ណេតាន់យ៉ាហ៊ូ ហៅទូរសព្ទ​ទៅ​សុំទោសមេដឹកនាំ​កាតា ហើយ​សន្យា​ថា​មិនធ្វើដូច្នេះម្តងទៀតទេ

យោង​តាម​​សេតវិមាន នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ កាលពីថ្ងៃចន្ទ​ទី​២៩ខែ​កញ្ញា​ បាន​សុំទោស​ប្រទេសកាតា ចំពោះការវាយប្រហារតាមផ្លូវអាកាសកាលពីដើមខែ ដែលបានសម្លាប់ទាហានកាតាម្នាក់ ដោយបានសន្យាថា អ៊ីស្រាអែលនឹងមិនធ្វើការវាយប្រហារបែបនេះទៀតទេ។

ថ្លែងតាមទូរសព្ទជាមួយនាយករដ្ឋមន្ត្រីកាតា Sheikh Mohammed bin Abdulrahman bin Jassim Al Thani ក្នុងពេលជួបជាមួយប្រធានាធិបតីអាមេរិក ដូណាល់ ត្រាំ នៅសេតវិមាន លោក ណេតាន់យ៉ាហ៊ូ បានសម្តែងការសោកស្តាយយ៉ាងខ្លាំងចំពោះការវាយប្រហារកាលពីថ្ងៃទី​៩ខែកញ្ញា ដែលអ៊ីស្រាអែលបាននិយាយថាបានកំណត់គោលដៅលើមេដឹកនាំក្រុម​ហាម៉ាស ប៉ុន្តែក៏បានរំលោភលើអធិបតេយ្យភាពកាតាផងដែរ។

សេតវិមានបានប្រកាស​នៅក្នុងសេចក្តីថ្លែងការណ៍មួយថា «គាត់(ណេតាន់យ៉ាហ៊ូ) បានអះអាងថា អ៊ីស្រាអែលនឹងមិនធ្វើការវាយប្រហារបែបនេះម្តងទៀតនាពេលអនាគតទេ»។

មេដឹកនាំទាំងពីរ បានព្រមព្រៀងគ្នាបង្កើតយន្តការត្រីភាគី​ជាមួយទីក្រុងវ៉ាស៊ីនតោន ដើម្បីកែលម្អទំនាក់ទំនង ដោះស្រាយវិបត្តិ និងសម្របសម្រួលកិច្ចខិតខំប្រឹងប្រែងប្រឆាំងនឹងការគំរាមកំហែងក្នុងតំបន់។

ការវាយប្រហារ​ដែលធ្វើឡើងនៅពេលមេដឹកនាំក្រុមហាម៉ាសនៅទីក្រុងដូហា​កំពុងពិភាក្សាលើសំណើបទឈប់បាញ់ដែលគាំទ្រដោយសហរដ្ឋអាមេរិកសម្រាប់តំបន់ហ្គាហ្សា បានទាក់ទាញការរិះគន់យ៉ាងខ្លាំងពីកាតា ដែលជាម្ចាស់ផ្ទះមូលដ្ឋានទ័ពអាកាសអាមេរិកដ៏ធំបំផុតនៅក្នុងតំបន់ និងបានដើរតួនាទីយ៉ាងសំខាន់ក្នុងការចរចាជាមួយក្រុមហាម៉ាស។

លោក ណេតាន់យ៉ាហ៊ូ ដែលថ្មីៗនេះបានពង្រីកការវាយប្រហាររបស់អ៊ីស្រាអែលទៅកាន់ប្រទេសអ៊ីរ៉ង់ ស៊ីរី លីបង់ និងយេម៉ែន បានការពារសកម្មភាពរបស់​ខ្លួន ហើយបានចោទប្រកាន់កាតាថាបានផ្តល់ជម្រកដល់ក្រុមហាម៉ាស។

លោក ត្រាំ ដែល​កំពុង​សាង​ទំនាក់ទំនងល្អ​ជាមួយដូហា រួមទាំងធ្លាប់​ទទួល​​អំណោយ​យន្តហោះប្រណិតមួយ​គ្រឿង​ពីប្រទេសកាតា បាននិយាយមុនពេលកិច្ចប្រជុំសេតវិមានថា លោក«មិនសប្បាយចិត្តទេ» ជាមួយនឹងការវាយប្រហាររបស់អ៊ីស្រាអែលនៅក្នុងរដ្ឋឈូងសមុទ្រ៕

ដោយ៖ ឈាង