ឆ្នាំ ២០២៥ ខេត្ត​ស្ទឹងត្រែង​​ទទួល​​ទេសចរ​​មក​កម្សាន្ត​​ជាង ៥០ ម៉ឺន​នាក់កើន​ឡើង ៨៨% ធៀប​ឆ្នាំ​​២០២៤ ​

ក្នុង​ឆ្នាំ ២០២៥ ខេត្ត​ស្ទឹងត្រែង​ទទួល​បាន​កំណើន​ទេសចរ​មក​កម្សាន្ត​ជាង ៥០ ម៉ឺន​នាក់ ដែល​ធៀប​ឆ្នាំ ២០២៤ កើន​ឡើង​ប្រមាណ ៨៨%។ នេះ​បើ​តាម​របាយការណ៍​បូក​សរុប​លទ្ធផល​ការងារ​របស់​រដ្ឋបាល​ខេត្ត​ស្ទឹងត្រែង​កាល​ពី​ពេល​ថ្មីៗ​នេះ។

ក្នុង​របាយការណ៍​បូក​សរុប​លទ្ធផល​ការងារ​ឆ្នាំ២០២៥ និង​លើក​ទិសដៅ​ការងារនៅ​ឆ្នាំ ២០២៦ បង្ហាញ​ថា ក្នុង​ឆ្នាំ ២០២៥ ខេត្ត​ស្ទឹងត្រែង​​ទទួល​បាន​ភ្ញៀវ​ទេសចរ​ជាតិ និង​អន្តរជាតិ​សរុប​ចំនួន ៤៧០ ២៦៣ នាក់ ធៀប​នឹង​ឆ្នាំ២០២៤ កើន​ឡើង ២២០ ៦៦៣ នាក់ ស្មើ ៨៨%។ ក្នុង​នោះ​ភ្ញៀវ​ទេសចរ​ស្នាក់​នៅ​ក្នុង​ខេត្ត​មាន​ចំនួន ៨៩ ៧៩០ នាក់។

ស្ថិតនៅ​ភូមិភាគ​ឦសាន ខេត្ត​ស្ទឹងត្រែង​មាន​លក្ខណៈ​ភូមិសាស្ត្រ​ជាប់​ជាមួយ​ប្រទេស​ឡាវមាន​ដង​ទន្លេ​ចំនួន ៤ ហូរកាត់​។ ខេត្ត​ស្ទឹងត្រែង​មាន​សក្ដានុពល​ខ្ពស់​ចំពោះវិស័យ​ទេសចរណ៍ ពិសេស​សត្វ​ផ្សោត​មេគង្គ​ដែល​ជា​ប្រភេទ​ថនិកសត្វ​ដ៏​កម្រ​នៅ​ក្នុង​ពិភពលោក ​ដែល​បាន​ទាក់ទាញ​ការ​ចាប់​អារម្មណ៍​ពីសំណាក់​ភ្ញៀវ​ជាតិនិង​អន្តរជាតិ​មក​ទស្សនា​។ ផលិតផល​ទេសចរណ៍​ខេត្តស្ទឹងត្រែងភាគច្រើន​ពឹងផ្អែក​លើ​វប្បធម៌-ធម្មជាតិ និង​កសិទេសចរណ៍។

បើតាម​មន្ទីរទេសចរណ៍ខេត្តស្ទឹងត្រែង តំបន់​ទេសចរណ៍​នៅក្នុង​ខេត្ត​ស្ទឹងត្រែង​មាន​ជិត ២០ កន្លែង​មាន​​ទាំង​​ប្រវត្តិសាស្រ្ត ធម្មជាតិ និងកែច្នៃដូចជា៖

១/ តំបន់សក្ដានុពលទេសចរណ៍ក្នុងក្រុងនិងជុំវិញ (សាសនា វប្បធម៌ ប្រវត្តិសាស្ត្រ)

-រមណីយដ្ឋានភ្នំព្រះធាតុ
-រមណីយដ្ឋានប្រាសាទព្រះគោ
-រមណីយដ្ឋានអណ្ដូងបុរាណ/ប្រាសាទគូរ

២/ តំបន់សក្ដានុពលទេសចរណ៍ធម្មជាតិ និងសហគមន៍ទេសចរណ៍់

-សហគមន៍អេកូទេសចរណ៍បូរីអូរស្វាយ
-សហគមន៍អេកូទេសចរណ៍កោះព្រះ
-សហគមន៍អេកូទេសចរណ៍សម្រស់កោះហាន
-សហគមន៍អេកូទេសចរណ៍ភ្នំជម្រកសត្វ
-សហគមន៍អេកូទេសចរណ៍ព្រះរំកិល
-សហគមន៍​អេកូទេសចរណ៍​អូរឫស្សី​កណ្តាល
-រមណីយដ្ឋានជួរវែង (អូរម្រះ)
-រមណីយដ្ឋានអូរឫស្សីកណ្តាល
-រមណីយដ្ឋានទេសចរណ៍ចម្ការក្រូច
-រមណីយដ្ឋានទេសចរណ៍កោះខ្សាច់សេកុង

៣/ តំបន់សក្ដានុពលទេសចរណ៍តាមដងទន្លេទាំង៤ រួមមាន (ទន្លេមេគង្គ ទន្លេកុង ទន្លេសាន និង​ស្រែពក)

-រមណីយដ្ឋានអន្លង់ផ្សោតត្បូងខ្លា
-រមណីយដ្ឋានអន្លង់ផ្សោតឈើទាល
-រមណីយដ្ឋានតំបន់រ៉ាមសារ

៤/ តំបន់សក្ដានុពលទេសចរណ៍តាមបណ្ដោយក្រវាត់ព្រំដែនកម្ពុជា-ឡាវ និង​តំបន់​ឧទ្យាន​ជាតិ​វិរៈជ័យនិង​វប្បធម៌-ទំនៀម​ទម្លាប់ប្រពៃណីវប្បធម៌ជនជាតិដើមភាគតិច

-តំបន់សត្វស្លាបសៀមប៉ាង (អាហារដ្ឋានត្មាត)
-រមណីយដ្ឋានឧទ្យានជាតិវីរៈជ័យ និងតំបន់ជុំវិញជនជាតិភាគតិចអូរចាយ