ព័ត៌មានជាតិ

អំណោយមនុស្សធម៌ជាច្រើនមុខ ស្មើនឹង ៩ ឡានធំ បានបញ្ជូនទៅទិសខេត្តព្រះវិហារ ដើម្បីចែកជូនវីរកងទ័ពជួរមុខ និងជនភៀសសឹក

បានផុស

៧ ខែ មុន

នៅ

ថ្ងៃអង្គារ ១៦ ធ្នូ ២០២៥

ដោយ

អំណោយមនុស្សធម៌ជាច្រើនមុខ ត្រូវបានរដ្ឋបាលរាជធានីភ្នំពេញ រៀបចំវេចខ្ចប់ ដឹកជញ្ជូនមកគោលដៅ សមរភូមិជួរមុខ ទិសខេត្តព្រះវិហារ ចាប់តាំងពីថ្ងៃទី ១៣ ធ្នូ រហូតដល់ព្រឹកថ្ងៃអង្គារ ទី ១៦ ខែធ្នូ ឆ្នាំ ២០២៥ នេះ ជាបន្តបន្ទាប់ ចំនួន ៩ រថយន្តធំ និងតូច រួចហើយ ក្រោយពីផ្ទុះការឈ្លានពានជាថ្មីដោយយោធាថៃ ចូលមកក្នុងដែនអធិបតេយ្យភាពកម្ពុជា ជាលើកទី ២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលរាជធានីភ្នំពេញ ក្រោមការដឹកនាំរបស់ លោក ឃួង ស្រេង អភិបាលរាជធានីភ្នំពេញ បានរៀបចំចាត់ចែងដឹកជញ្ជូនគ្រឿងឧបភោគ បរិភោគ សម្ភារប្រើប្រាស់ចាំបាច់ជាច្រើនមុខ មកកាន់គោលដៅខេត្តព្រះវិហារជាបន្តបន្ទាប់។

លោក ឯក ឃុនដឿន អភិបាលរងរាជធានីភ្នំពេញជាតំណាងដ៏ខ្ពង់ខ្ពស់លោក ឃួង ស្រេង បានប្រគល់អំណោយមនុស្សធម៌របស់សប្បុរសជនតាមរយៈរដ្ឋបាលរាជធានីភ្នំពេញ ជូនដល់រដ្ឋបាលខេត្តព្រះវិហារ ដឹកនាំដោយលោក គីម រិទ្ធី អភិបាលខេត្តព្រះវិហារ នៅសាលាខេត្តព្រះវិហារ។

ក្នុងពិធីនោះ លោក គីម រិទ្ធី បានថ្លែងអំណរគុណដ៏ជ្រាលជ្រៅជូនចំពោះលោក ឃួង ស្រេង និងក្រុមការងាររបស់សាលារាជធានីភ្នំពេញទាំងអស់ ដែលតែងតែបានខិតខំខ្នះខ្នែងកៀរគរស្វែងរកមូលនិធិពីសប្បុរសជន មានប្រជាពលរដ្ឋ មន្ត្រីរាជការ ក្រុមហ៊ុនឯកជននានា បានចូលរួមបរិច្ចាគធនធានផ្ទាល់ខ្លួនតាមលទ្ធភាពរៀងៗ ខ្លួន ជាមួយរដ្ឋបាលរាជធានីភ្នំពេញ ដើម្បីជួយគាំទ្រដល់ពួកគាត់នៅសមរភូមិជួរមុខ ក៏ជារដ្ឋបាលខេត្តព្រះវិហារគ្រប់កាលៈទេសៈ។

លោកអភិបាលខេត្តព្រះវិហារ បានបន្ថែមថា អំណោយស្បៀងអាហារ និងសម្ភារប្រើប្រាស់ចាំបាច់នានា របស់រដ្ឋបាលរាជធានីភ្នំពេញ ជួយមករដ្ឋបាលខេត្តព្រះវិហារ ក៏ដូចជាវីរកងទ័ពជួរមុខ ពិតជាមានសារសំខាន់ និងមានតម្លៃខ្លាំងណាស់ ខណៈយុទ្ធជនរបស់យើង បាននិងកំពុងជាប់ដៃប្រយុទ្ធតតាំងជាមួយសត្រូវសៀមឈ្លានពានទឹកដីកម្ពុជា បង្កឲ្យបាត់បង់អាយុជីវិតប្រជាពលរដ្ឋស្លូតត្រង់ ខូចខាតយ៉ាងធ្ងន់ធ្ងរនូវប្រព័ន្ធហេដ្ឋារចនាសម្ព័ន្ធ សម្បត្តិបេតិកភណ្ឌមនុស្សជាតិ ប្រាសាទបុរាណខ្មែរ វត្ត សាលារៀន មន្ទីរពេទ្យ សំណងអគារ ផ្ទះ ស្ពានថ្នល់ជាដើម។

