សុខភាព

មើលឲ្យហើយ! ពេលចាស់ទៅ ក្នុងខ្លួន យើងប្រែប្រួលម៉េចខ្លះ?

បានផុស

៥ years មុន

នៅ

ថ្ងៃសុក្រ ១៧ កញ្ញា ២០២១

ដោយ

អាយុកាន់តែច្រើន ប្រព័ន្ធភាពស៊ាំ ឆ្អឹង សាច់ដុំ ការចងចាំ មុខងារមួយចំនួនទៀត កាន់តែខ្សោយ ហើយនេះជារឿងធម្មជាតិ។ ពេលរាងកាយចាប់ផ្ដើមទ្រុឌទ្រោមចុះថមថយ ជាហេតុដែលមានរោគ និងជំងឺ ងាយនឹងចូលលុកលុយ។ ខាងក្រោមនេះ ជាចំណុចសំខាន់ៗដែលខាងក្នុងរាងកាយយើងប្រែប្រួល ពេលចាស់ទៅ ហើយអាចប៉ះពាល់កម្រិតណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១– ផ្នែកខាងក្នុងសំខាន់ៗប្រែប្រួល

– ប្រព័ន្ធបេះដូងសរសៃឈាម

កាន់តែចាស់ កាន់តែងាយមានអត្រាចង្វាក់បេះដូង (ជីពចរ) ទាប ខណៈបេះដូងអាចនឹងប្រែកាន់តែធំឡើង ដោយសារសរសៃឈាម និងសរសៃអាកទែ កាន់តែរឹងជាងមុន។ អាចពិបាកឲ្យឈាមធ្វើហូរ បណ្ដាលឲ្យសម្ពាធឈាមឡើងខ្ពស់ (ជំងឺលើសឈាម) និងបញ្ហាបេះដូងសរសៃឈាមដទៃផ្សេងទៀត។

– សន្លាក់ឆ្អឹង និងសាច់ដុំ

បន្ទាប់ពីធ្វើការជាច្រើនឆ្នាំមក ឆ្អឹងអាចខ្សោយ ហើយរួញតូច ដែលទាក់ទងនឹងទំហំ និងកំហាប់ឆ្អឹង។ នេះមានន័យថា សកម្មភាពរាងកាយខ្លាំងៗ អាចធ្វើឲ្យឆ្អឹងឈឺចាប់ ឬរងរបួសបានដោយងាយ។ មនុស្សចាស់ថែមទាំងអាចប្រែជាទាបជាងមុនទៀតផង។ ឯសាច់ដុំកាន់តែមិនសូវងាយបត់បែនបានស្រួល និងមិនសូវខ្លាំង បណ្ដាលឲ្យមានបញ្ហាក្នុងការទប់លំនឹងដងខ្លួន និងធ្វើសកម្មភាពប្រចាំថ្ងៃ។

– ប្រព័ន្ធរំលាយអាហារ

ជំងឺទល់លាមក ជាអ្វីដែលឃើញមានញឹកញាប់ជាធម្មតាយ៉ាងខ្លាំងក្នុងចំណោមអ្នកវ័យកាន់តែជ្រេ ហើយមានហេតុផលយ៉ាងច្រើន ដូចជា របបអាហារមានជាតិកាកសរសៃទាប ញ៉ាំទឹកតិច អត់ធ្វើលំហាត់ប្រាណ ជំងឺទឹកនោមផ្អែម និងប្រជុំរោគសញ្ញាពោះវៀនខ្សោយ។ ថ្នាំខ្លះ ក៏អាចជាបុព្វហេតុនៃជំងឺទល់លាមកដែរ ដូចជា ថ្នាំបញ្ចុះទឹកនោម និងថ្នាំបំពេញបន្ថែមជាតិដែក។

– ប្លោកនោមនិងផ្លូវនោម

មនុស្សចាស់តាមធម្មតា ប្រឈមការលំបាកទាក់ទងនឹងការនោម ហើយសភាពវេជ្ជសាស្ត្រមួយចំនួន អាចជាកត្តាចូលរួមចំណែក។ ជាក់ស្ដែង ទំនាក់ទំនងយ៉ាងជិតស្និទ្ធរវាងជំងឺទឹកនោមផ្អែម និងភាពមិនអាចគ្រប់គ្រងបន្ទោបង់បាន។

