​​គូស្នេហ៍​ម្ចាស់​​ហាងតែគជ់នៅចិន ក្លាយជាមហាសេដ្ឋីប្រាក់លាន ​ក្រោយ​ប្រឡូក​ផ្សារហ៊ុន​ឡើង​ថ្លៃ​

ប្ដីប្រពន្ធពីររូបមានឈ្មោះ Shan Weijun និង Zhou Rongrong ដែលគេស្គាល់យ៉ាងច្បាស់ថា ជាស្ថាបនិកនៃសង្វាក់តែគជ់ចិនក្រោមស្លាកយីហោ Auntea Jenny បានក្លាយជាមហាសេដ្ឋីដែលមានទ្រព្យសម្បត្តិសរុបចំនួន ១.៧ ពាន់លានដុល្លារអាមេរិក បន្ទាប់ពី​​ការ​បោះផ្សាយមូលបត្រ​​ (IPO) របស់ផ្សារ​ហ៊ុនហុងកុងកើនឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រាយការណ៍ដោយសារព័ត៌មាន South China Morning Post បានចុះផ្សាយថា ក្រុមហ៊ុនដែលមានមូលដ្ឋាននៅទីក្រុងសៀងហៃ បានធ្វើការជួញដូរដំបូងរបស់ខ្លួននៅក្នុងទីក្រុងហុងកុង កាលពីថ្ងៃព្រហស្បតិ៍ ដោយបានបង្កើនចំនួន ២៧៣ លានដុល្លារហុងកុង (៣៥ លានដុល្លារអាមេរិក) ដោយផ្តល់ភាគហ៊ុនចំនួន ២.៤ លានដុល្លារ នៅតម្លៃ ១១៣.១២ ក្នុងមួយ​ដុំ​ ដែលជាតម្លៃខ្ពស់បំផុតនៃជួរតម្លៃរបស់វា។ ភាគហ៊ុនបានកើនឡើងនៅពេលបើក និងបញ្ចប់វគ្គជួញដូរពេលព្រឹក ឡើងរហូត​​ដល់ ៥២.៨% នៅ ១៧២,៨០ ដុល្លារហុងកុង។

​ការ​បោះផ្សាយ​មូលបត្រ (IPO) បានជំរុញឲ្យលោក Shan Weijun និងប្រពន្ធរបស់គាត់ក្លាយជាមហាសេដ្ឋី ដោយទ្រព្យសម្បត្តិរបស់ពួកគេបានកើតចេញពីភាគហ៊ុនរបស់ពួកគេទាំងស្រុងនៅក្នុងហាងតែគជ់ Auntea នេះបើយោងតាមសន្ទស្សន៍មហាសេដ្ឋី Bloomberg ។ ជាពិសេស គូស្នេហ៍មួយគូនេះស្ថិតក្នុងចំណោមសហគ្រិនចិនកាន់តែច្រើនឡើងៗ ដែលជាការរីកដុះដាលនៃតែ ដែលទើបផលិតថ្មីៗ ដូចជាអ្នកដែលនៅពីក្រោយខ្សែសង្វាក់តែ Chagee និង Mixue ជាដើម។

តែទឹកដោះគោ Chagee បានផ្សព្វផ្សាយជាសាធារណៈនៅលើសន្ទស្សន៍ទីផ្សារភាគហ៊ុន Nasdaq កាលពីខែមុន ដោយធ្វើឲ្យស្ថាបនិកវ័យ ៣០ ឆ្នាំគឺលោក Junjie Zhang ជាមហាសេដ្ឋីដែលមានទ្រព្យសម្បត្តិសុទ្ធចំនួន ២.១ ពាន់លានដុល្លារ។

ស្រដៀងគ្នានេះដែរ បងប្អូនប្រុសពីរនាក់ដែលនៅពីក្រោយហាងតែ, កាហ្វេ និងការ៉េមនៃខ្សែសង្វាក់ Mixue ទទួលបានទ្រព្យសម្បត្តិសរុបចំនួន ៨ ពាន់លានដុល្លារចាប់តាំងពីការបោះផ្សាយ IPO របស់ក្រុមហ៊ុនហុងកុង កាលពីដើមឆ្នាំនេះ។

យោងតាមសារព័ត៌មាន Bloomberg មុនពេលធ្វើឲ្យមានភាពសម្បូរបែបជាមួយនឹងភេសជ្ជៈដ៏ពេញនិយម គូស្នេហ៍មួយគូនេះ ពីមុនមកគឺជាអ្នកគ្រប់គ្រងផ្នែកលក់ជាន់ខ្ពស់នៅ Amway ប្រទេសចិន ដែលជាអ្នកលក់រាយផលិតផលថែទាំសុខភាព ។ ពួកគេបានបើកដំណើរការហាង Auntea Jenny ដំបូងនៅទីក្រុងសៀងហៃក្នុងឆ្នាំ ២០១៣ ដែលត្រូវបានបំផុសគំនិតដោយម៉ាកតែដែលពួកគេបានឃើញក្នុងអំឡុងពេលដំណើរកម្សាន្តនៅតៃវ៉ាន់ កាលពីដើមឆ្នាំដដែលនោះ។

ចាប់តាំងពីពេលនោះមក វាបានរីកចម្រើនទៅជាខ្សែសង្វាក់តែដែលផលិតថ្មីៗធំជាងគេទីបួនរបស់ប្រទេសចិន ជាមួយនឹងហាងជាង ៩,១០០នៅក្នុងទីក្រុងជាង ៣០០នៅចុងឆ្នាំមុន ដែលស្ទើរតែទាំងអស់ដំណើរការដោយអ្នកទទួលសិទ្ធិផ្តាច់មុខ។

លើសពីនេះ នៅក្រៅប្រទេស ក្រុមហ៊ុននេះដំណើរការហាងចំនួន ៣០ នៅក្នុងប្រទេសម៉ាឡេស៊ី ហើយមានបំណងបង្កើនចំនួននោះដល់ ១០០ នៅឆ្នាំនេះ។ វាក៏មានគម្រោងបើកហាងទំនើបដំបូងរបស់ខ្លួន នៅទីក្រុងញូវយ៉កនៅសប្តាហ៍ក្រោយ ហើយទីបំផុតពង្រីកទៅអូស្ត្រាលី កូរ៉េខាងត្បូង និងអឺរ៉ុប៕

អត្ថបទ៖ សាង ស្រីល័ក្ខ

ចុចអាន៖បុគ្គល​ល្បី​នៅ​ហូលីវូដ១០រូប មានទ្រព្យសម្បត្តិប្រៀបប្រដូចមហាសេដ្ឋីក្នុង​ឆ្នាំ​២០២៥​