ហេតុអ្វីលោក ថាក់ស៊ីន ទៅ ឌូបៃ?

យោងតាមព័ត៌មានចុងក្រោយ ផ្សាយដោយ Khaosod នៅព្រឹកថ្ងៃសុក្រទី៥ខែកញ្ញាឆ្នាំ២០២៥ លោក ​ថាក់ស៊ីន ស៊ីណាវ៉ាត្រ បានទៅដល់ទីក្រុង ឌូបៃ នៃប្រទេសអារ៉ាប់រួម តាមយន្តហោះឯកជន ដោយមិនមែនទៅសិង្ហបុរី ដូចការអះអាងនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយអតីតនាយករដ្ឋមន្ត្រីថៃរូបនេះ ប្រាប់ថាលោកនឹងធ្វើដំណើរ ទៅប្រទេសសិង្ហបុរី ដើម្បីពិនិត្យសុខភាព ប៉ុន្តែមុនការចាកចេញពីអាកាសយានដ្ឋានដនមឿង លោកត្រូវបានប៉ូលិសអន្តោប្រវេសន៍ឃាត់ខ្លួននិងរឹបអូសយក Passport ផងដែរ។ 

មុនពេលសួរនាំរួចរាល់ ប៉ូលិសក៏អនុញ្ញាតឲ្យ ថាក់ស៊ីន ចាកចេញតាមយន្តហោះ Bombardier Global 7500 ប៉ុន្តែលោកសន្យាថានឹងវិលចូលស្រុកវិញ ក្នុងរយៈពេល២ថ្ងៃ ដើម្បីឡើងតុលាការនៅថ្ងៃទី៩ខែកញ្ញា។

ទោះបីជាយ៉ាងណាក៏ដោយ នៅម៉ោងប្រហែល ៩:៣០ យប់ គេដឹងថា យន្តហោះរបស់ ថាក់ស៊ីន បានបង្វែរផ្លូវពីសិង្ហបុរី ហើយហោះលើមហាសមុទ្រឥណ្ឌា ក្រឡឹងចំនួន ២ ជុំ។ បន្ទាប់មកនៅម៉ោង ១១:០០ យប់ យន្តហោះបានហោះឆ្ពោះទៅកាន់ប្រទេសឥណ្ឌា រួចបន្តទៅកាន់តំបន់មជ្ឈិមបូព៌ា។

លុះដល់ម៉ោង ១២:១៥ នាទីរំលងអធ្រាត្រ គេហទំព័រ Flightradar24 បានបញ្ជាក់ថា គោលដៅរបស់យន្តហោះគឺទៅអាកាសយានដ្ឋានអន្តរជាតិ ឌូបៃ នៃប្រទេសអារ៉ាប់រួម។ នៅម៉ោង ២:៤០ នាទីទៀបភ្លឺ យន្តហោះឯកជនរបស់លោក ថាក់ស៊ីន បានចុះចតនៅអាកាសយានដ្ឋានអន្តរជាតិ ឌូបៃ បន្ទាប់ពីការហោះហើររយៈពេល ៧ ម៉ោង ២៣ នាទី។

សូមជម្រាបថា នេះគឺជាការធ្វើដំណើរលើកដំបូងរបស់លោក ថាក់ស៊ីន ទៅកាន់ទីក្រុង ឌូបៃ ក្នុងរយៈពេល ២ ឆ្នាំ បន្ទាប់ពីការវិលចូលស្រុកថៃវិញនៅថ្ងៃទី ២២ ខែសីហា ឆ្នាំ ២០២៣។

ហេតុអ្វីលោកថាក់ស៊ីន ទៅ ឌូបៃ?

លោកថាក់ស៊ីន បានបញ្ជាក់លើបណ្តាញសង្គម X នៅព្រឹកថ្ងៃសុក្រថា មូលហេតុដែលខ្លួនត្រូវប្តូរគោលដៅទៅឌូបៃ ព្រោះប៉ូលិសអន្តោប្រវេសន៍ថៃសួរនាំច្រើន ធ្វើឲ្យលោកខកការហោះហើរជិត ២ ម៉ោង ហើយពីឡុតប្រាប់ថា យន្តហោះឯកជនមិនអាចទៅដល់អាកាសយានដ្ឋាន Seletar នៅប្រទេសសិង្ហបុរីទាន់ពេលទេ ដោយសារតែអាកាសយានដ្ឋាននោះបិទនៅម៉ោង ១០ យប់ ហើយម៉ោងនៅប្រទេសសិង្ហបុរី ដើរលឿនជាងម៉ោងនៅប្រទេសថៃ ១ ម៉ោង។

ដូច្នេះ លោកក៏ប្រាប់ឲ្យពីឡុតឆ្ពោះទៅកាន់ទីក្រុង ឌូបៃ ជំនួសវិញ ពីព្រោះនៅទីនោះ លោកមានគ្រូពេទ្យផ្នែកឆ្អឹង និងគ្រូពេទ្យសួត ដែលព្យាបាលលោកអស់រយៈពេលជាយូរមកហើយ។

លោក ថាក់ស៊ីន បានធ្វើដំណើរទៅកាន់ទីក្រុង ឌូបៃ និងរស់នៅក្នុងស្ថានភាពនិរទេសខ្លួនអស់រយៈពេលជាច្រើនឆ្នាំ ដើម្បី គេចវេសពីការកាត់ទោស និងការចាប់ឃុំខ្លួននៅក្នុងប្រទេសថៃ ក្រោយរដ្ឋប្រហារឆ្នាំ២០០៦។ លោកនៅទីនោះព្រោះមានផលប្រយោជន៍អាជីវកម្ម ហើយទីក្រុងនេះក៏ជាទីតាំងងាយស្រួលសម្រាប់ការធ្វើដំណើរទៅកាន់ប្រទេសផ្សេងៗទៀតផងដែរ៕

អត្ថបទ៖ សុខ សុវណ្ណ

ចុចអាន៖ ថាក់ស៊ីន ចេញពីថៃ ទៅ សិង្ហបុរី ដើម្បីពិនិត្យសុខភាព ដោយសន្យាវិលចូលស្រុកវិញ នៅ២ថ្ងៃទៀត