– ប្រព័ន្ធការចងចាំ

កាន់តែចាស់ កាន់តែភ្លេច នេះជាសញ្ញាបញ្ជាក់ថា ប្រព័ន្ធចងចាំក្នុងវ័យចាស់ កាន់តែចុះខ្សោយ។ ត្រូវដឹងថា ការចងចាំចុះខ្សោយ អាចជារោគសញ្ញានៃជំងឺបាត់បង់ការចងចាំរបស់មនុស្សចាស់ (Alzheimer’s disease)។ ជំងឺបាត់បង់ការចងចាំ របស់មនុស្សចាស់នេះ មិនគ្រាន់តែបណ្ដាលឲ្យបាត់បង់ការចងចាំតែប៉ុណ្ណោះទេ ថែមទាំងធ្វើឲ្យពិបាករក្សាភាពរហ័សរហួនផ្នែកបញ្ញាទៀតផង។

២– អាចពន្យឺតភាពចាស់យ៉ាងម៉េច?

ទម្លាប់ញ៉ាំ ឬរបបអាហារ ជារឿងសំខាន់បំផុតមួយក្នុងចំណោមមធ្យោបាយផ្សេង ដើម្បីពន្យឺតភាពចាស់ ក្នុងវ័យកាន់តែច្រើន។ គួរញ៉ាំរបបអាហារមានតុល្យភាព ផ្ដល់សុខភាពល្អ ដូចជា៖

– ជាតិប្រៃ ខ្លាញ់ និងប្រេងឲ្យតិច
– កុំញ៉ាំអាហារសម្បូរជាតិផ្អែមពេក
– អាហារធ្វើពីទឹកដោះគោ ដូចជា ទឹកដោះគោ និងស៊ុត
– ត្រី ជាពិសេសត្រីដែលមានអាស៊ីដខ្លាញ់អូមេហ្គា៣ ខ្ពស់ ដែលល្អសម្រាប់បេះដូង ហើយកាត់បន្ថយហានិភ័យកើតជំងឺបេះដូង។
– ញ៉ាំបន្លែឲ្យច្រើន។ បន្លែមានជាតិកាកសរសៃ វីតាមីន និងរ៉ែខនិជចាំបាច់ សម្រាប់ត្រូវការរាងកាយ។
– ញ៉ាំផ្លែឈើប្រភេទខុសៗគ្នាឲ្យបានច្រើន។ ផ្លែឈើជួយបន្ថយហានិភ័យកើតជំងឺលើសឈាម បេះដូង ស្ទះ/ដាច់សរសៃឈាមខួរក្បាល ធាត់ និងមហារីកមួយចំនួន។
– នំប៉័ង បាយ ដំឡូងបារាំង និងអាហារមានជាតិម្សៅអាមីដុងដទៃទៀត ក្នុងបរិមាណសមស្រប។
– ផលិតផលធ្វើពីគ្រាប់ធញ្ញជាតិទាំងមូល ក៏ល្អដែរ។

ចំណុចសំខាន់មួយទៀត គឺហាត់ប្រាណឲ្យបានទៀងទាត់ ដូចជា ដើរ រត់ រាំ ជិះកង់ យ៉ូហ្កា ឬថៃជី ជាដើម។ អ្វីដែលចាស់ៗ ត្រូវប្រកាន់ខ្ជាប់ដាច់ខាត គឺកុំស្មុគ ឬស្ត្រេសពេក៕

អត្ថបទផ្ដល់ដោយ៖Hello Krupet

ចុចអាន៖វ័យកាន់តែជ្រេ បើដើរបានច្រើន អត្រាឆាប់ស្លាប់ទាប

ចុចអាន៖យុវវ័យចេញក្រៅញឹក ទៅកន្លែងកកកុញ មកមើលវិធីការពារមនុស្សចាស់ និងក្មេងៗ ពីវីរុសបំប្លែងខ្លួន