ព័ត៌មានអន្ដរជាតិ

ក្រោយសង្គ្រាម១២ថ្ងៃ មេដឹកនាំកំពូលអ៊ីរ៉ង់បង្ហាញវត្តមានលើកដំបូង គំរាមថានឹងអាចវាយអាមេរិកម្ដងទៀត

បានផុស

១ year មុន

នៅ

ថ្ងៃសុក្រ ២៧ មិថុនា ២០២៥

ដោយ

Chheang

នៅក្នុងសុន្ទរកថាជាសាធារណៈលើកដំបូងរបស់គាត់ ចាប់តាំងពីជម្លោះរយៈពេល១២ថ្ងៃជាមួយអ៊ីស្រាអែល មេដឹកនាំកំពូលរបស់អ៊ីរ៉ង់ Ayatollah Ali Khamenei បានព្រមានថា ប្រសិនបើសហរដ្ឋអាមេរិកបើកការវាយប្រហារយោធាមួយផ្សេងទៀត អ៊ីរ៉ង់នឹងសងសឹកដោយកំណត់គោលដៅលើមូលដ្ឋានទ័ពរបស់ក្រុងវ៉ាស៊ីនតោននៅទូទាំងតំបន់មជ្ឈិមបូព៌ា។

លោក Ayatollah Ali Khamenei (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងតាមរយៈវីដេអូដែលបានថតទុកមុនកាលពីថ្ងៃទី២៦ខែមិថុនា លោក Khamenei បានសរសើរសកម្មភាពរបស់អ៊ីរ៉ង់ អំឡុងពេលមានជម្លោះ ដោយគូសបញ្ជាក់ពីការវាយប្រហារដោយមីស៊ីលប្រឆាំងនឹងមូលដ្ឋានទ័ពអាមេរិកក្នុងប្រទេសកាតា ហើយនិយាយថា «សាធារណរដ្ឋអ៊ីស្លាមបានទះកំផ្លៀងអាមេរិក។ យើងបានវាយប្រហារមូលដ្ឋានទ័ពអាមេរិកដ៏សំខាន់មួយនៅក្នុងតំបន់»។

លោកបានច្រានចោលយ៉ាងម៉ឺងម៉ាត់នូវការទាមទាររបស់ប្រធានាធិបតីអាមេរិក ដូណាល់ ត្រាំ សម្រាប់«ការចុះចាញ់ដោយគ្មានលក្ខខណ្ឌ» ដោយនិយាយថា វានឹងមិនកើតឡើងនោះទេ។

លោក Khamenei បានលើកឡើងថា «ការពិតដែលថាសាធារណរដ្ឋអ៊ីស្លាមអាចចូលទៅកាន់មជ្ឈមណ្ឌលសំខាន់ៗរបស់អាមេរិកនៅក្នុងតំបន់ ហើយអាចចាត់វិធានការប្រឆាំងនឹងពួកគេនៅពេលណាដែលខ្លួនយល់ថាចាំបាច់ មិនមែនជាឧបទ្ទវហេតុតូចតាចនោះទេ វាគឺជាឧបទ្ទវហេតុដ៏ធំមួយ ហើយឧបទ្ទវហេតុនេះអាចកើតឡើងម្តងទៀតនៅពេលអនាគតប្រសិនបើមានការវាយប្រហារកើតឡើង»។

នៅមុនការលើកឡើងរបស់លោក Khamenei មួយថ្ងៃ លោក ត្រាំ បាននិយាយថា អាមេរិកនឹងវាយអ៊ីរ៉ង់ម្ដងទៀត បើទីក្រុងតេហេរ៉ង់ចាប់ផ្ដើមកសាងកម្មវិធីនុយក្លេអ៊ែររបស់ខ្លួនឡើងវិញ។

សូមបញ្ជាក់ថា ជាច្រើនទសវត្សរ៍កន្លងមក អ៊ីរ៉ង់តែងតែទទូចថា ខ្លួនមិនបានប្រើប្រាស់កម្មវិធីនុយក្លេអ៊ែរសម្រាប់គោលបំណងផលិតអាវុធនោះទេ ដោយច្រានចោលនូវការចោទប្រកាន់របស់លោកខាងលិច ហើយអះអាងថា កម្មវិធីនុយក្លេអ៊ែរមានគោលបំណងស៊ីវិលតែប៉ុណ្ណោះ៕

ដោយ៖ ឈាង