ចាប់ផ្តើមរស់នៅក្នុងជីវិតដែលជំរុញសុបិនខ្លួនឯងផ្ទាល់ឱ្យទៅជាការពិត

កំពុងមានអារម្មណ៍មិនល្អអំពីខ្លួនឯង អំពីលទ្ធផល អំពីជីវិត អំពីដំណើ់រការប្រចាំថ្ងៃ? ចង់​រស់នៅមានសេរីភាពក្នុងជីវិតដែលធ្វើតាមក្តីសុបិនទាំង​កំពុង​តែ​មានអារម្មណ៍ថាមិនអាច?

មិនថាមានអាជីពអ្វី កំពុង​ធ្វើអ្វី នៅកន្លែងធ្វើការឬនៅសាលាក្តី​ ប្រសិន​បើសង្កេត​ឃើញថា នៅមានអារម្មណ៍​មួយបន្ទោស​ខ្លួនឯងអំពីរឿងមិនល្អគ្រប់គ្រាន់ ឬមិនអាចមាន​ឱកាស​ល្អដូចគេ​ដទៃ យើង​ប្រហែល​ស្ថិតក្នុងគំនិត​ខាងក្រោមនេះ​យូរពេក៖

១ គំនិត​ថា ខ្លួនឯងជាមនុស្សម្នាក់ដែលមិនអាចមានលទ្ធភាពឬរកបានឱកាស​ដូចគេ

២ មិនសមនឹងទទួលបានជោគជ័យនៅក្នុងវិស័យណាក្តី ទាំង​វិជ្ជាជីវៈនិងស្នេហា​​គ្រួសារ​។ល។

៣ តាមរកការងារធ្វើយូរហើយ នៅតែមិនប៉ះចំមេដឹកនាំល្អ មិនត្រូវ​ជំនាញ មិនចំក្រុមហ៊ុនល្អ​?

ជាញឹកញាប់យើង​ត្រូវបានបាក់ទឹកចិត្តដោយសារគំនិត​ខ្លួនឯង។ គំនិត​បន្ទាបខ្លួនពេក ​មោទកភាពជ្រុលពេក សុទ្ធតែនាំទៅរកជំងឺបាក់ទឹកចិត្តបាន នេះមិនមែនជារឿងចម្លែកទេ។

មនុស្ស​ជាច្រើនក្រោយវិបត្តិសេដ្ឋកិច្ច​ដោយជំងឺ​រាតត្បាត​បាន​ជាប់គាំងទៅក្នុងការ​ប្រទាញ​ថយក្រោយ ដែលមនុស្ស​ពូកែៗ​គង់តែលំបាក​ចុះទម្រាំយើង​ដែលមាន​ស្ថានភាពផ្លូវចិត្ត​មិនរឹងមាំ?

