ប្រទេសថៃ កាន់តែអសន្តិសុខ! កើតមានការបាញ់ប្រហារថ្មីទៀត ស្លាប់និងរបួសមនុស្សច្រើននាក់ 

ប្រទេសថៃកាន់តែអសន្តិសុខ ដោយកើតមានការបាញ់ប្រហារទៀតហើយ បណ្តាលឲ្យមនុស្សម្នាក់ស្លាប់និង៧នាក់ទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងនាវេលាម៉ោង១រំលងអធ្រាត្រថ្ងៃពុធ ទី៣០ ខែកក្កដា ឆ្នាំ២០២៥ ក្នុងពិធីបុណ្យទេសចរ Kiriwong នៅភូមិ Kiriwong ឃុំ Kamlon ស្រុក Lansaka ខេត្ត Nakhon Si Thammarat។

តាមការបញ្ជាក់សមត្ថកិច្ចថៃ មូលហេតុឈានដល់ការបាញ់សម្លាប់នេះគឺដោយសារជម្លោះបុគ្គល។ ដំបូងឡើយមនុស្សរបួសនៅកន្លែងកើតហេតុមានចំនួន៨នាក់ ប៉ុន្តែក្រោយមកស្លាប់ម្នាក់នៅមន្ទីរពេទ្យ។

ហេតុការណ៍នេះកើតឡើង២ថ្ងៃប៉ុណ្ណោះ ក្រោយហេតុការណ៍ខ្មាន់កាំភ្លើង បើកការបាញ់ប្រហារសម្លាប់រង្គាលនៅផ្សារ Or Tor Kor ក្នុងទីក្រុងបាងកក បណ្តាលឲ្យមនុស្សស្លាប់ចំនួន៦នាក់។

អ្នកនាំពាក្យប៉ូលិសក្រុងបាងកក Sayam Boonsom បានឲ្យដឹងថា ជនដៃដល់ឈ្មោះ ណយ អាយុ៦១ឆ្នាំ មកពីខេត្តនគររាជសីមា គឺជាអតីតអ្នកធ្វើការនៅផ្សារ Or Tor Kor ហើយមូលហេតុគឺដោយសារជម្លោះបុគ្គលដូចគ្នា។

ហេតុការណ៍ថ្មីៗជាបន្តបន្ទាប់នេះ បញ្ជាក់ថា ប្រទេសថៃកាន់តែអសន្តិសុខនិងវឹកវរ ប៉ុន្តែវាមិនមែនជារឿងចម្លែកទេព្រោះថា ប្រទេសនេះមានគោលនយោបាយគ្រប់គ្រងកាំភ្លើងដ៏ធូររលុងបំផុត ធ្វើឲ្យមនុស្សម្នាក់ៗមានលទ្ធភាពកាន់កាប់កាំភ្លើងដោយងាយស្រួល។

សូមជម្រាបថា ត្រឹមមួយឆ្នាំ២០២៤ ប្រទេសថៃកើតមានការបាញ់បោះសម្លាប់រង្គាលចំនួន៦លើក ដោយសម្លាប់មនុស្សសរុប១៩នាក់៕

អត្ថបទ៖ សុខ សុវណ្ណ

ចុចអាន៖ ដឹងមូលហេតុដែលខ្មាន់កាំភ្លើង បាញ់សម្លាប់មនុស្សយ៉ាងរង្គាលនៅ បាងកក