កុំព្រួយ! វ៉ាក់សាំងកូវីដ-១៩ មិនប៉ះពាល់ដល់វដ្តរដូវស្ត្រីទេ

ពុំទាន់មានហេតុផលណាមួយដែលហាមប្រាមស្ត្រីកំពុងមានរដូវមិនឱ្យចាក់វ៉ាក់សាំងការពារកូវីដ-១៩នោះទេ។ ទាំង CDC និងគ្រូពេទ្យជំនាញខាងរោគស្ត្រីរបស់អាមេរិក (ACOG) សុទ្ធតែអនុញ្ញាតឱ្យស្រ្តីកំពុងមានរដូវទទួលបានវ៉ាក់សាំងដូចគ្នាទៅនឹងបុគ្គលទូទៅ ហើយវាមិនមានផលអាក្រក់ដល់សុខភាពនៃវដ្តរដូវរបស់ស្ត្រីឡើយ។

ប៉ុន្តែបើនិយាយពីប្រសិទ្ធភាពនៃវ៉ាក់សាំងលើការមករដូវ ស្ត្រីមួយចំនួននៅសហរដ្ឋអាមេរិក ដែលគេបានដកស្រង់សម្ដីតាមបណ្ដាញសង្គមនិយាយថា បន្ទាប់ពីចាក់វ៉ាក់សាំងរួច ពួកនាងប្រទះនឹងការមករដូវច្រើនជាងធម្មតា។ ក្នុងនោះអ្នកខ្លះនិយាយថា ខ្លួនមករដូវច្រើនដូចទើបតែពេញវ័យដំបូង ហើយខ្លះទៀតថា ពួកគេឈឺចាប់ពេលមករដូវអស់ពេលជាច្រើនថ្ងៃ។

ស្របគ្នាដែរ មជ្ឍមណ្ឌលត្រួតពិនិត្យនិងបង្ការជំងឺ (CDC) រាយការណ៍ថា ស្ត្រីរាប់សិបនាក់មករដូវខ្លាំងជាងធម្មតា មានការឈឺចាប់ និងមានវដ្តរដូវខុសប្រក្រតី ក្រោយបានចាក់វ៉ាក់សាំង។

ទោះជាយ៉ាងនេះក្ដី មិន​ប្រាកដ​ថាវ៉ាក់សាំងបង្កហានិភ័យដល់វដ្ដរដូវរបស់ស្ត្រីឡើយ។ អ្នកជំនាញជំងឺឆ្លង Amesh A. Adalja, MD នៅមជ្ឈមណ្ឌល Johns Hopkins ឯរដ្ឋ Maryland និយាយថា ការឈឺចាប់ខ្លាំងជាងប្រក្រតីពេលមករដូវ អាចជាការឈឺចាប់ធម្មតាបណ្ដាលមកពីប្រសិទ្ធភាពថ្នាំ ក្រោយពេលចាក់វ៉ាក់សាំងប៉ុណ្ណោះ។

ចំណែកឯលោក Mark Turrentine សាស្ត្រាចារ្យផ្នែកសម្ភពនិងរោគស្ត្រីនៅមហាវិទ្យាល័យវេជ្ជសាស្ត្រ Baylor ក្នុងរដ្ឋ Texas មានប្រសាសន៍ថា “មិនមានកត្តាជីវសាស្រ្តណាមួយដែលអាចបង្កឱ្យមានការរំខានដល់វដ្តរដូវបន្ទាប់ពីទទួលវ៉ាក់សាំងការពារកូវីដ-១៩ទេ” ។ វេជ្ជបណ្ឌិតរូបនេះថែមចង្អុលបង្ហាញថា ការហូរឈាមខុសធម្មតា “មិនមានផលប៉ះពាល់អ្វីទៅលើការធ្វើតេស្តណាមួយពីក្រុមហ៊ុនផលិតវ៉ាក់សាំងនោះដែរ” ។

ទោះបីជា មានការលើកឡើងពីផលប៉ះពាល់មួយចំនួនដោយស្ត្រីនៅលើបណ្ដាញសង្គមក៏ដោយ ក៏អ្នកជំនាញសុខភាពស្ត្រី Jennifer Wider, MD អះអាងថា ពុំមានទិន្នន័យគ្រប់គ្រាន់បង្ហាញថាវ៉ាក់សាំងកូវីដ-១៩អាចប៉ះពាល់ដល់វដ្តរដូវនោះទេ៕

ប្រែសម្រួល៖ សន្យា

ប្រភព៖ Health

ចុចអាន៖ សមាធិជួយឱ្យវដ្តរដូវទៀងទាត់ បន្ថយការឈឺចាប់ និងបំបាត់បញ្ហាមុនលើវ័យជំទង់

ចុចអាន៖ ហាត់ប្រាណក្រោយចាក់វ៉ាក់សាំងកូវីដមិនបង្កគ្រោះថ្នាក់ ​ថែមទាំងហុចផលកាន់តែល្អ