សមត្ថកិច្ចរកឃើញទីតាំងអាជីវកម្មរ៉ែមាសខុសច្បាប់៧កន្លែង នៅក្នុងខេត្តមណ្ឌលគិរី

កម្លាំងសមត្ថកិច្ចចម្រុះ សហការជាមួយមន្រ្តីជំនាញនៃមន្ទីររ៉ែ និងថាមពលខេត្តមណ្ឌលគិរី ចុះប្រតិបត្តិការបង្ក្រាបទីតាំងធ្វើអាជីវកម្មរ៉ែមាសខុសច្បាប់ ៧ កន្លែង និងបានអំពាវនាវពលរដ្ឋកុំធ្វើអាជីវកម្មនេះដោយពុំមានច្បាប់អនុញ្ញាត ព្រោះប៉ះពាល់សម្បត្តិធនធានរ៉ែធម្មជាតិ និងបរិស្ថាន។

តាមការចុះត្រួតពិនិត្យជាក់ស្តែង ក្រុមការងារបានរកឃើញមានស្លាកស្នាមលួចកិនកាកសំណល់រ៉ែខុស ច្បាប់ចំនួន ៧ទីតាំង ដែលបានរកឃើញឧបករណ៍ ទីតាំងកិនកាកសំណល់រ៉ែ  ម៉ាស៊ីនគោយន្ត និងត្បាល់កិនរ៉ែ ។ យ៉ាងណាមិញ ប្រតិបត្តិការបង្ក្រាបនេះ ពុំបានជួបម្ចាស់ទីតាំងនោះទេ។ នេះបើយោងតាមរបាយការណ៍របស់មន្ត្រីជំនាញមន្ទីររ៉ែនិងថាមពល ខេត្តមណ្ឌលគិរី។

ការចុះត្រួតពិនិត្យសកម្មភាពលួចធ្វើអាជីវកម្មរ៉ែមាសខុសច្បាប់ ស្ថិតនៅតំបន់មេសំ ភូមិពូទុង និងភូមិពូហ្នឹង ឃុំចុងផ្លាស់ ស្រុកកែវសីមា ខេត្តមណ្ឌលគិរី  កាលពីថ្ងៃទី១៧ខែវិច្ឆិកាឆ្នាំ២០២៥ ដោយ មន្ទីររ៉ែ និងថាមពល បានចូលរួមសហការជាមួយអាជ្ញាធរមូលដ្ឋានឃុំចុងផ្លាស់ កម្លាំងអាវុធហត្ថស្នាក់ការ សន្តិសុខ៧៦៤ និងកម្លាំងប៉ុស្តិ៍រដ្ឋបាលឃុំចុងផ្លាស់ ។

តាមការពិនិត្យជាក់ស្តែង ក្រុមការងារសន្និដ្ឋានថាទីតាំងទាំងនោះបានលួចធ្វើសកម្ម​ភាពកិនកាកសំណល់រ៉ែ ប៉ុន្តែត្រូវបានរុះរើសម្ភារៈដែលបម្រើឱ្យប្រតិបត្តិការរុករករ៉ែចេញពីទីតាំងមុនសមត្ថកិច្ចចុះទៅដល់។

ជាមួយគ្នានេះ មន្រ្តីបានណែនាំដល់ប្រជាពលរដ្ឋក្នុងតំបន់នេះ បញ្ឈប់សកម្មភាពកិនរ៉ែមាសអនាធិបតេយ្យដោយពុំមានលិខិតអនុញ្ញាត ព្រោះអាចប្រឈមុខផ្លួវច្បាប់៕

អត្ថបទ៖ រៀម សុខហេង