ត្រាំ សុំចូលខ្លួន ជួយដោះស្រាយជម្លោះ ឥណ្ឌា-ប៉ាគីស្ថាន

ចំពេលជម្លោះឥណ្ឌា-ប៉ាគីស្ថាន កំពុងក្តៅគគុក ប្រធានាធិបតីអាមេរិក ដូណាល់ ត្រាំ បានបង្ហាញក្តីបារម្ភនិងអំពាវនាវឲ្យភាគីទាំងពីរបន្ធូរបន្ថយភាពតានតឹង ហើយសុំចូលខ្លួនដោះស្រាយបញ្ហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNBC News នៅថ្ងៃព្រហស្បតិ៍ទី៨ខែឧសភាឆ្នាំ២០២៥ លោក ត្រាំ បានថ្លែងចេញពីការិយាល័យរាងពងក្រពើថា «វាពិតជាអាក្រក់ណាស់! ខ្ញុំមិនកាន់ជើងខាងណាទេ។ ខ្ញុំស្គាល់ភាគីទាំងពីរនេះច្បាស់ណាស់ ហើយខ្ញុំចង់ឃើញពួកគេធ្វើការជាមួយគ្នា។ ខ្ញុំចង់ឃើញពួកគេឈប់ ហើយសង្ឃឹមថាពួកគេអាចបញ្ឈប់វាឥឡូវនេះ។ ប្រសិនបើខ្ញុំអាចជួយបាន ខ្ញុំនឹងចូលខ្លួនទៅជួយ។ ឥណ្ឌានិងប៉ាគីស្ថាន ត្រូវតែធ្វើការដើម្បីបញ្ចប់វិបត្តិនេះដោយសន្តិវិធី»។

ទន្ទឹមនោះ ក្រសួងការបរទេសអាមេរិកក៏ចេញសេចក្តីថ្លែងការណ៍ដែរថា ទីក្រុងវ៉ាស៊ីនកំពុងតានដានសភាពការណ៍យ៉ាងយកចិត្តទុកដាក់ ហើយជំរុញឲ្យភាគីទាំងពីរ ធ្វើការឆ្ពោះទៅរកសន្តិភាពយូរអង្វែង។

សំណើរបស់អាមេរិក កើតឡើងស្របពេលទីក្រុងញូវដែលីនិងអ៊ីស្លាម៉ាបាដ កំពុងប្រឈមមុខដាក់គ្នាក្នុងកម្រិតធ្ងន់ធ្ងរបំផុត ចាប់តាំងពីឥណ្ឌា បើកប្រតិបត្តិការ «Sindoor» វាយប្រហារឆ្លងដែនចូលដីប៉ាគីស្ថាន ដើម្បីឆ្លើយតបទៅនឹងអំពើភេរវកម្មនៅកាស្មៀរ ដែលឆក់យកជីវិតទេសចរ២៦នាក់។

ប្រតិបត្តិការ «Sindoor» ត្រូវឥណ្ឌាអះអាងថា កំណត់គោលដៅលើជំរំភេរវករនៅទីតាំងចំនួន៩កន្លែង ប៉ុន្តែជាបែរជាសម្លាប់ជនស៊ីវិល៣១នាក់ទៅវិញ នៅក្នុងទឹកដីកាស្មៀរខាងប៉ាគីស្ថាន ហើយក្នុងនោះក៏រួមមានទាំងកុមារផងដែរ។ 

ទង្វើនេះធ្វើឲ្យប៉ាគីស្ថាននៅមិនសុខឡើយ ដោយលោកនាយករដ្ឋមន្ត្រី Shehbaz Sharif បានប្តេជ្ញាឆ្លើយតបនិងផ្តាំទៅឥណ្ឌា ឲ្យត្រៀមខ្លួនទទួលការសងសឹកជាមួយកម្លាំងដ៏ខ្លាំងអស្ចារ្យទៅវិញ។

ការិយាល័យរបស់លោកបានចេញសេចក្តីថ្លែងការណ៍មួយថា «ស្របតាមមាត្រា៥១ នៃធម្មនុញ្ញអង្គការសហប្រជាជាតិ, ប៉ាគីស្ថានសូមរក្សាសិទ្ធិក្នុងការឆ្លើយតបដើម្បីការពារខ្លួនក្នុងពេល ទីកន្លែង និងរបៀបដែលខ្លួននឹងសម្រេចចិត្ត ដើម្បីសងសឹកចំពោះការបាត់បង់ជីវិតជនជាតិប៉ាគីស្ថានស្លូតត្រង់ និងការរំលោភលើអធិបតេយ្យភាពរបស់ខ្លួន។ កងកម្លាំងប្រដាប់អាវុធនៃប្រទេសប៉ាគីស្ថាន ត្រូវបានអនុញ្ញាតឲ្យធ្វើសកម្មភាពឆ្លើយតបទៅវិញហើយ»៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន ផ្តាំទៅឥណ្ឌា ឲ្យត្រៀមខ្លួនទទួលការសងសឹក ជាមួយកម្លាំងដ៏ខ្លាំងអស្ចារ្យ