ព័ត៌មានអន្ដរជាតិ

រដ្ឋអារ៉ាប់ អនុម័តផែនការកសាងហ្គាហ្សាឡើងវិញ ដោយចំណាយទុន ៥៣ពាន់លានដុល្លារ

បានផុស

១ year មុន

នៅ

ថ្ងៃពុធ ៥ មីនា ២០២៥

ដោយ

Chheang

មេដឹកនាំអារ៉ាប់ បានអនុម័តជាផ្លូវការនូវផែនការរបស់ប្រទេសអេហ្ស៊ីបក្នុងការកសាងឡើងវិញតម្លៃ ៥៣ពាន់លានដុល្លារ សម្រាប់តំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំនិតផ្តួចផ្តើមនេះ រៀបចំឡើងដើម្បីកសាងឡើងវិញនូវហេដ្ឋារចនាសម្ព័ន្ធរបស់ហ្គាហ្សា និងជំរុញសេដ្ឋកិច្ចរបស់ខ្លួន ប៉ុន្តែវាផ្ទុយពីសំណើដ៏ចម្រូងចម្រាសរបស់ប្រធានាធិបតីអាមេរិក លោក ដូណាល់ ត្រាំ ក្នុងការប្រែក្លាយតំបន់ហ្គាហ្សាទៅជាគោលដៅទេសចរណ៍ «Riviera នៃមជ្ឈិមបូព៌ា»។

ការអនុម័តផែនការរបស់អេហ្ស៊ីបកាលពីថ្ងៃអង្គារទី៤មីនា មានគោលបំណងធានាថា ប្រជាជនចំនួន ២លាននាក់នៅហ្គាហ្សាមិនត្រូវបានផ្លាស់ទីលំនៅនោះទេ។ យ៉ាងណាមិញ បញ្ហាប្រឈមធំៗនៃអនាគតតំបន់ហ្គាហ្សា នៅតែជាចម្ងល់សម្រាប់មនុស្សរាល់គ្នា ជាពិសេសថាតើនរណានឹងគ្រប់គ្រងហ្គាហ្សា ហើយប្រទេសណាខ្លះដែលនឹងផ្តល់លុយរាប់ពាន់លានដុល្លារដើម្បីការកសាងឡើងវិញ។

ប្រធានាធិបតីអេហ្ស៊ីប លោក Abdel Fattah el-Sisi បានលើកឡើងថា អេហ្ស៊ីបបានសហការជាមួយជនជាតិប៉ាឡេស្ទីន ដើម្បីបង្កើតគណៈកម្មាធិការរដ្ឋបាលឯករាជ្យមួយនៅក្នុងហ្គាហ្សា ដែលមានតួនាទីត្រួតពិនិត្យជំនួយមនុស្សធម៌ និងចាត់ចែងកិច្ចការទូទៅជាបណ្ដោះអាសន្ន។

ទន្ទឹមនោះ រដ្ឋអារ៉ាប់មួយចំនួន បានអំពាវនាវឲ្យមានការរុះរើទាំងស្រុងនូវក្រុមសកម្មប្រយុទ្ធហាម៉ាស ខណៈរដ្ឋអារ៉ាប់ខ្លះទៀត បានប្រាប់ថា ការសម្រេចចិត្តនេះគឺទុកឲ្យប៉ាឡេស្ទីនជាអ្នកចាត់ចែង។

ក្រុមហាម៉ាស បានយល់ព្រមលើផែនការរបស់អេហ្ស៊ីប ហើយប្រកាសថា ខ្លួននឹងមិនដើរតួនាទីក្នុងការគ្រប់គ្រងហ្គាហ្សាទៀតឡើយ។ យ៉ាងណា ចំពោះសំណើឲ្យមានការរំសាយក្រុមហាម៉ាស គឺមិនអាចទៅរួចជាដាច់ខាត៕

ដោយ៖ ឈាង

ចុចអាន៖ មេដឹកនាំអារ៉ាប់ប្រជុំគ្នានៅទីក្រុងគែរ ដើម្បីបង្កើតជម្រើសជំនួសផែនការហ្គាហ្សារបស់អាមេរិក