កូវីដឥឡូវ ឆ្លងតែ២ថ្ងៃ ចេញរោគសញ្ញាហើយ! (មានវីដេអូ)

ការសិក្សាថ្មីមួយបានរកឃើញថា រោគសញ្ញាកូវីដ១៩ នឹងលេចចេញត្រឹមរយៈពេលតែពីរថ្ងៃប៉ុណ្ណោះ បន្ទាប់ពីការឆ្លងវីរុស ពោលគឺលឿនជាងការគិតពីមុន។

ក្រោមកម្មវិធី Human Challenge Programme, យុវជនដែលមានសុខភាពល្អចំនួន៣៦នាក់ ​ត្រូវបានគេពិសោធន៍ ដោយចម្លងមេរោគកូវីដ១៩នៅមន្ទីរពេទ្យមួយ ក្នុងទីក្រុងឡុងដ៍។

ការសិក្សាបានរកឃើញថា រោគសញ្ញាគឺបានលេចចេញក្នុងរយៈពេលជាមធ្យមត្រឹមតែពីរថ្ងៃប៉ុណ្ណោះ បើប្រៀបធៀបទៅនឹងការប៉ាន់ប្រមាណពីមុនដោយអង្គការសុខភាពពិភពលោក (WHO) ដែលថាមានប្រហែល ៥ទៅ៦ថ្ងៃ។

ការស្រាវជ្រាវដែលគាំទ្រពីរដ្ឋាភិបាលអង់គ្លេស ដឹកនាំដោយសាកលវិទ្យាល័យ Imperial College London គឺមានការចូលរួមពីអ្នកស្ម័គ្រចិត្តអាយុចន្លោះ ១៨ ទៅ ២៩ ឆ្នាំដែលមិនធ្លាប់មានឆ្លងជំងឺកូវីដ១៩ពីមុនមក។

ពួកគេ​ត្រូវ​បានដាក់ឲ្យធ្វើចត្តាឡីស័ក​យ៉ាង​ហោច​ណាស់១៤ថ្ងៃ​នៅ​មន្ទីរពេទ្យ Royal Free ហើយចម្លងមេរោគកូវីដ ជាមួយនឹងដំណក់ទឹកពីច្រមុះក្នុងកម្រិតតិចតួចបំផុត។ ក្នុង​ចំណោម​ក្រុម​នេះ មាន​តែ៥៣ភាគរយ​ប៉ុណ្ណោះ​ដែល​បាន​បន្តវិវត្ត​ជំងឺកូវីដ១៩។

អ្នកជំនាញបានរកឃើញថា ការឆ្លងវីរុសកូវីដ១៩ដំបូង គឺលេចចេញរោគសញ្ញាក្នុងបំពង់ក ហើយបន្ទាប់មក រោគសញ្ញាឈានដល់កម្រិតកំពូលនៅថ្ងៃទី៥ នៅពេលដែលកម្រិតមេរោគកើនឡើងខ្លាំងនៅក្នុងច្រមុះ។

មនុស្សចំនួន១៦នាក់ក្នុងក្រុមនេះ បានវិវត្តរោគសញ្ញាស្រដៀងនឹងជំងឺផ្តាសាយពីកម្រិតស្រាលទៅមធ្យម រួមទាំងការហៀរសំបោរ ឬតឹងច្រមុះ កណ្តាស់ និងឈឺបំពង់ក ប៉ុន្តែគ្មាននរណាម្នាក់ធ្លាក់ខ្លួនឈឺធ្ងន់ធ្ងរនោះទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ខុសគ្នាដាច់! រោគសញ្ញា Delta ចំពោះអ្នកចាក់វ៉ាក់សាំងហើយ និងអ្នកមិនទាន់ចាក់