សុខភាព

មន្រ្តីជាន់ខ្ពស់សុខាភិបាល បញ្ជាក់ពីស្ថានភាពសុខភាពបុរសឆ្លងជំងឺអុតស្វា

បានផុស

២ years មុន

នៅ

ថ្ងៃចន្ទ ១៨ ធ្នូ ២០២៣

ដោយ

គិតរហូតមកដល់ពេលនេះ ស្ថានភាពសុខភាពបុរសឆ្លងជំងឺអុតស្វា មានភាពល្អប្រសើរហើយ នឹងអាចជាសះស្បើយពីជំងឺនាពេលឆាប់ៗនេះ។ នេះបើតាមការបញ្ជាក់របស់លោក វេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល នៅព្រឹកថ្ងៃទី១៨ធ្នូនេះ។

លោក វេជ្ជបណ្ឌិត បានបន្តថា មកដល់ពេលនេះក្រសួងរកមិនឃើញមានករណីថ្មីទេ ហើយចំពោះប្រភពនៃការចម្លង មន្រ្តីជំនាញកំពុងបន្តធ្វើការអង្គេតស្រាវជ្រាវបន្ថែមទៀត។

ក្រសួងសុខាភិបាលបានប្រកាសរកឃើញករណីជំងឺអុតស្វាលើបុរសអាយុ២៨ឆ្នាំម្នាក់ ដែលមានទីលំនៅក្នុងភូមិប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ ក្រោយពីវិទ្យាស្ថានជាតិសុខភាពសាធារណៈបញ្ជាក់លទ្ធផលតេស្តវិជ្ជមានវីរុសអុតស្វា កាលពីថ្ងៃទី១២ ខែធ្នូ ឆ្នាំ២០២៣។

បុរស កើតជំងឺអុតស្វានេះ ចាប់ផ្ដើមមានរោគសញ្ញា នៅប្រដាប់ភេទ បន្ទាប់មករាលដាលដល់កខាងស្តាំ ថ្ពាល់ កំភួនដៃ និងជើងនៅថ្ងៃទី៣០ ខែវិច្ឆិកា ឆ្នាំ២០២៣ ហើយបានស្វែងរកការពិគ្រោះជំងឺនៅមន្ទីរពេទ្យ និងបញ្ជូនមកធ្វើតេស្តនៅវិទ្យាស្ថានជាតិសុខភាពសាធារណៈ នៅថ្ងៃទី១១ ខែធ្នូ ឆ្នាំ២០២៣។ បន្ទាប់ពីទទួលបានលទ្ធផលវិជ្ជមានវីរុសអុតស្វា អ្នកជំងឺបានដាក់ឱ្យនៅសម្រាកព្យាបាលដាច់ដោយឡែក នៅក្នុងមន្ទីរពេទ្យបានយ៉ាងត្រឹមត្រូវ។

វីរុសអុតស្វា ឆ្លងពីមនុស្សម្នាក់ ទៅមនុស្សម្នាក់ទៀត តាមរយៈការរួមភេទគ្រប់ទម្រង់ ជាមួយអ្នកជំងឺអុតស្វា និងការប៉ះពាល់ដោយផ្ទាល់នឹងកន្លែងមានដំបៅ ទឹកសារពាង្គកាយ ទឹកមាត់ តំណក់តូចៗ តាមផ្លូវដង្ហើម និងសម្ភារៈប្រើប្រាស់ដែលប្រឡាក់ប្រឡូសជាមួយនឹងវីរុស រួមមាន សម្លៀកបំពាក់ ពូក កន្សែង ស្លាបព្រា ចាន កែវទឹក និងសម្ភារៈផ្សេងៗទៀត។

វីរុសអុតស្វា អាចឆ្លងពីម្តាយទៅកូនតាមរយៈទងសុក ក្នុងអំឡុងពេល ឬក្រោយពេលសម្រាល តាមរយៈការប៉ះផ្ទាល់ បើស្ត្រីមានផ្ទៃពោះ ឬឪពុកម្តាយមានជំងឺអុតស្វា។

ក្រសួងសុខាភិបាលបានណែនាំដល់បុគ្គល ដែលមានរោគសញ្ញាដូចជា កន្ទួលរមាស់ជាមួយពងទឹកនៅលើមុខ បាតដៃ ជើង ដងខ្លួន ភ្នែក មាត់ ឬប្រដាប់ភេទ គ្រុនក្តៅ ហើមកូនកណ្តុរ ឈឺក្បាល ឈឺសាច់ដុំ និងឈឺចង្កេះ អស់កម្លាំង ទោះបាន ប៉ះពាល់ផ្ទាល់ជាមួយអ្នកជំងឺអុតស្វា ឬមិនមានប្រវត្តិប៉ះពាល់ជាមួយអ្នកជំងឺអុតស្វា ត្រូវទៅពិគ្រោះ យោបល់ជាមួយមណ្ឌលសុខភាព ឬមន្ទីរពេទ្យ ដើម្បីធ្វើការពិនិត្យ ពិគ្រោះ ឬធ្វើតេស្តរកជំងឺអុតស្វា ឬទូរស័ព្ទមកកាន់លេខ ១១៥ ដើម្បីទទួលបានការណែនាំ និងពិគ្រោះយោបល់៕

អត្ថបទ ៖ សំអឿន