គណៈកម្មការសម្រាំងបានបេក្ខជន ៣ ០២៤ នាក់ ដើម្បីចូលធ្វើគ្រូបង្រៀនផ្អែកលើកិច្ចព្រមព្រៀងការងារ ខណៈតម្រូវការមាន៣,២១៣នាក់

ឆ្លងកាត់ការប្រឡងប្រជែងដែលឈរលើគោលការណ៍ «គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព»  និងការធ្វើកំណែកិច្ចការ បូកសរុបពិន្ទុយ៉ាងល្អិតល្អន់ នៅយប់ថ្ងៃទី២៨ ខែតុលា  គណៈកម្មការរៀបចំការប្រឡងជ្រើសរើសសម្រិតសម្រាំងបានបេក្ខជនចំនួន ៣ ០២៤នាក់ជាប់ជាស្ថាពរ ក្នុងចំណោមបេក្ខជនប្រឡងជិត៩ពាន់នាក់ ឱ្យចូលបម្រើការងារជាគ្រូបង្រៀនផ្អែកលើកិច្ចព្រមព្រៀងការងារ។

ក្នុងចំណោមបេក្ខជនដែលជាប់ជាស្ថាពរចំនួន៣០២៤នាក់​ គឺមានខេត្តព្រៃវែងចំនួន ៨៩៣នាក់,ខេត្តត្បូងឃ្មុំចំនួន ៦១០នាក់,ខេត្តកំពង់ចាមចំនួន ៥១៣នាក់,ខេត្តបាត់ដំបងចំនួន ៥៧៩នាក់ និងតាកែវចំនួន ៤២៩នាក់។ ការប្រឡងជ្រើសរើសនេះ គឺសម្រាប់គ្រូបង្រៀនកម្រិតបឋម នឹងចូលបង្រៀនតាមគ្រឹះស្ថានបឋមសិក្សាសាធារណៈនៅខេត្តគោលដៅចំនួន៥ដូចជា ខេត្ត បាត់ដំបង,ព្រៃវែង,ត្បូងឃ្មុំ,តាកែវ និងខេត្តកំពង់ចាម។

ថ្លែងមកកាន់អ្នកសារព័ត៌មាន បណ្ឌិតសភាចារ្យ ណាត ប៊ុនរឿន រដ្ឋលេខាធិការ ក្រសួងអប់រំ យុវជន និងកីឡា បញ្ជាក់ថា សម្រាប់បេក្ខជនដែលប្រឡងជាប់ ត្រូវមកជ្រើសរើសប៉ុស្តិ៍សម្រាប់បំពេញការងារ ក្នុងករណីមិនបានមករើសប៉ុស្តិ៍តាមការជូនដំណឹងរបស់គណៈកម្មការជ្រើសរើសការប្រឡងទេ នោះនឹងត្រូវចាត់ទុកថា បេក្ខជននោះបានបោះបង់ប៉ុស្តិ៍ការងារ។

បណ្ឌិតសភាចារ្យ  ក៏បានអះអាងថា ការប្រឡងជ្រើសរើសគ្រូបង្រៀនផ្អែកលើកិច្ចព្រមព្រៀងការងារលើកទី១នេះ គឺអាចចាត់ទុកថាជាការដកបទពិសោធន៍ សម្រាប់ជំហានបន្ទាប់ទៀត។

ការប្រឡងប្រជែងជ្រើសរើសគ្រូបង្រៀនផ្អែកលើកិច្ចព្រមព្រៀងការងារ ឱ្យចូលបម្រើការងារនៅតាមគ្រឹះស្ថានបឋមសិក្សាសាធារណៈ ធ្វើឡើងក្នុងគោលបំណងចូលរួមលើកស្ទួយគុណភាពវិស័យអប់រំនៅកម្ពុជា និងចូលរួមកាត់បន្ថយការលើស និងខ្វះគ្រូក្នុងតំបន់មួយចំនួន ជាមួយនឹងតម្រូវការគ្រូបង្រៀនចំនួន៣,២១៣នាក់។

គួរឱ្យដឹងថា ការប្រឡងប្រជែងជ្រើសរើសគ្រូបង្រៀនផ្អែកលើកិច្ចព្រមព្រៀងការងារ ឱ្យចូលបម្រើការងារនៅតាមគ្រឹះស្ថានបឋមសិក្សាសាធារណៈ បានចាប់ផ្តើមកាលពីរសៀលថ្ងៃទី២៥ ខែតុលា ឆ្នាំ២០២៥ ចាប់ពីម៉ោង ១២៖៣០នាទីរសៀល ដល់ម៉ោង ៦៖៣០នាទីល្ងាច ដោយមានបេក្ខជនប្រឡងជិត ៩០០០នាក់ ចូលរួមប្រឡងនៅ មណ្ឌលប្រឡងចំនួន៣ គឺមណ្ឌលប្រឡងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច, មណ្ឌលប្រឡងវិទ្យាស្ថានជាតិអប់រំ, និងមណ្ឌលប្រឡងសាកលវិទ្យាល័យជាតិគ្រប់គ្រង។

ការ​ជ្រើសរើសគ្រូបង្រៀនផ្អែកលើកិច្ចព្រមព្រៀងការងារ គឺផ្ដល់​ឱកាស​ដល់បេក្ខជន​ដែលមាន​អាយុ​ចាប់ពី ១៨ឆ្នាំឡើង និងមានសញ្ញាបត្រចាប់ពីកម្រិតបរិញ្ញាបត្រគ្រប់ជំនាញ។ ចំពោះលក្ខខណ្ឌ បេក្ខជនត្រូវជ្រើសរើសឃុំ-សង្កាត់ដែលមាន តម្រូវការគ្រូបង្រៀន។ ​បេក្ខជនជាប់ស្ថាពរ នឹងត្រូវចាត់ឱ្យទៅបំពេញការងារនៅសាលាបឋមសិក្សាក្នុងភូមិសាស្ត្រឃុំ-សង្កាត់ គោលដៅ។ ដោយ​ឡែក បេក្ខជនជាប់បម្រុងអាចត្រូវជ្រើសរើសដើម្បីបំពេញកន្លែងទំនេរ ឬទៅបង្រៀននៅសាលាបឋមសិក្សាដែលមានតម្រូវការគ្រូបង្រៀននៅតាមភូមិសាស្ត្រផ្សេងៗក្នុងប្រទេស និងផ្អែកលើគោលការណ៍ស្ម័គ្រចិត្ត៕

ដោយ៖ ង៉ិល ណារ៉ាត់