ម៉ោង ៨ យប់នេះ អ្នកនិពន្ធ ម៉ីសន សុធារី សម្ពោធចេញភាគមួយ នៃប្រលោមលោកថ្មី «ទំនុកភ្លេងស្នេហ៍»

ប្រលោមលោក «ទំនុកភ្លេងស្នេហ៍» ជាស្នាដៃរបស់អ្នកនិពន្ធ ម៉ីសន សុធារី នឹងសម្ពោធចេញភាគទីមួយក្នុងយប់នេះ ​នៅលើវេបសាយឌីជីថល​ របស់អ្នកនិពន្ធផ្ទាល់តែម្ដង។

យ៉ាងណាមិញ សាច់រឿងស្នេហាដ៏អន្លង់អន្លោចនេះ អ្នកនិពន្ធធ្លាប់បានឃោសនាជាង ៨ ខែមកហើយ នៅលើវេបសាយ​ឌីជីថល។ ខណៈអ្នកនិពន្ធបានប្រកាសថា នឹងចេញភាគមួយនាយប់នេះ។

«ទំនុកភ្លេងស្នេហ៍» ជាប្រលោមលោកបែបយុវវ័យ​ ​បរិយាយ​អំពីវ័យជំទង់ឬក្មេងៗ ដែលប្រាថ្នាកសាង​កេរ្តិ៍ឈ្មោះ​ក្នុង​ពិភព​ចម្រៀង​និង​ដូរ​តន្ត្រី។ ក្នុង​នោះ​កញ្ញា អង្គ លក្ខិណា ជាតួឯកស្រី ជាមួយ​ចរិតលក្ខណៈជាអ្នកស្រលាញ់ការតែងនិពន្ធ ទាំង ទំនុកភ្លេង និងទំនុកច្រៀង ដោយបានជួយ​ជ្រោមជ្រែងតួប្រុស លោក សក្តាវណ្ណ​ ឲ្យ​ល្បីល្បាញ ប៉ុន្តែក្រោយមកពួកគេបាន​បែកបាក់​គ្នា ដោយសារ​ហេតុផល​ជាច្រើន ។

ដោយឡែក អ្នកនិពន្ធ ម៉ីសន សុធារី ក៏បាន​មាន​ប្រសាសន៍​ថា យុវវ័យនិង​អ្នកដែល​កំពុង​ស្ថិត​ក្នុង​វិស័យ​សិល្បៈ នឹង​រៀន​សូត្រ​បាន​ច្រើន ​ពី​ប្រលោមលោកមួយ​នេះ មិនខុសពីរឿង «ស្រទន់មន្តស្នេហ៍» ឡើយ។

គួរ​បញ្ជាក់​ថា ប្រលោមលោកចុងក្រោយរបស់​អ្នកនិពន្ធរូបនេះ «ថ្ងៃចាស់​វិលវិញ» និង ​រឿង «ថ្ងៃណាមួយ» កំពុង​តែ​មាន​ប្រជាប្រិយភាព​ខ្លាំង ​ក្នុងចំណោមសិស្សានុសិស្ស ដោយសារ​អត្ថន័យអប់រំ​ជីវិតជាច្រើនជំពូក បង្កប់ក្នុងសង្វាក់រឿង។

អ្នកនិពន្ធក៏រំពឹងថា យុវវ័យ នឹងចំណាយពេល​អានប្រលោមលោកអប់រំចិត្ត ឲ្យ​មានសន្ទុះ យ៉ាង​ហោច​ណាស់ ​ស្មើ​ទៅ​នឹង​រឿង​ប្រភេទ ភ័យ​រន្ធត់​ឬ​ស្នេហា ស្រើបស្រាល ៕

អត្ថបទ៖ សាង ស្រីល័ក្ខ

ចុចអាន៖៣ ចំណុចធំៗ ក្នុងប្រលោមលោក «ថ្ងៃណាមួយ»ដែលអ្នកនិពន្ធខំជម្នះសម្រិតសម្រាំងឡើង

ចុចអាន៖សំណុំរឿងសុភាប្រុស “បន្ទប់ពិសោធន៍ L-34” កំពុងនាំអ្នកអានទៅបំបែកក្ដីបែបរន្ធត់ម្ដងទៀត

ចុចអាន៖អ្នកស្រី ម៉ីសន សុធារី បង្ហើប ៥ ចំណុចសម្គាល់ថា បុគ្គលនោះអាចក្លាយជាអ្នកនិពន្ធអាជីពបាន