សុខភាព

មន្ទីរពេទ្យគន្ធបុប្ផា សង្គ្រោះជីវិតក្មេងស្រីម្នាក់ កើតជំងឺគ្រុនឈាមកម្រិតធ្ងន់ធ្ងរបំផុត ឲ្យមានជីវិតរស់ឡើងវិញ

បានផុស

៣ years មុន

នៅ

ថ្ងៃចន្ទ ៣១ កក្កដា ២០២៣

ដោយ

ក្មេងស្រី អាយុ ៩ ឆ្នាំ ម្នាក់ ដែលព្យាបាលជំងឺគ្រុនឈាមកម្រិតធ្ងន់ធ្ងរបំផុត នៅគ្លីនិកឯកជនមួយ ក្នុងខេត្តកណ្ដាល ដោយដាក់សេរ៉ូមអស់ ២ លីត្រ មិនប្រសើរ ត្រូវបានឪពុកម្ដាយដឹកយកមកសម្រាកព្យាបាល នៅមន្ទីរពេទ្យគន្ធបុប្ផា រហូតមានជីវិតរស់ឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈផេកហ្វេសប៊ុក Dr.beat Richner បានបង្ហោះព្រឹកនេះ ឲ្យដឹងថា រដូវភ្លៀង រួមគ្នាកម្ចាត់ និងបំបាត់ជម្រកមូសខ្លា ដោយការពារបុត្រធីតា កុំឲ្យមូសខ្លាខាំ។ ជំងឺគ្រុនឈាម អាចវិវត្តយ៉ាងលឿនទៅជាធ្ងន់ធ្ងរ និងអាចសម្លាប់កុមារបាន ក្មេងស្រីនេះ អាយុ ៩ ឆ្នាំ ត្រូវបានព្យាបាលជំងឺគ្រុនឈាម នៅឯគ្លីនិកឯកជនមួយ ក្នុងខេត្តកណ្ដាល ដាក់សេរ៉ូមអស់ ២ លីត្រ ពេលជំងឺធ្ងន់ធ្ងរ ក៏ត្រូវបានឪពុកម្ដាយយកមកសម្រាកព្យាបាលនៅដង្ហើមចុងក្រោយ និងត្រូវបានសង្គ្រោះបន្ទាន់នៅគន្ធបុប្ផា។

ផេកដដែលសរសេរបន្ថែមថា កុមារីខាងលើ មានជំងឺគ្រុនឈាមកម្រិតធ្ងន់ធ្ងរបំផុត (EDS): អស់ជីពចរ (shock syndrome) ១០ ដង ក្នុងរយៈពេល ៤៨ ម៉ោង (10 times repeated cardiovascular collapses-shocks within 48h) នៅក្នុងបន្ទប់សង្គ្រោះបន្ទាន់ នៃមន្ទីរពេទ្យគន្ធបុប្ផា ហើយក្មួយស្រី ត្រូវបានសង្គ្រោះជីវិត ដោយប្រើឈាមប្លាស្មា អស់”១៦ ប្លោក” ថ្ងៃនេះ ក្មួយស្រី មានជីវិតរស់ឡើងវិញហើយ។

ជាមួយនោះ មន្ទីរពេទ្យគន្ធបុប្ផា បានអរគុណ និងកោតសរសើរដល់ក្រុមគ្រូពេទ្យឯកទេសសង្គ្រោះបន្ទាន់ នៃមន្ទីរពេទ្យគន្ធបុប្ផាភ្នំពេញ ដែលសង្គ្រោះជីវិតមួយនេះ។ ហើយរាល់ការព្យាបាលទាំងអស់ គឺ ឥតគិតថ្លៃសម្រាប់គ្រប់ៗ គ្នា ដោយគ្មានការរើសអើង។

ជាចុងក្រោយ មន្ទីរពេទ្យគន្ធបុប្ផា ក៏បានអរគុណដល់មូលនិធិគន្ធបុប្ផាកម្ពុជា និងមូលនិធិគន្ធបុប្ផាស្វីស ព្រមទាំងសប្បុរសជនគ្រប់លំដាប់ថ្នាក់ដែលតែងតែគាំទ្រដំណើរការមន្ទីរពេទ្យគន្ធបុប្ផាផងដែរ៕

អត្ថបទ ៖ ពិសី