១ គំនិត​ថា ខ្លួនឯងជាមនុស្សម្នាក់ដែលមិនអាចមានលទ្ធភាពឬរកបានឱកាស​ដូចគេ

មនុស្ស​ទាំងអស់កើតមកសុទ្ធតែមាន​គេស្រលាញ់​ ចុះហេតុអ្វីមាន​មនុស្សឯកោ? ព្រោះថា​គេរើសដែរ មិនមែន​អ្នកណាមកស្រលាញ់ក៏ព្រមព្រៀងគ្នាបានភ្លាមទេ! ចុះតើយើងរើសគេ គេមិនមានសិទ្ធិរើសយើងវិញ? រឿងនេះបានបន្តជាបញ្ហា​ជាច្រើននៅលើ​លោកយើងនេះដែលធ្វើឱ្យមនុស្ស​សឹងមួយផែនដីមាន​រឿងមិនសប្បាយចិត្ត​ជានិច្ច ។ ក្រៅពីឧទាហរណ៍អំពីស្រលាញ់ គឺការងារ​បុគ្គលខ្លះមាន​សមត្ថភាពកម្រិត​«គ» ចង់បានតួនាទីកម្រិត «ក» ហើយ​យល់ថា​អ្នកដែលកំពុង​នៅទីនោះ មិនគ្រាន់បើជាងខ្លួនទេ រហូតដល់ការ​បន្ទោស​នេះ​បន្តរហូតមក។ ថ្ងៃមួយគេអស់សង្ឃឹមនឹងជីវិត​ដោយសារការបន្លាចនិងបន្ទោស​របស់ខ្លួនគេទៅលើដំណើរការ​នៃជីវិតខ្លួនឯងដែលមិនសមបំណង​ ។ ជានិច្ចកាលមនុស្ស​យើង​តែងតែ​ចង់បានលើស នេះមិនមែនជាកំហុសទេ យើង​អាចមាន​ក្តីសុបិន កាន់តែធំ​កាន់តែល្អ​ តែត្រូវ​ប្រាកដថា វាជាគ្រឿងជំរុញទឹកចិត្ត ពុំមែន​មក​បំផ្លាញទឹកចិត្ត​ឡើយ។​ ប្រសិនមាន​សុបិនជាមួយការច្រណែន គឺជារឿងបំផ្លាញខ្លួនឯង​តែបើយកតម្រាប់តាម ដើម្បីតស៊ូឱ្យថ្ងៃណាមួយ​ទទួលបាន​ជោគជ័យជាសុបិន​ដែលគួរតែ​ដើរតាម។ ​

២ មិនដែល​ទទួលបានជោគជ័យនៅក្នុងវិស័យណាក្តី ទាំង​វិជ្ជាជីវៈនិងស្នេហា​​គ្រួសារ​។ល។

នេះបានន័យ​ថា អ្វីៗដែលយើង​បានប្រព្រឹត្តិកន្លងមក ទំនងជាមិនត្រូវកន្លែងណាមួយ ​បានជាគ្រប់យ៉ាង​បរាជ័យ។ មនុស្ស​ម្នាក់ៗត្រូវមាន​ឆន្ទះកែតម្រូវខ្លួនឯង​មិនមែន​នៅអង្គុយត្អូញត្អែរ​បន្ទោស បង្អាប់​រង់ចាំ ​ឱ្យជីវិត​កែប្រែដើម្បីយើង​ទេ គឺយើងដែលត្រូវកែប្រែខ្លួនឯងដើម្បីជីវិត។ ទម្លាប់របស់មនុស្សដែលមានការគោរពខ្លួនឯងខ្ពស់ មាន​យុទ្ធសាស្ត្រនិងលំហាត់ល្អពេញដោយវិន័យ ឱហាត ចាប់ផ្តើម​ជំហាននីមួយៗពីការ «ផ្លាស់ប្តូរ»។

ត្រូវ​រៀន​ចង់បានអ្វីៗ​ដែលបានមកក្រោយ​ការ​តស៊ូជាក់ស្តែងនិងស្ថិតស្ថេរ​ក្នុងរយៈពេលវែងឆ្ងាយ កុំចង់បានអ្វីៗមកងាយៗ ផ្លូវកាត់ៗ តាម​ខ្សែញាក់ម្តងម្កាល ព្រោះនោះអ្នកណាក៏នឹងធ្វើបាន គ្មានអ្វីពិសេសទេ។ ជោគជ័យ​នៃមនុស្ស​ម្នាក់ៗ គេបាន​ចំណាយពេលច្រើនឆ្នាំដើម្បីសាងឡើង  ហើយ​ដែលគេរក្សាបានស្ថិតស្ថេរព្រោះនៅទីបញ្ចប់នៃការ​តស៊ូពុំមែន​លទ្ធផល​ទេ ​ប៉ុន្តែជាបទពិសោធន៍ ជា​ឧបករណ៍ផ្លូវចិត្តផ្ទាល់ខ្លួនរឹងមាំដែលត្រូវបាន​សន្សំ​ដុសខាត់ដើម្បីរក្សាការគោរពខ្លួនឯងនិងឱ្យតម្លៃ​ខ្លួនឯងបន្តទៅមុខទៀតវែងឆ្ងាយមិនថា មានអ្វីកំពុងកើតឡើង។

