សុខភាព

ចេះតែរមាស់ច្រមុះ កើតអាឡ័កស៊ីមែនទេ?

បានផុស

៣ years មុន

នៅ

ថ្ងៃអង្គារ ៦ មិថុនា ២០២៣

ដោយ

យើងធ្លាប់រមាស់ច្រមុះពិតជាដឹងថារំខានប៉ុនណានោះ។ ជាធម្មតា អាការរមាស់ច្រមុះកើនឡើងនៅក្នុងរន្ធច្រមុះដែលអាចមានរយៈពេលប៉ុន្មានវិនាទី ហើយយើងក៏កណ្ដាស់ចេញមក។ប៉ុន្តែមានពេលខ្លះទោះបីជាយើងបានកណ្ដាស់ចេញក៏ពិតមែនតែនៅតែមិនបាត់រមាស់ដដែល។

តើរមាស់ច្រមុះអាចមកពីបញ្ហាអ្វីខ្លះ? បញ្ហានេះអាចបណ្ដាលមកពីវិរុស អាឡ័កស៊ី និងដុះសាច់ច្រមុះជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. វីរុស

រមាស់ច្រមុះអាចបង្កដោយវីរុស ដូចជាវីរុសផ្ដាសាយធម្មតាជាដើម។ ទោះបីជាជំងឺផ្ដាសាយធម្មតាច្រើនកើតនៅរដូវរងារ តែថាយើងនៅតែអាចកើតជំងឺនេះគ្រប់ពេលបានដូចគ្នា។ មនុស្សធំខ្លះអាចកើតមានជំងឺផ្ដាសាយពីពីរទៅបីដងក្នុងមួយឆ្នាំ ហើយបើកូនក្មេងវិញអាចច្រើនជាងនេះផង។

ការរមាស់ច្រមុះ ជាវិធីមួយដែលរាងកាយប្រាប់យើងថាកំពុងតែកើតជំងឺផ្ដាសាយ។ នៅពេលមេរោគឆ្លងចូលក្នុងច្រមុះ និងប្រហោងឆ្អឹងច្រមុះភ្លាម ច្រមុះរបស់យើងព្យាយាមច្រានមេរោគនោះចេញមកក្រៅវិញតាមរយៈសម្បោរ។ ដូចគ្នាដែរ កណ្ដាស់ ជាវិធីមួយទៀត ជួយបណ្ដេញមេរោគចេញពីច្រមុះដែរ ដោយសារតែវាធ្វើឲ្យមានអាការៈរមាស់ច្រមុះ។

២. អាឡ័កស៊ី

អាឡ័កស៊ី កើតឡើងនៅពេលប្រព័ន្ធភាពស៊ាំរបស់រាងកាយយើងឆ្លើយតបទៅនឹងធាតុអ្វីមួយនៅក្នុងបរិស្ថាន។ នៅពេលយើងមានបញ្ហាអាឡ័កស៊ី រាងកាយយើងច្រឡំថាសារធាតុពីខាងក្រៅគឺជាវីរុស ដូចជាច្រឡំថាលម្អងផ្កា ថាជាវីរុសផ្ដាសាយធម្មតាជាដើម ដែលវាអាចធ្វើឲ្យមានរោគសញ្ញាកើតឡើងដូចជាផ្ដាសាយដែរ។ មនុស្សមួយចំនួនមានបញ្ហាអាលែកហ្ស៊ីនឹងសារធាតុនៅក្នុងផ្ទះ និងខាងក្រៅផ្ទះ ដូចជាធូលី រោមសត្វ ឬលម្អងផ្កាឈើជាដើម។

អាឡ័កស៊ីអាចកើតមានតាមរដូវកាល ឬពេញមួយឆ្នាំតែម្ដង។ អាឡ័កស៊ីអាចធ្វើឲ្យមានការរលាកនៅក្នុងច្រមុះ និងធ្វើឲ្យយើងរមាស់ច្រមុះដែរ។

៣. រលាកប្រហោងឆ្អឹងច្រមុះ

ការរលាកប្រហោងឆ្អឹងច្រមុះអាចជាការរលាកស្រួចស្រាល់ និងរលាករ៉ាំរ៉ៃ។ បើសិនជាយើងមានបញ្ហារមាស់ច្រមុះលើសពីមួយសប្ដាហ៍ រួមជាមួយនឹងរោគសញ្ញាផ្សេងទៀត នោះអាចថាមកពីយើងមានបញ្ហារលាកច្រមុះរ៉ាំរ៉ៃ។

ការរលាកច្រមុះរ៉ាំរ៉ៃ គឺជារោគសញ្ញាទូទៅមួយ កើតឡើងដោយសារតែរន្ធច្រមុះរបស់យើងរលាក និងហើម។ បញ្ហានេះ អាចកើតឡើងរហូតដល់១២សប្ដាហ៍ រួមទាំងមានរោគសញ្ញាមួយចំនួនទៀតដូចជា ពិបាកដកដង្ហើមតាមច្រមុះ អស់កម្លាំង និងឈឺនៅជុំវិញភ្នែកជាដើម។

៤. ដុះសាច់ច្រមុះ

ការដុះសាច់ច្រមុះអាចកើតឡើងបាននៅពេលមនុស្សយើងមានបញ្ហារលាកច្រមុះរ៉ាំរ៉ៃ។ ដុំសាច់នេះមិនមែនជាដុំសាច់មហារីកទេ វាមានសភាពទន់ និងទំហំតូច នៅតោងជាប់នឹងជញ្ជាំងប្រហោងច្រមុះ។ ដុំសាច់ច្រមុះ ក៏អាចបង្កឡើងដោយជំងឺហឺត អាឡ័កស៊ី ប្រតិកម្មថ្នាំ និងជំងឺប្រព័ន្ធភាពស៊ាំ។ ពេលដុំសាច់ដុះកាន់តែធំ នឹងធ្វើឲ្យយើងមានអារម្មណ៍រំខាន និងនាំឲ្យពិបាកដកដង្ហើម ឬបាត់បង់ក្លិន។

៥. វិធីដោះស្រាយ

ដើម្បីដោះស្រាយបញ្ហារមាស់ច្រមុះ គ្នាយើងអាចចៀសឆ្ងាយពីសារធាតុបង្កឲ្យយើងរមាស់ច្រមុះដូចជាផ្សេង ទឹកអប់ ឬសារធាតុគីមីផ្សេងៗ។ មួយវិញទៀត បើយើងរមាស់ច្រមុះ នឹងដឹងច្បាស់ថាយើងមានបញ្ហាអាឡ័កស៊ី យើងអាចប្រើថ្នាំមិនត្រូវការវេជ្ជបញ្ជាមួយចំនួនដើម្បីសម្រួលអាការបាន មានទាំងថ្នាំគ្រាប់ ឬស្ព្រៃយ៍បាញ់ច្រមុះ។

អ្វីដែលយើងគួរដឹង គឺមិនគួរប្រឹងញីសសម្បោរញឹកញាប់ពេកនោះទេ ព្រោះថាអាចបង្កឲ្យច្រមុះរងរបួស និងស្ងួត។ ដូចគ្នាដែរ បើយើងឈឺ ការផឹកទឹកបានគ្រប់គ្រាប់នឹងជួយដល់រាងកាយយើងក្នុងការប្រឆាំងនឹងរោគឆ្លង៕