ព័ត៌មានជាតិ

អភិបាលរាជធានី ដឹកនាំគណៈប្រតិភូ គោរពវិញ្ញាណក្ខន្ធវីរយុទ្ធជនដែលបានពលីជីវិតលើសមរភូមិប្រយុទ្ធការពារបូរណភាពទឹកដី

បានផុស

៧ ខែ មុន

នៅ

ថ្ងៃព្រហស្បតិ៍ ១១ ធ្នូ ២០២៥

ដោយ

នៅថ្ងៃទី ១១ ខែធ្នូ ឆ្នាំ ២០២៥ នេះ លោក ឃួង ស្រេង អភិបាលរាជធានីភ្នំពេញ បានដឹកនាំគណៈប្រតិភូរដ្ឋបាលរាជធានីភ្នំពេញ អញ្ជើញគោរពវិញ្ញាណក្ខន្ធ សព លោកព្រឹន្ទបាលឯក សៅ វីរៈដារ៉ា យោធិន នៅកងពលធំអន្តរាគមន៍លេខ ៣ នៃកងទ័ពជើងគោក ដែលបានពលីជីវិតដ៏អង់អាចក្លាហាន នៅលើសមរភូមិប្រយុទ្ធការពារបូរណភាពទឹកដី ដែនអធិបតេយ្យជាតិ និងខ្សែបន្ទាត់ព្រំដែន ពីទង្វើឈ្លានពានយ៉ាងគឃ្លើនរបស់កងកម្លាំងប្រដាប់អាវុធថៃ កាលពីថ្ងៃទី ៩ ខែធ្នូ ឆ្នាំ ២០២៥ នាវត្តចាក់អង្រែលើ សង្កាត់ចាក់អង្រែលើ ខណ្ឌមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកព្រឹន្ទបាលឯក សៅ វីរៈដារ៉ា បានពលីជីវិតដ៏អង់អាចក្លាហាន ក្នុងជន្មាយុ ២៧ ឆ្នាំ លើសមរភូមិប្រយុទ្ធការពារបូរណភាពទឹកដី ដែនអធិបតេយ្យជាតិ និងខ្សែបន្ទាត់ព្រំដែន ពីទង្វើឈ្លានពានយ៉ាងគឃ្លើនរបស់កងកម្លាំងប្រដាប់អាវុធថៃ កាលពីថ្ងៃទី ៩ ខែធ្នូ ឆ្នាំ ២០២៥។ មរណភាពរបស់ លោកព្រឹន្ទបាលឯក សៅ វីរៈដារ៉ា គឺជាការបាត់បង់ដ៏ធំធេងនូវស្វាមី ជាឪពុកបង្កើត ជាបងប្រុស និងញាតិមិត្ត នៃក្រុមគ្រួសារ ប្រកបទៅដោយសង្គហធម៌ និងព្រហ្មវិហារធម៌ ហើយក៏ជាការបាត់បង់នូវឥស្សរជនយោធាជួរមុខស្នេហាជាតិដ៏ឆ្នើមមួយរូប ដែលមានគុណូបការៈដ៏ធំធេង ក្នុងការវាយប្រយុទ្ធនៅលើសមរភូមិ ពីខ្មាំងសត្រូវសៀមឈ្លានពាន ដើម្បីការពារជាតិមាតុភូមិជាទីស្នេហា។ វីរភាពដ៏អង់អាចក្លាហាន និង ពលិកម្មដ៏ធំធេងរបស់ លោកព្រឹន្ទបាលឯក សៅ វីរៈដារ៉ា គឺជាមហាកិត្តិយសដ៏ឧត្តុង្គឧត្តមសម្រាប់ ជាតិ សាសនា ព្រះមហាក្សត្រ ដែលយើងទាំងអស់គ្នា រួមទាំងប្រជាពលរដ្ឋខ្មែរគ្រប់មជ្ឈដ្ឋាន សូមកត់ត្រា និងចងចាំទុក នូវគុណូបការៈដ៏ធំធេងនេះ។

ស្ថិតក្នុងក្ដីវិយោគដ៏សែនសោកសង្រេងនេះ លោក ឃួង ស្រេង សូមចូលរួមរំលែកទុក្ខដ៏ក្រៀមក្រំ និងដោយសេចក្តីសង្វេគជាទីបំផុត និងសូមឧទ្ទិសបួងសួងដល់ដួងវិញ្ញាណក្ខន្ធរបស់ លោកព្រឹន្ទបាលឯក សៅ វីរៈដារ៉ា សូមបានចាប់បដិសន្ធិក្នុងសុគតិភពគ្រប់ៗ ជាតិ កុំបីឃ្លៀងឃ្លាតឡើយ។ ក្នុងនោះ លោក ឃួង ស្រេង បាននាំយកនូវថវិកាចំនួន ១០ លានរៀល ចូលរួមបុណ្យដល់ក្រុមគ្រួសារសពលោកព្រឹន្ទបាលឯក សៅ វីរៈដារ៉ា ផងដែរ៕

អត្ថបទ ៖ ស្រីរ័ត្ន