ផ្លែឈើ ៥ ប្រភេទ ល្អសម្រាប់ខួរក្បាល ហើយក៏សម្បូរលើទីផ្សារ

មិនមែនទាល់តែផ្លែឈើដែលមានតម្លៃថ្លៃ ឬជាប្រភេទផ្លែឈើកម្រទើបសមជាអាហារផ្ដល់អត្ថប្រយោជន៍ដល់សុខភាពខួរក្បាលនោះទេ ពោលផ្លែឈើដែលងាយស្រួលរក និងតម្លៃធូរថ្លៃនៅលើទីផ្សារ ក៏ជាប្រភពអាហារជំនួយដល់សុខភាពខួរក្បាលឲ្យរឹងមាំ និងជួយការពារពីជំងឺបានល្អផងដែរ សំខាន់ឲ្យតែយើងបានញ៉ាំជាប្រចាំ។ ថ្ងៃនេះ Hello គ្រូពេទ្យសូមបង្ហាញផ្លែឈើ៥ប្រភេទ ផ្ដល់អត្ថប្រយោជន៍ដល់សុខភាពយើង ស្ទើរមិននឹកស្មានដល់។

១.ផ្លែប៉េងប៉ោះ

ផ្លែប៉េងប៉ោះជាធម្មតាគេតែងចាត់ទុកថាជាបន្លែសម្រាប់ស្លរ ឆា ប៉ុន្ដែជាក់ស្ដែងវាក៏ជាផ្លែឈើមួយប្រភេទដែរយើងអាចយកមកញ៉ាំឆៅបានដូចផ្លែឈើដទៃទៀត ហើយថែមទាំងផ្ដល់អត្ថប្រយោជន៍ ដល់សុខភាពខួរក្បាលផងដែរ ពិសេសសារធាតុចិញ្ចឹមដែលសម្បូរគឺ Lycopene នេះតែម្ដង។ Lycopene ជា​សារជាតិសំខាន់ជំនួយដល់ខួរក្បាល កាត់បន្ថយបញ្ហាស្ដ្រេសដោយអុកស៊ីតកម្ម ពិសេសជំនួយដល់ចរន្ដឈាមក្នុងខួរក្បាលឲ្យដំណើរការបានល្អ ពោលជួយរំលាយជាតិកូលេស្ដេរ៉ូលដែលកើតមានក្នុងសរសៃឈាមគ្រប់សរីរាងកាយ។

២.ផ្លែត្របែក

យើងមិនអាចមើលរំលងផ្លែឈើមួយប្រភេទនេះបានទេ ព្រោះវាមានសារធាតុចិញ្ចឹមសំខាន់ៗច្រើនដូចជា វីតាមីន A , C, B3, B6 ពពួក carotenoids និង polyphenols ក៏មាននៅក្នុងផ្លែត្របែកនេះដែរ ដូច្នេះហើយទើបមានគុណសម្បត្ដិសម្រាប់សុខភាពខួរក្បាលខ្លាំងយ៉ាងនេះ។

Carotenoids អាចប្រឆាំងទៅនឹងការរលាក និង អុកស៊ីតកម្ម មិនតែប៉ុណ្ណោះក៏ជួយដល់សុខភាពសុខភាពសរសៃឈាមក្នុងរាងឲ្យដំណើរការល្អប្រសើរ។ ចំណែក polyphenols ជួយពង្រឹងដល់ប្រព័ន្ធប្រសាទ ឲ្យកាន់តែរឹងមាំ និងជួយបង្កើនការចងចាំបានល្អ។

៣.ផ្លែចេក

ចេកជាផ្លែឈើដែលសម្បូរជាតិប៉ូតាស្យូមដែលជាសារជាតិសំខាន់មួយជួយដល់សុខភាពបេះដូង និង សរសៃឈាមឲ្យដំណើរការបានល្អ។ ក្រៅពីនោះចេកក៏មានផ្ទុកអាស៊ីតអាមីណូម្យ៉ាងទៀតគឺ Tryptophan ដែលមានសមត្ថភាពជួយឲ្យរាងកាយអាចផលិតប្រូតេអ៊ីនសំខាន់ពីរប្រភេទផ្សេងគ្នា គឺ មេឡាតូនីន និងសេរ៉ូតូនីន។

មេឡាតូនីន មានតួនាទីជួយគ្រប់គ្រងវដ្ដនៃការគេងប្រចាំថ្ងៃ ចំណែកសេរ៉ូតូនីន ជួយគ្រប់គ្រងចំណង់អាហារ សុខភាពផ្លូវភេទ នឹងផ្នែកស្មារតី មិនតែប៉ុណ្ណោះ ក៏ជួយពង្រឹងដល់ប្រព័ន្ធការរាងកាយផងដែរ។

៤.ផ្លែប៊ឺ

គ្នាយើងក៏អាចដឹងបានខ្លះហើយថា ផ្លែប៊ឺគឺជាផ្លែឈើដែលបណ្ដុំទៅដោយវីតាមីន និងជាតិរ៉ែសំខាន់ៗដែលរាងកាយ និង ខួរក្បាលយើងត្រូវការប្រចាំថ្ងៃ ដូចជាពពួក ម៉ាញ៉េស្យូម ប៉ូតាស្យូម វីតាមីន C ពពួកវីតាមីន B និង សំខាន់ជាងគេនោះ គឺអាស៊ីដខ្លាញ់អូមេហ្គា៣តែម្ដង។

អាស៊ីដខ្លាញ់អូមេហ្គា៣មានមុខងារជួយសម្រួលដល់សរសៃឈាមបេះដូង កាត់បន្ថយកូលេស្ដេរ៉ូលអាក្រក់ដែលជាមូលហេតុចំបងបង្កទៅជាជំងឺទាក់ទង​នឹងសរសៃឈាម។ មិនតែប៉ុណ្ណោះ អាស៊ីតខ្លាញ់អូមេហ្គា៣ ក៏អាចជួយការពារពីជំងឺភ្លេចភ្លាំងដែលវិវត្ដតាមវ័យទៀតផង។ បរិមាណផ្លែប៊ឺ ១០០ក្រាម មានផ្ទុក អាស៊ីតខ្លាញ់អូមេហ្គា៣ ២២៣មិល្លីក្រាម។

៥.ផ្លែប៉ោម

ផ្លែប៉ោម ក៏សម្បូរសារជាតិចិញ្ចឹមមិនចាញ់ផ្លែត្របែកខាងលើនោះដែរ។ ផ្លែឈើប្រភេទនេះ ត្រូវបានរកឃើញថា មានផ្ទុកសារជាតិ polyphenol ដែលជាសារជាតិជួយពង្រឹងដល់ប្រព័ន្ធប្រសាទឲ្យកាន់តែរឹងមាំ និងជួយបង្កើនការចងចាំបានល្អ៕

អត្ថបទផ្ដល់ដោយ​៖Hello Krupet

ចុចអាន៖ពពួកផ្លែឈើទាំងនេះមានប្រយោជន៍ដល់សុខភាពបេះដូង

ចុចអានផ្សិតជួយការពារបញ្ហាភ្លេចភ្លាំង និងខួរក្បាលបានយ៉ាងល្អ