កម្ពុជា សិង្ហបុរី រៀបចំសិក្ខាសាលា “ការគ្រប់គ្រងការប្រើប្រាស់ឱសថប្រឆាំងមេរោគ (AMS)”

នាថ្ងៃទី២២ ខែកុម្ភៈ ឆ្នាំ២០២៤ នេះ សាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានអញ្ជើញចូលរួម ជាគណៈធិបតីក្នុង សិក្ខាសាលារវាងកម្ពុជា និងសិង្ហបុរី ក្រោមប្រធានបទ “ការគ្រប់គ្រងការប្រើប្រាស់ឱសថប្រឆាំងមេរោគ (AMS)”។

សិក្ខាសាលាប្រព្រឹត្តទៅរយៈពេល ២ថ្ងៃ ក្នុងគោលបំណង៖

– បង្កើនការយល់ដឹង និងស្គាល់អំពីភាពស៊ាំនៃឱសថប្រឆាំងមេរោគ (AMR) និងការប្រើប្រាស់ឱសថប្រឆាំងមេរោគ (AMS)។

– ពង្រឹងទំនាក់ទំនង និងកិច្ចសហការក្នុងចំណោមគ្រូពេទ្យ និងអ្នកពាក់ព័ន្ធក្នុងការប្រើប្រាស់ឱសថប្រឆាំងមេរោគ។

– ធ្វើឱ្យប្រសើរឡើងនូវការប្រកាន់ខ្ជាប់តាមគោលការណ៍ណែនាំផ្អែកលើភស្តុតាង និងការអនុវត្តល្អបំផុតសម្រាប់ការចេញវេជ្ជបញ្ជា និងការប្រើប្រាស់ឱសថប្រឆាំងមេរោគនៅក្នុង មន្ទីរពេទ្យ។

– កាត់បន្ថយការប្រើប្រាស់ឱសថប្រឆាំងមេរោគមិនត្រឹមត្រូវ អត្រាភាពស៊ាំ និងផលវិបាក។

– ធ្វើឱ្យប្រសើរឡើងនូវលទ្ធផលព្យាបាល ការពេញចិត្តរបស់អ្នកជំងឺ និងប្រសិទ្ធភាពនៃថ្លៃចំណាយ។

គួរបញ្ជាក់ថា សិក្ខាសាលាមានការចូលរួមពីវាគ្មិនជាតិមកពីមន្ទីរពេទ្យកាល់ម៉ែត និងមន្ទីរពេទ្យកុមារអង្គរ រួមជាមួយនឹងវាគ្មិនអន្ដរជាតិមកពី សាកលវិទ្យាល័យសិង្ហបុរី NUS និង សាកលវិទ្យាល័យ Oxford ក្នុងការបង្ហាញនិងដឹកនាំការពិភាក្សានេះ។ សិក្ខាកាមដែលបានចូលរួមក្នុងសិក្ខាសាលាមានចំនួន ៥០ នាក់មកពីតាមមន្ទីរពេទ្យចំនួន១៧៕