លោក ឯក ឃុនឌឿន ក្នុងឱកាសនោះ បាននាំមកនូវការសាកសួរសុខទុក្ខពីសំណាក់ លោក ឃួង ស្រេង សូមវីរកងទ័ពជួរមុខទាំងអស់ជឿទុកចិត្តលើប្រមុខរាជរដ្ឋាភិបាល ក្រោមការដឹកនាំដ៏វៃឆ្លាតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា។

ក្នុងនាមអ្នកសមរភូមិក្រោយ យើងនៅឆ្ងាយតែរូបកាយប៉ុណ្ណោះ តែបេះដូង ឆន្ទៈមនសិការ ទឹកចិត្ត ស្មារតី នៅជាប់ជាមួយវីរកងទ័ពយើងជាដរាប ដោយមិនបោះបង់បងប្អូនចោលឡើយ។ ជាក់ស្តែងកម្លាំងមហាសាមគ្គី នៃមហាគ្រួសារខ្មែរនៅទូទាំងប្រទេស និយាយជារួម និងដោយឡែក នៅរាជធានីភ្នំពេញ ប្រជាពលរដ្ឋគ្រប់ស្រទាប់វណ្ណៈ បាននាំគ្នាមកបរិច្ចាគថវិកា និងគ្រឿងឧបភោគ បរិភោគ សម្ភារប្រើប្រាស់ចាំបាច់តាមធនធានរៀងៗ ខ្លួន ចម្រុះមុខ ចាប់តាំងពីរដ្ឋបាលរាជធានីចេញសេចក្តីអំពាវនាវរួចមក។ រដ្ឋបាលរាជធានី បានចាត់ចែងវេចខ្ចប់ដឹកជញ្ជូនយកទៅប្រគល់ជូនជាបន្តបន្ទាប់តាមគោលដៅដែលត្រូវការជំនួយសង្គ្រោះបន្ទាន់ជាចាំបាច់។

លោក ឯក ឃុនឌឿន ក៏បានគោរពជូនពរ និងអរគុណវីរកងទ័ព សូមឈ្នះមាសត្រូវគ្រប់សមរភូមិប្រយុទ្ធ ហើយបន្តឈរជើងយ៉ាងរឹងមាំ វាយបណ្ដេញចោរសៀមឈ្លានពានទឹកដីកម្ពុជា ក្នុងបុព្វហេតុការពារជាតិ មាតុភូមិ ការពារប្រជាពលរដ្ឋ ខណៈចោរសៀមកំពុងចូលមកឈ្លានពាន លើដែនអធិបតេយ្យភាពកម្ពុជា ដោយពួកគេបានប្រើអស់គ្រប់មធ្យោបាយ ក្នុងគោលបំណងបំផ្លិចបំផ្លាញយ៉ាងធ្ងន់ធ្ងរមកលើដែនអធិបតេយ្យភាព និងហេដ្ឋារចនាសម្ព័ន្ធនានារបស់កម្ពុជា មានដូចជា ៖ ហេដ្ឋារចនាសម្ព័ន្ធគមនាគមន៍ សម្បត្តិបេតិកភណ្ឌមនុស្សជាតិ ប្រាសាទបុរាណ វត្ត សាលារៀន មន្ទីរពេទ្យ អគារ ផ្ទះ ស្ពាន ថ្នល់ និងអាយុជីវិតប្រជាពលរដ្ឋស្លូតត្រង់កម្ពុជា។

រដ្ឋបាលខេត្តព្រះវិហារ បានឲ្យដឹងថា គិតត្រឹមថ្ងៃច័ន្ទទី ១៥ ខែធ្នូ ឆ្នាំ ២០២៥ មានជំរំជនភៀសសឹកនៅទូទាំងខេត្តមានចំនួន ១៣ ទីតាំង មានប្រជាពលរដ្ឋភៀសសឹកកំពុងស្នាក់នៅសរុបចំនួន ១០,៦៧២ គ្រួសារ ស្មើ ៣៤២៤៦ នាក់ ស្រី ១៨២២១ នាក់។

គួរជម្រាបថា អំណោយដែលរដ្ឋបាលរាជធានីភ្នំពេញទទួលបានពីសប្បុរសជន ហើយបាននាំយកមកប្រគល់ជូនរដ្ឋបាលខេត្តព្រះវិហារ នាពេលនេះដូចជា ៖ ថវិកា ត្រីខ មី ទឹកបរិសុទ្ធ អង្ក អំបុក ត្រីងៀត ទឹកត្រី ទឹកស៊ីអ៊ីវ ស្ពៃក្តោប ប្រេងឆា ខ្សែចងមួក កន្ទេល នំក្រៀម ឆ្នាំង ភួយ ទឹកផ្លែឈើ និងទឹកក្រូច ក្រមា អាវជជុះ និងថ្នាំពេទ្យជាដើម៕

អត្ថបទ ៖ ស្រីរ័ត្ន