ចាប់ពីពេលនេះ ទៅជុំវិញផ្សារបឹងព្រលិតលែងលិចលង់ហើយ ក្រោយអាជ្ញាធរសាងសង់លូថ្មី

ភ្នំពេញ៖ ជុំវិញបរិវេណផ្សារបឹងព្រលឹត ដែលតែងតែរងការលិចលង់រាល់រដូវវស្សាជាង២០ឆ្នាំមកហើយ នោះអាចបញ្ចប់នូវការលិចលង់ជាស្ថាពរចាប់ពីពេលនេះតទៅ បន្ទាប់ពីអាជ្ញាធរចាប់ផ្តើមដាក់ប្រពន្ធ័លូបង្ហូរទឹកថ្មី ហើយចាក់ផ្លូវបំពេញបន្ថែមឲ្យខ្ពស់ផុតពីទឹក។

តាមប្រភពពីលោក ស្លៃម៉ាន អលវី អនុប្រធានភូមិអូរអណ្តូង១បានឲ្យដឹងនៅថ្ងៃទី១៥ខែវិច្ឆិកានេះថា នៅជុំវិញបរិវេណផ្សារបឹងព្រលឹតនិងទីតាំងមួយចំនួនដែលស្ថិតនៅភូមិអូរអណ្តូង១សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ត្រូវបានអាជ្ញាធរបើកការដ្ឋានជីកដាក់លូបង្ហូរទឹកព្រមទាំងចាក់ក្រាលថ្មម៉ិចបន្ថែមឲ្យបានខ្ពស់ហើយសង្ឃឹមថាលែងលិចលង់ទៀតហើយ។

លោក អលវី អនុប្រធានភូមិអូរអណ្តូង១ បានបន្តថាការបើកការដ្ឋានជីកដាក់លូ និងផ្លូវនេះ បានធ្វើឡើងនៅថ្ងៃទី១០ខែវិច្ឆិកា ដោយមុខលូទំហ៊ុំ៧តឹក ដែលលូចាស់មានអាយុកាលជាង២០ឆ្នាំមកនោះ។

យោងតាមប្រសាសន៍លោក ចេង មុន្នីរ៉ា អតីតអភិបាលខណ្ឌច្បារអំពៅ បានបញ្ជាក់ថា នឹងខិតខំប្រឹងប្រែងរាយការណ៍ទៅសាលារាជធានីភ្នំពេញដើម្បីសាងសង់ផ្លូវនិងប្រពន្ធ័លូបង្ហូរទឹកជុំវិញបរិវេណផ្សារបឹងព្រលិតនិងតំបន់មួយចំនួនក្នុងភូមិអណ្តូង១សង្កាត់ព្រែកប្រា ដែលធ្លាប់តែរងការលិចលង់ដោយទឹកជំនន់រៀងរាល់រដូវវស្សាកន្លងមក៕

ដោយ៖ នរា