វិធីសាស្ត្រតែមួយគត់! អាចបង្ការខ្លួនពីដំណាក់កាលមហារីកធ្ងន់ធ្ងរមិនអាចព្យាបាលជាសះស្បើយ

ដ្បិតមហារីកជាឃាតករលាក់មុខ មិនបង្ហាញរោគសញ្ញាណាមួយគួរកត់សម្គាល់ក៏ដោយ តែរាល់ដំណាក់កាលវិវត្ត នៃមេរោគមហារីក គឺមានរយៈពេល ១-២ឆ្នាំ ឬ ៣ឆ្នាំ មុននឹងធ្វើឱ្យអ្នកជំងឺឈានដល់ដំណាក់កាលចុងក្រោយ មិនអាចព្យាបាលបាន។ ហេតុនេះ វិធីដ៏ល្អបំផុតសម្រាប់ការបង្ការខ្លួនពីស្ថានភាពធ្ងន់ធ្ងរណាមួយនៃជំងឺមហារីក គឺទាមទារឱ្យមានការយល់ដឹងពីសុខភាព ហើយតាមដាននិងពនិត្យសុខភាពជាប្រចាំ (ល្អបំផុត ២ដងក្នុងឆ្នាំ)។ 

នេះបើតាមសម្រង់សម្តី លោក អ៊ាវ សុខភា សាស្ត្រាចារ្យវេជ្ជបណ្ឌិតឯកទេសជំងឺមហារីក និងឈាម ក្នុងបទសម្ភាសជាមួយកម្ពុជាថ្មី។

ជាមួយគ្នានេះ សាស្ត្រាចារ្យវេជ្ជបណ្ឌិត អ៊ាវ សុខភា ក៏បានលើកឡើងពីលទ្ធភាពរបស់មន្ទីរវេជ្ជសាស្ត្រនៅកម្ពុជា ក្នុងកម្រិតស្តង់ដាមិនចាញ់គ្នាបរទេសឡើយ ខណៈប្រភពដើមនៃឧបករណ៍ទាំងនោះ សុទ្ធសឹងនាំចូលពីប្រទេសទាំងនោះដូចគ្នា ដែលអាចឆ្លើយតបនឹងការពិនិត្យ និងព្យាបាលយ៉ាងមានប្រសិទ្ធភាព។ 

បើតាមលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ថ្លែងក្នុងវេទិកាកម្មវិធី “ផែនការជាតិប្រយុទ្ធនឹងជំងឺមហារីក ២០២៥-២០៣០” ក៏មានការលើកឡើងដូចគ្នាជុំវិញវិធីសាស្ត្រខាងលើនេះផងដែរ។ ជាក់ស្តែង ដើម្បីកាត់បន្ថយបញ្ហាជំងឺមហារីកនៅកម្ពុជា ក្រសួងសុខាភិបាលបានផ្តោតជាចម្បងលើការលើកកម្ពស់ ការបង្ការបឋមនៃជំងឺមហារីក តាមរយៈអន្តរាគមនានារបស់ភ្នាក់ងារមន្ត្រីសុខភាពសាធារណៈ ពិសេសការពិនិត្យ និងស្រាវជ្រាវឱ្យឃើញនូវជំងឺមហារីកដំណាក់កាលដំបូង ដើម្បីធ្វើរោគវិនិច្ឆ័យ និងព្យាបាលឱ្យទាន់ពេលវេលា។​ 

ទាក់ទងនឹងការលើកឡើងខាងលើ សាស្ត្រាចារ្យវេជ្ជបណ្ឌិត អ៊ាវ សុខភា ក៏បានពន្យល់ផងដែរពីវិធីសាស្រ្តនៃការព្យាបាល ជំងឺមហារីក ក៏ដូចជាមូលហេតុចម្បងនៃជំងឺឈានដល់ដំណាក់ចុងក្រោយ ពិសេសជំងឺមហារីកសុដន់-មាត់ស្បូន ដែលឈរនៅលេខរៀងទី១ នៃកត្តាដែលឆក់យកជីវិតស្ត្រីជាច្រើនពាន់នាក់ក្នុងមួយឆ្នាំៗ។

តាមការកត់សម្គាល់របស់លោកសាស្ត្រាចារ្យវេជ្ជបណ្ឌិត ភាគច្រើននៃស្ត្រីវ័យក្រោម ៥០ឆ្នាំ មានការយល់ដឹងច្រើន ទាក់ទងនឹងការតាមដានពិនិត្យសុខភាព ខណៈអាចស្រាវជ្រាវរកឃើញមេរោគមហារីក ធ្វើរោគវិនិច្ឆ័យ និងព្យាបាលទាន់ពេលវេលា។ ដោយឡែក ស្ត្រីវ័យលើសពីនេះដែលទៅទទួលការព្យាបាលជាមួយលោក គឺច្រើនតែនៅដំណាក់កាលទី៣ ឬទី៤ ទៅហើយ។

ហេតុនេះ សាស្ត្រាចារ្យវេជ្ជបណ្ឌិត ពិសេសក្រសួងសុខាភិបាល ក៏បានចេញសារណែនាំពលរដ្ឋឱ្យតាមដានសុខភាពជាប្រចាំ ក៏ព្រោះតែមេរោគមហារីក ជាឃាតករលាក់មុខដែលសម្ងំវិវត្តខ្លួនយ៉ាងស្ងៀមស្ងាត់ក្នុងរាងកាយមនុស្ស មិនបង្ហាញជារោគសញ្ញាគួរសម្គាល់ឡើយ រហូតដល់ដំណាក់កាលហួសពេលនឹងព្យាបាល។

គួររំលឹកថា ជារៀងរាល់ឆ្នាំ កម្ពុជាកើតមានករណីជំងឺមហារីកប្រមាណជា ២មុឺនករណី ដោយមានអ្នកស្លាប់ប្រមាណជាជិត ១មុឺន៤ពាន់នាក់/ឆ្នាំ ពោលគឺ​រៀងរាល់ ៤០នាទីម្ដង មានពលរដ្ឋខ្មែរម្នាក់ស្លាប់ដោយសារជំងឺមហារីក (៣០នាក់ក្នុងមួយថ្ងៃ) ខណៈសោកនាដកម្មនេះ ក៏កើតមានលើកុមារផងដែរ។ ក្នុងចំណោម ២ម៉ឺនករណីនោះ ហានិភ័យនៃជំងឺមហារីកច្រើនជាងគេគឺ មហារីកសុដន់-មាត់ស្បូន ៕

អត្ថបទពាក់ព័ន្ធ៖ មន្ទីរពេទ្យធំ ៣ នៅកម្ពុជា ឯកទេសព្យាបាលជំងឺមហារីក​