រឿងសំខាន់ៗ ៥ យ៉ាងគួរដឹងមុនចិញ្ចឹមសត្វ Sugar Glider

Sugar Glider ជាសត្វតូចម្យ៉ាងមានរូបរាងស្រដៀងកំប្រុកបន្តិចកណ្ដុរបន្តិច អ្វីដែលពិសេសគឺវាចេះហោះ ប៉ុន្តែអត់មានស្លាបដូចបក្សីទេ បើចង់ស្គាល់ច្បាស់សូមក្រឡេកមើលរូបនេះសិន។

អ្នកប្រហែលជាចាប់អារម្មណ៍ចង់ចិញ្ចឹមវា ហើយព្រោះវាតូចមិនគ្រោះថ្នាក់និងគួរឲ្យស្រឡាញ់ណាស់ ដូច្នេះមុននឹងទិញមកចិញ្ចឹមអ្នកគប្បីអានអត្ថបទនេះឲ្យចប់សឹមសម្រេចចិត្ត៖

១. ពួកវារំខានអ្នកនៅពេលយប់ណាស់

Sugar Gliders គឺជាសត្វរកស៊ីយប់ ចំណែកឯពេលថ្ងៃវាចូលចិត្តដេកក្នុងសម្បុកដ៏ងងឹងរបស់វា ដូច្នេះយប់ឡើងវាប្រាកដជាមករំខានម្ចាស់ជាទីស្រឡាញ់របស់វាហើយ។

២. ពួកវាត្រូវការអ្នកកំដររហូត

អ្នកមិនគួរចិញ្ចឹមតែមួយក្បាលទេ យ៉ាងហោចណាស់ត្រូវចិញ្ចឹមឲ្យបានពីរក្បាលទើបល្អ ព្រោះ Sugar Glider ឯកាងាយនឹងកើតជំងឺផ្លូវចិត្តណាស់។

៣. មិនគួរឲ្យលេងជាមួយក្មេងៗ

Sugar Gliders មានខ្លួនតូចងាយរងរបួសនិងត្រូវការអាហារស្រស់ៗមានកម្រិតប្រូតេអ៉ីនត្រឹមត្រូវ អ្នកមិនអាចបណ្ដោយឲ្យកូនៗរបស់អ្នកចិញ្ចឹមសត្វនេះទេ។

៤. ពិបាកធ្វើជម្រកសប្បនិម្មិតឲ្យវានៅ

ពេលស្វែងរកទ្រុងឲ្យពួកវា ត្រូវជ្រើសរើសទ្រុងឲ្យសមស្របទៅនឹងតម្រូវការនិងអាយុ Sugar Glider របស់អ្នកដូចតទៅ៖ សត្វតូចត្រូវការទ្រុងតូចដើម្បីមានភាពកក់ក្ដៅ ដល់ពេលវាធំកាលណា អ្នកត្រូវពង្រីកទ្រុងដើម្បីឲ្យវាហក់ចុះហក់ឡើងទោះបីជាវាមានខ្លួនតូចមែនតែឆ្លាតៗណាស់ ដូច្នេះពេលទំនេរកុំភ្លេចយកវាចេញទៅខាងក្រៅទ្រុងឲ្យផ្សងព្រេងផង។

៥. វាជាសត្វខុសច្បាប់នៅក្នុងប្រទេសភាគច្រើន

Sugar Gliders ជាសត្វកម្រនិងមិនស្របច្បាប់សម្រាប់ចិញ្ចឹមគ្រប់ប្រទេសនោះទេ មុននឹងយកទៅចិញ្ចឹមសូមប្រុងប្រយ័ត្ននិងស្រាវជ្រាវឲ្យបានច្បាស់សិនជៀសវាងនាំបញ្ហាដាក់ខ្លួន។

សូមរំលឹកដែរថា Sugar Gliders ជាសត្វទន់ខ្សោយងាយឈឺងាយស្លាប់ដោយសារជំងឺផ្លូវចិត្ត ហើយក៏អាចផ្ដល់ការស្រឡាញ់យ៉ាងកក់ក្ដៅដល់ម្ចាស់ដែរ បើសិនអ្នកចិញ្ចឹមវាបានល្អ៕

ប្រែសម្រួលដោយ៖ វារី

ចុចអាន៖ អាកប្បកិរិយាសត្វឆ្កែ ១៣ ចំណុច ម្ចាស់គួរដឹង