ព្រះនាង ៦ អង្គក្នុងភាពយន្ត​របស់​ Disney ​បានបង្រៀនរឿង ៦ យ៉ាងដល់អ្នកទស្សនា

គ្រប់ភាពយន្ត សុទ្ធតែមាន​បង្កប់ខ្លឹមអប់រំយ៉ាងហោចក៏មួយដែរ សម្រាប់ទស្សនិកយកទៅពិចារណា។ ស្របពេលនេះ ក្នុងអត្ថបទខាងក្រោមនឹងលើកយកភាពយន្តគំនូរជីវចលចំនួន ៦ ល្បីៗរបស់ Disney សម្រាប់ហ្វេនៗទុករៀនសូត្រ។

តំបន់សុវត្ថិភាព (Comfort zone) មិនមែនសុទ្ធតែល្អ

ក្ដីសុខមនុស្ស មិនមែនមានន័យថា ត្រូវតែរស់នៅក្នុងវិមានស្កឹមស្កៃ ឬទីស្រណុកនោះទេ។ ជួនកាលជីវិតទាល់តែមានឧបសគ្គខ្លះ​ និងត្រូវហ៊ានឈានជើងចេញ comfort zone ទើបហៅថាថាជីវិតពេញលេញ។  ដូចគ្នាទៅនឹង តួអង្គ រ៉ាផេនហ្សល ដែលមិនធ្លាប់ប្រាថ្នារស់នៅតែលើប៉មខ្ពស់ដូច្នោះដែរ។ ​នាងតែងតែព្យាយាមចេញពីទីនោះម្ដងជាពីរដង រហូតអាចរកឃើញកន្លែងអស្ចារ្យមួយ ជាងទីឋានរបស់នាងធ្លាប់អាស្រ័យ។

សេចក្តីសប្បុរស គឺជាថាមពល

យើងគ្រប់គ្នាមានបេះដូង ដែលជាទ្រព្យដ៏ល្អបំផុតមួយប្រចាំខ្លួន។ ដូច្នេះកុំស្ទាក់ស្ទើរក្នុងការចែកចាយអ្វីល្អៗនៅក្នុងបេះដូងនេះទៅកាន់អ្នកដទៃ។ មិនខុសអីពី ព្រះនាងព្រិលស ដែលតែងតែធ្វើល្អដាក់មនុស្សតឿទាំង ៧ នោះឡើយ។

គ្រាន់តែមានក្តីសុបិនមិនទាន់គ្រប់គ្រាន់ទេ

ចង់បានអ្វីមួយមែនទេ? កុំអង្គុយរង់ចាំឱ្យវាក្លាយជាការពិត! ក្រោកឡើង ហើយធ្វើឱ្យវាកើតឡើង។ មនុស្សតែម្នាក់គត់ដែលអាចប្រែក្លាយក្តីសុបិន្តរបស់យើងឱ្យក្លាយជាការពិត គឺយើង។ នេះជាគម្រូរបស់ព្រះ ទីអាណា ដែលគ្រប់គ្នាអាចរៀនបាន។

កុំឲ្យអ្នកដទៃកំណត់វាសនាយើង

ពេលខ្លះយើងមានអារម្មណ៍ថា រឿងរ៉ាវរបស់ខ្លួនត្រូវបានសរសេរដោយនរណាម្នាក់ ហើយគំនិតយើងក៏ស្វ័យប្រវត្តិជឿលើព្រហ្មខិត ឬផ្ដេកផ្ដួលតាមពាក្យគេថា។ គ្រប់គ្នាជាម្ចាស់លើវាសនាខ្លួនឯង កុំអនុញ្ញាតឲ្យគេកំណត់វាសម្រាប់យើងឲ្យសោះ។ មេរៀនយើងអាចរៀនសូត្រពី វីរៈនារី មូឡាន។

បន្តរៀនសូត្រ

មិនថាយើងរស់នៅទីណាទេ ទោះបីក្នុងសមុទ្រឬលើគោក ការស្វែងយល់រៀនសូត្រពីអ្នកដទៃ មិនអាចបោះបង់ចោលឡើយ។ សួរបើឆ្ងល់! ចម្លើយប្រាកដជាមាន ដែលនេះហើយជាឱកាសរីកចម្រើនសម្រាប់មនុស្ស។ ជាក់ស្ដែងព្រះនាង អេរៀល ជាមច្ឆាសមុទ្រ តែទ្រង់ចេះដឹងពីរបៀបរស់នៅរបស់មនុស្សលើលោកគោកច្បាស់។

គ្រប់គ្នាមានភាពពិសេសនៅក្នុងខ្លួន

យើងទាំងអស់គ្នាសុទ្ធតែមានសមត្ថភាពអស្ចារ្យម្យ៉ាងម្នាក់។ យើងជាមនុស្សដែលអាចធ្វើរឿងជាច្រើនដែលនឹកស្មានមិនដល់ សំខាន់នោះគឺ យើងបានហាត់ពត់និងប្រើវាបែបណាប៉ុណ្ណោះ។  នៅក្នុងរឿង Sleeping and Beauty ទោះបីព្រះនាង អារ៉ូរ៉ា រស់នៅជាមួយសត្វព្រៃក៏ពិតមែន តែទ្រង់អាចសន្ទនានិងមានទំនាក់ទំនងជាមួយពួកវាបានយ៉ាងល្អ។ នេះហើយជាអ្វីដែលគួរសិក្សាយល់ថា យើងក៏អាចបង្កើតសម្ព័ន្ធភាពជាមួយសត្វបានដែរ៕

ប្រែសម្រួល៖ សន្យា

ប្រភព៖ OH MY DISNEY

ចុចអាន៖ មេរៀនដ៏មានតម្លៃពីភាពយន្តរឿង Frozen សម្រាប់កូនៗលោកអ្នក

ចុចអាន៖ អ្នកជំនាញសុខភាព​ផ្លូវចិត្ត​ ហាមយើង​មិនឱ្យ​ទស្សនា​រឿងបែបរន្ធត់មួយចំនួននេះ​ម្នាក់ឯង​