្រីសន្តិសុខរយៈពេលបួនម៉ោងកាលពីថ្ងៃអង្គារទី១១ខែកុម្ភៈ ដោយក្នុងអំឡុងពេលនោះ លោកនិងរដ្ឋមន្ត្រីសំខាន់បានសម្រេចជាឯកច្ឆ័ន្ទ បន្តសង្រ្គាមទ្រង់ទ្រាយធំនៅហ្គាហ្សាឡើងវិញ ប្រសិនបើក្រុមហាម៉ាសមិនគោរពតាមអ្វីដែលកំណត់។

នេះគឺជាការឆ្លើយតបទៅសេចក្តីប្រកាសរបស់ក្រុមហាម៉ាស ដែលថា ពួកគេសូមផ្អាកដោះលែងចំណាប់ខ្មាំងសិន ព្រោះចោទថា អ៊ីស្រាអែល បានរំលោភបទឈប់បាញ់តាមរយៈការរារាំងជំនួយមនុស្សធម៌។

ក្រុមហាម៉ាសជាមួយចំណាប់ខ្មាំង (រូបថត៖ Reuters)

យ៉ាងណា ការគំរាមរបស់លោក Netanyahu នោះទៀតសោត គឺកើតឡើងបន្ទាប់ពីប្រធានាធិបតីអាមេរិក ដូណាល់ ត្រាំ បានសម្លុតទៅក្រុមហាម៉ាសឲ្យដោះលែងចំណាប់ខ្មាំងទាំងអស់នៅហ្គាហ្សា ត្រឹមពេលថ្ងៃត្រង់ថ្ងៃសៅរិ៍សប្ដាហ៍នេះដូចគ្នា បើមិនដូច្នោះទេនឹងមានការលុបចោលបទឈប់បាញ់ រួចការវាយប្រហារនឹងផ្ទុះឡើងតែម្ដង។

លោក ត្រាំ និយាយថា «តាមដែលខ្ញុំបារម្ភ បើចំណាប់ខ្មាំងទាំងអស់មិនត្រូវបានត្រឡប់មកវិញនៅថ្ងៃសៅរ៍នៅម៉ោង១២ថ្ងៃត្រង់ ខ្ញុំគិតថាវាជាពេលវេលាសមស្រប។ ខ្ញុំនឹងនិយាយថា លុបចោលវា ហើយការភ្នាល់ទាំងអស់ត្រូវបានបិទ ហើយទុកឲ្យសង្គ្រាមផ្ទុះឡើង។ ខ្ញុំចង់និយាយថា ពួកគេគួរតែត្រឡប់មកវិញនៅម៉ោង១២នៅថ្ងៃសៅរ៍»។

ប្រធានាធិបតីអាមេរិក ដូណាល់ ត្រាំ (រូបថត៖ Reuters)

មេដឹកនាំវ័យ៧៨ឆ្នាំរូបនេះ បន្ថែមថា លោកចង់ឲ្យមានការដោះលែងចំណាប់ខ្មាំងទ្រង់ទ្រាយធំ មិនមែនដោះលែងម្ដងពីរបីនាក់នោះឡើយ។

សូមជម្រាបថា ក្នុងរយៈពេលបីសប្តាហ៍កន្លងមកនេះ ក្រុមហាម៉ាសបានដោះលែងចំណាប់ខ្មាំងចំនួន២១នាក់ហើយ ដើម្បីដោះដូរជាមួយអ្នកទោសប៉ាឡេស្ទីនរាប់រយនាក់ដែលត្រូវបានឃុំខ្លួននៅក្នុងពន្ធនាគាររបស់អ៊ីស្រាអែល៕

អត្ថបទ៖ សុខ សុវណ្ណ

ចុចអាន៖ ណេតាន់យ៉ាហ៊ូ៖ ត្រាំ គឺជាមិត្តដ៏ល្អបំផុតរបស់អ៊ីស្រាអែល ល្អជាងប្រធានាធិបតីណាណាទាំងអស់