សូម្បីតែប្រឈមមុខនឹងការបដិសេធឬភាពអវិជ្ជមានពីមនុស្សផ្សេងទៀតក៏សឹងគ្មានអ្វីអាចមកធ្វើការផ្លាស់ប្តូរយើងបានដែរ។

៣ តាមរកការងារធ្វើយូរហើយ នៅតែមិនប៉ះចំមេដឹកនាំល្អ មិនត្រូវ​ជំនាញ មិនចំក្រុមហ៊ុនល្អ​?

ធ្វើឱ្យខ្លួន​ឯងមាន​អារម្មណ៍ធូរស្រាលសិន​សឹម​បន្តទៀត ព្រោះប្រសិនយើងកំពុងមាន​គំនិតមួយនេះ បានន័យ​ថាយើងកំពុង​មានបញ្ហា​លើគោលដៅនិងទិសដៅហើយ។

រយៈពេលសម្រាក ចូររកនិយមន័យសិនថា ដូចម្តេចហៅថា ក្រុមហ៊ុនល្អ និងមេដឹកនាំល្អ?
ព្យាយាមឆ្លើយសំណួរទាំងនេះឱ្យបាន ហើយឈប់គិតថា មេដឹកនាំល្អ ទាល់តែមាន​លក្ខខណ្ឌល្អជាមួយ​យើង ចូរ​លាតត្រដាងនូវស្នូលនៃវិជ្ជាជីវៈខ្លួនវិញ យើងបានធ្វើកម្រិតណានៅកន្លែងធ្វើការ យើងជាបុគ្គលបែបណា​សមត្ថភាព​កម្រិតណា? ការផ្លាស់ប្តូរទៅរកវិជ្ជមាន​គឺជាការគោរពខ្លួនឯង ការចង្អុលកំហុសអ្នកផ្សេងឱ្យមកទទួលខុសត្រូវ​លើបរាជ័យនៃយើងជាអំពើកំសាកនិងមិនរីកចម្រើន​។
ឈប់ទាញខ្លួនប្រៀបធៀបទៅនឹងមនុស្សផ្សេងទៀតឬជីវិតរបស់ពួកគេដោយ​រៀនក្លាយជាមនុស្សដែលអាចនិយាយថាទេ នឹង​អ្វីដែលមិនសម ហើយ​ឆ្លើយថា​ បាទឬចាស់ នឹង​អ្វី​ដែលត្រឹមត្រូវ។
ជំនួសឱ្យការទន្ទឹង​រង់ចាំ​ភាពល្អឥតខ្ចោះ ចូរ​បង្កើត​ទម្លាប់ថ្មី​ដែលចេះរីករាយ និង​ចំណុច​ល្អក្នុងស្ថានការណ៍មិនឥតខ្ចោះ​ដើម្បីឱ្យ​មានសុខភាពផ្លូវចិត្ត​ល្អនិងរីករាយជាងមុនដែលនឹងជួយឱ្យសម្រេចបានផលការងារ​កាន់តែច្រើន ចំណែក​ភាពតានតឹងនិងការថប់បារម្ភថយតិចទៅៗ៕

ប្រែសម្រួល៖ សុភា

ប្រភព៖ premium

ចុចអាន៖ ហេតុអ្វី​បាន​ជា​គុណ​តម្លៃ​នៃ​ការងារ ​គឺ​ជា​កត្តា​ចាំបាច់​ដើម្បី​បំពេញ​ន័យ​ឲ្យ​អាជីព?

ចុចអាន៖ បរាជ័យអាជីវកម្ម? មានវិធីកែខៃព្រោះគ្រប់គ្នានៅសល់ពេលច្រើនទៀតដើម្បីបង្កើតជោគជ័យ