សុខភាព

ស្រីៗមានបញ្ហាសុខភាព ៧ មុខនេះ អាចពិបាកមានកូន

បានផុស

៥ years មុន

នៅ

ថ្ងៃចន្ទ ២០ ធ្នូ ២០២១

ដោយ

ក្រៅ ពីរបៀបរស់នៅ បញ្ហាសុខភាពមួយចំនួន ក៏អាចបណ្តាលឲ្យស្រីៗពិបាកមានកូនដែរ។ តើជំងឺណាខ្លះ អាចជះឥទ្ធិពលដល់ការមានគភ៌របស់ស្រ្តី?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមគ្រូពេទ្យជំនាញបានឱ្យដឹងថា លក្ខខណ្ឌសុខភាពមួយចំនួនអាចប៉ះពាល់ដល់ឱកាសនៃការមានផ្ទៃពោះរបស់ស្រីៗ។

១. អូវែបញ្ចេញមេជីវិតញីមិនទៀងទាត់

លក្ខខណ្ឌនេះធ្វើឱ្យស្រីៗមានអាការៈដូចជាក្តៅក្រហល់ក្រហាយ ស្ងួតទ្វារមាស និងរាំងរដូវ ដែលស្រដៀងនឹងការអស់រដូវមុនអាយុ។ គ្រូពេទ្យអាចធ្វើការព្យាបាលដោយចេញវេជ្ជបញ្ជាថ្នាំជំនួយអ័រម៉ូន វីតាមីន D និងកាល់ស្យូម។

២. ជំងឺរលាកអាងត្រគាក

លោកវេជ្ជបណ្ឌិត Corey Burke ឯកទេសសុខភាពបន្តពូជ បានលើកឡើងថា ជំងឺរលាកអាងត្រគាកកើតឡើងនៅពេលស្បូន និងបំពង់ដៃស្បូនឆ្លងរោគដោយសារ របួស កើតជំងឺប្រមេះទឹកបាយ ឬជំងឺប្រមេះទឹកថ្លា។ បន្ទាប់មក បំពង់ដៃស្បូនមានសម្លាក ឬអាប់សែ និងបណ្តាលឱ្យខូចសរីរាង្គបន្តពូជ និងគ្មានកូន។

ប្រសិនបើស្រីៗរលាកអាងត្រគាកអាចមានអាការៈដូចជា ឈឺចាប់ពេលរួមភេទ គ្រុនក្តៅ ឬគ្រុនរងា និងមករដូវច្រើនជាងធម្មតាជាដើម។ ជាទូទៅគ្រូពេទ្យធ្វើការព្យាបាលជំងឺរលាកអាងត្រគាកដោយប្រើថ្នាំផ្សះ។

៣. ក្រពេញទីរ៉ូអ៊ីតអសកម្ម

លោកស្រីវេជ្ជបណ្ឌិត Jolene Brighten ឯកទេសព្យាបាលរោគតាមធម្មជាតិ និងជាអ្នកនិពន្ធសៀវភៅ Beyond the Pill បានលើកឡើងថា ក្រពេញទីរ៉ូអ៊ីតអសកម្មមិនត្រឹមតែអាចធ្វើឱ្យពិបាកក្នុងការមានគភ៌ប៉ុណ្ណោះទេ ថែមទាំងបង្កើនហានិភ័យនៃការរលូតកូនទៀតផង។

៤. ការរលាក

លោកស្រីវេជ្ជបណ្ឌិត Brighten បានបន្ថែមថា ការរលាកក៏អាចធ្វើឱ្យស្រីៗពិបាកពពោះដែរ។ ការធ្វើតេស្ដ C-Reactive Protein (CRP) អាចជួយស្រីៗដឹងថាមានការរលាកឬអត់។ ស្រីៗគួរសាកល្បងញុំាត្រីទឹកជ្រៅដូចជា ត្រីសាល់ម៉ុន (សម្បូរទៅដោយអាស៊ីដខ្លាញ់អូមេហ្គា ៣) និងរមៀត ព្រោះអាហារទាំងនេះអាចជួយប្រឆាំងការរលាក។

៥. ជំងឺគីសលើក្រពេញអូវែ

ជំងឺគីសលើក្រពេញអូវែបណ្តាលឱ្យមានអតុល្យភាពអ័រម៉ូនដែលរំខានដល់សមត្ថភាពអូវែក្នុងការបញ្ចេញមេជីវិតញី ហើយក៏ជាមូលហេតុទូទៅបំផុតដែលធ្វើឱ្យស្រីៗគ្មានកូន។ ជំងឺនេះមានរោគសញ្ញាដូចជា មករដូវមិនទៀង ដុះរោមច្រើនលើមុខ ទ្រូង ខ្នង ឬគូទ ឡើងទម្ងន់ ឡើងមុន និងជ្រុះសក់ជាដើម។

៦. ជំងឺរលាកពោះវៀន

លោកវេជ្ជបណ្ឌិត Joshua Hurwitz ឯកទេសសុខភាពបន្តពូជបានលើកឡើងថា ជំងឺរលាកពោះវៀនដូចជាជំងឺ Crohn (ជំងឺរលាកពោះវៀនធំរុំារ៉ៃ) និងជំងឺរលាកពោះវៀនធំក៏អាចជះឥទ្ធិពលដល់ការមានគភ៌ដែរ។

៧. ជំងឺប្រព័ន្ធភាពសុំា

លោកវេជ្ជបណ្ឌិត Jason Kofinas ឯកទេសសុខភាពបន្តពូជបានលើកឡើងថា ជំងឺប្រព័ន្ធភាពសុំាដូចជា ជំងឺស្រទាប់ស្បូនដុះខុសទីតាំង (endometriosis) ជំងឺទឹកនោមផ្អែម និងជំងឺឈាមកកក្នុងសរសៃឈាមអាចធ្វើឱ្យស្រីៗពិបាកមានកូន និងបង្កើនហានិភ័យរលូតកូន។

ប្រសិនបើស្រីៗមួយចំនួនដែលរៀបការហើយយូរឆ្នាំអត់មានកូន ហើយចង់មានកូនគួរទៅពិនិត្យសុខភាពរកមើលជំងឺដូចខាងលើ៕

អត្ថបទផ្ដល់ដោយ៖ Hello Krupet

ចុចអាន៖អាយុច្រើនទើបមានកូន មិនល្អទេ ឯក្មេងពេករឹតតែជួបបញ្ហាទៀត

ចុចអាន៖បកស្រាយចម្ងល់! បុរស និងស្ត្រីគួរយកកូននៅ វ័យណាល្អ?