ព័ត៌មានអន្ដរជាតិ

នាយករដ្ឋមន្ត្រីម៉ាឡេស៊ី ថា កម្ពុជានិងថៃប្តេជ្ញាអនុវត្តបទឈប់បាញ់ឲ្យពេញលេញ

បានផុស

៩ ខែ មុន

នៅ

ថ្ងៃព្រហស្បតិ៍ ៧ សីហា ២០២៥

ដោយ

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ដែលកំពុងធ្វើម្ចាស់ផ្ទះរៀបចំកិច្ចប្រជុំគណៈកម្មាធិការព្រំដែនទូទៅ (GBC) រវាងប្រទេសកម្ពុជានិងថៃ ដោយមានការអង្កេតការពីសំណាក់ប្រទេសចិននិងសហរដ្ឋអាមេរិក ដើម្បីដោះស្រាយបញ្ចប់ទំនាស់បង្ហូរឈាមនៅតាមព្រំដែន តាមរយៈការអនុវត្តបទឈប់បាញ់ឲ្យបានពេញលេញ។

នៅក្នុងការបង្ហោះតាមបណ្តាញសង្គមហ្វេសប៊ុកផ្ទាល់ខ្លួន នាយករដ្ឋមន្ត្រីម៉ាឡេស៊ី បានលើកថា លោកបានទទួលជួបជាមួយឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា នាយឧត្តមសេនីយ៍ ទៀ សីហា និងរដ្ឋមន្ត្រីស្តីទីក្រសួងការពារជាតិថៃ នាយឧត្តមសេនីយ៍ Nattaphon Narkphanit ជាមួយគណៈប្រតិភូរៀងៗខ្លួនរបស់ប្រទេសទាំងពីរ។

លោក អាន់វ៉ា បានលើកឡើងថា៖‍«កិច្ចប្រជុំនេះមានអត្ថន័យខ្លាំងណាស់ នៅពេលដែលយើងបានឈានដល់កិច្ចព្រមព្រៀងដ៏សំខាន់មួយ ដើម្បីបន្តការសន្ទនា និងរក្សាបទឈប់បាញ់នៅព្រំដែនកម្ពុជា-ថៃ ដែលបានចាប់ផ្តើមតាំងពីថ្ងៃទី ២៨ ខែកក្កដា។ វាឆ្លុះបញ្ចាំងពីការប្តេជ្ញាចិត្តរួមក្នុងការរក្សាសន្តិភាព និងស្ថិរភាពក្នុងតំបន់ ដែលមិនអាចខ្វះបាននៅក្នុងទិដ្ឋភាពភូមិសាស្ត្រនយោបាយនាពេលបច្ចុប្បន្ននេះ»។

នាយករដ្ឋមន្ត្រីម៉ាឡេស៊ី បានបន្តថា‍៖‍«ខ្ញុំសូមកោតសរសើរចំពោះទំនុកចិត្តដែលផ្តល់ដោយប្រទេសថៃ និងកម្ពុជាដល់ប្រទេសម៉ាឡេស៊ី ក្នុងការបន្តដឹកនាំការចរចាស្វែងរកសន្តិភាព និងការតាមដានស្ថានការណ៍នៅតាមព្រំដែន ជាពិសេសតាមរយៈតួនាទីដ៏សំខាន់របស់ ឧត្តមសេនីយ៍ Tan Sri Mohd Nizam Jaffar មេបញ្ជាការកងកម្លាំងប្រដាប់អាវុធម៉ាឡេស៊ី»។

នៅក្នុងការសន្ទនានោះ តាមនាយករដ្ឋមន្ត្រីម៉ាឡេស៊ី ប្រទេសទាំងពីរក៏បានឈានដល់កិច្ចព្រមព្រៀងសំខាន់ៗមួយចំនួន រួមទាំងការប្តេជ្ញាចិត្តក្នុងការអនុវត្តន៍ឱ្យបានពេញលេញនូវបទឈប់បាញ់ដោយគ្មានទម្រង់នៃការវាយលុកណាមួយ មិនបន្ថែមកងកម្លាំង ឬផ្លាស់ប្តូរការដាក់ពង្រាយកងទ័ព ជៀសវាងសកម្មភាពបង្កហេតុ ក៏ដូចជាការធានាការការពារជនស៊ីវិល និងហេដ្ឋារចនាសម្ព័ន្ធសាធារណៈ។

កិច្ចពិភាក្សាដែលមានរយៈពេល៣០នាទីនោះ ក៏មានការលើកឡើងអំពីសំណើនៃការដាក់ពង្រាយក្រុមអ្នកសង្កេតការណ៍អាស៊ាន (AOT) ដើម្បីជួយដល់កិច្ចខិតខំប្រឹងប្រែងតាមដាន ជំនួយមនុស្សធម៌ និងការគ្រប់គ្រងផ្នែកវេជ្ជសាស្រ្តនៅតាមតំបន់ព្រំដែន។

លោក អាន់វ៉ា បានសរសេរថា៖‍«ខ្ញុំ និងក្រុមម៉ាឡេស៊ីទាំងមូលនឹងបន្តធ្វើការដើម្បីគាំទ្រដំណើរការសន្តិភាពនេះ ដោយផ្អែកលើជំនឿ និងទំនុកចិត្តថាសន្តិភាពយូរអង្វែងអាចសម្រេចបានតាមរយៈកិច្ចសន្ទនា មិត្តភាព និងភាពស្មោះត្រង់»។

នៅមុនកិច្ចប្រជុំ GBC បានចាប់ផ្តើមកាលថ្ងៃទី៥ខែសីហា នាយករដ្ឋមន្ត្រីម៉ាឡេស៊ី បានអះអាងពីការដាក់ពង្រាយផ្កាយរណបសម្រាប់ការតាមដានឃ្លាំមើលការអនុវត្តបទឈប់បាញ់៕

រ៉ាន់ រើយ