ភូកេត ផ្ទុះការឆ្លងអេដស៍ខ្លាំង ដល់ថ្នាក់ ថៃ ទាញសញ្ញាព្រមាន

ប្រទេសថៃ បង្ខំចិត្តទាញសញ្ញាព្រមានអំពីការផ្ទុះជំងឺអេដស៍ខ្លាំងនៅភូកេត ដោយបារម្ភថា ករណីឆ្លងក្នុងខេត្តនេះ នឹងហក់ឡើងដល់ជិត៧ ០០០នាក់ ក្នុងឆ្នាំ២០២៥ ដែលកត្តានេះ តម្រូវឲ្យមានការចាត់វិធានការដោះស្រាយជាបន្ទាន់។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Thaiger នៅថ្ងៃពុធទី២០ខែសីហាឆ្នាំ២០២៥ លោក Thiraphong Chuaychu លេខាធិការអចិន្ត្រៃយ៍នៃខេត្តភូកេត បានបញ្ជាក់យ៉ាងច្បាស់ថា ករណីឆ្លងមេរោគ HIV ខ្ពស់ក្នុងខេត្តនេះ គឺត្រូវបានរុញច្រានខ្លាំងបំផុតក្នុងចំណោមស្រ្តីរកស៊ីផ្លូវភេទ បុរសរួមភេទជាមួយបុរស មនុស្សកែភេទ និងអ្នកប្រើប្រាស់គ្រឿងញៀនដែលចាក់ថ្នាំ។

ទន្ទឹមនោះដែរ លោកបានអំពាវនាវដល់គ្រប់ស្ថាប័នពាក់ព័ន្ធ ឲ្យសហការគ្នាធ្វើយ៉ាងណា រិះរកវិធីទប់ស្កាត់និងដោះស្រាយបញ្ហានេះឲ្យបានលឿនបំផុត កុំឲ្យភូកេត ក្លាយជាមជ្ឈមណ្ឌលចម្លងជំងឺអេដស៍ទៅកន្លែងដទៃ។

សូមជម្រាបថា គិតត្រឹមត្រីមាសទីពីរនៃឆ្នាំ២០២៥ ភូកេត មានករណីឆ្លងជំងឺអេដស៍ចំនួន ៦ ៦២២ករណី ដោយក្នុងនោះអ្នកជំងឺប្រហែល៨៦% កំពុងទទួលការព្យាបាលដោយថ្នាំប្រឆាំងវីរុស។

ស្រុកមឿង ស្ថិតនៅកណ្តាលភូកេត  នៅតែជាកន្លែងដែលរងផលប៉ះពាល់ខ្លាំងបំផុត សម្រាប់ការឆ្លងជំងឺនេះ៕

អត្ថបទ៖ សុខ សុវណ្ណ

ចុចអាន៖ ការ​ឆ្លង​មេរោគ​អេដស៍​កើន​ឡើង​ក្នុង​ចំណោម​យុវជន​ថៃ