ថៃ មានអ្នកឆ្លងជំងឺអេដស៍ ​ជាង​ ១៣ ០០០​នាក់​ ត្រឹម​ពាក់​កណ្តាលឆ្នាំ

យោងតាមទិន្នន័យរបស់ក្រសួងសុខាភិបាលថៃ គិតត្រឹមពាក់កណ្តាលឆ្នាំ២០២៥នេះ មានករណីឆ្លងជំងឺអេដស៍ថ្មីចំនួន ១៣ ៣៥៧ករណី ដូច្នេះបច្ចុប្បន្នប្រទេសនេះ កំពុងមានអ្នកផ្ទុកមេរោគ HIV សរុប ៥៤៧ ៥៥៦នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានបញ្ជាក់ថា មូលហេតុចម្បងនៃការឆ្លងគឺការរួមភេទដោយមិនប្រើស្រោមអនាម័យ។ លើសពីនេះ មនុស្សជាច្រើនមិនបានធ្វើតេស្ត និងមិនដឹងពីស្ថានភាពមេរោគអេដស៍របស់ពួកគេ។ ពួកគេមិនដឹងថាពួកគេមានគ្រោះថ្នាក់ឡើយ អ្នកខ្លះ​មិន​ហ៊ាន​ទៅ​មន្ទីរពេទ្យ​ដើម្បី​ធ្វើតេស្ត​ទេ ព្រោះ​បារម្ភ​ពី​ការ​មាក់ងាយក្នុង​សង្គម ដូច្នេះពួកគេអាចចម្លងមេរោគអេដស៍ទៅដៃគូដោយមិនដឹងខ្លួន។

ស្របពេលជាមួយគ្នានោះ ក្រសួងក៏បង្ហាញក្តីបារម្ភផងដែរព្រោះក្នុងចំណោមករណីឆ្លងថ្មីនេះ គឺសឹងតែពាក់កណ្តាលទៅហើយ ដែលជាក្រុមមនុស្សពេញវ័យអាយុចន្លោះ១៥ទៅ២៤ឆ្នាំ។

ថ្វីដ្បិតតែមានការថយចុះគួរឲ្យកត់សម្គាល់នៃករណីឆ្លងថ្មីចាប់តាំងពីទសវត្សរ៍ឆ្នាំ១៩៩០មកក៏ពិតមែន ប៉ុន្តែការដោះស្រាយជាមួយករណីឆ្លងថ្មី ជាពិសេសក្នុងចំណោមយុវជននិងក្រុមប្រជាជនសំខាន់ៗ នៅតែជាបញ្ហាប្រឈមផ្នែកសុខភាពសាធារណៈដដែល។

ចំពោះករណីស្លាប់វិញ ក្រសួងសុខាភិបាលថៃចេញរបាយការណ៍ថា មានមនុស្សបាត់បង់ជីវិតដោយសារជំងឺអេដស៍ ចំនួន ១០ ២១៧ នាក់ក្នុងឆ្នាំ២០២៥៕

អត្ថបទ៖ សុខ សុវណ្ណ

ចុចអាន៖ បច្ចុប្បន្នករណីឆ្លងថ្មីនៃមេរោគអេដស៍ ៤៤% គឺជាក្រុមយុវវ័យដែលមានអាយុពី ១៥ ទៅ ២៤ឆ្នាំ