ព័ត៌មានជាតិ

រដ្ឋមន្ត្រីអប់រំ លើកទឹកចិត្តលោកគ្រូអ្នកគ្រូ បន្តយកចិត្តទុកដាក់ដល់ការរៀន និងបង្រៀន នៅសាលារៀនបណ្ដោះអាសន្នជំរំសុវត្ថិភាព

បានផុស

៥ ខែ មុន

នៅ

ថ្ងៃអាទិត្យ ៨ កុម្ភៈ ២០២៦

ដោយ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកទឹកចិត្តដល់លោកគ្រូអ្នកគ្រូ បន្តយកចិត្តទុកដាក់ និងគាំទ្រដល់ការរៀន និងបង្រៀន នៅសាលារៀនបណ្តោះអាសន្នជំរំសុវត្ថិភាពឱ្យបានល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាសពិធីសំណេះសំណាលជាមួយលោកគ្រូ អ្នកគ្រូ និងចែកអំណោយដល់សិស្សានុសិស្ស នៅសាលារៀនបណ្តោះអាសន្នជំរំសុវត្ថិភាពចុងកាល់ ក្នុងខេត្តឧត្តរមានជ័យ កាលពីថ្ងៃទី ៧ កុម្ភៈ លោកឧបនាយករដ្ឋមន្ត្រី បានមានប្រសាសន៍ថា ការប្រគល់ថវិកាឧបត្ថម្ភមួយចំនួនជូនដល់លោកគ្រូអ្នកគ្រូ និងប្រធានជំរំ ចែកជូនដល់សិស្សានុសិស្សដែលកំពុងរៀននៅសាលារៀនបណ្តោះអាសន្នជំរំសុវត្ថិភាពចុងកាល់ក្នុងបរិវេណបឋមសិក្សាគោកមន ខេត្តឧត្តរមានជ័យ ជាការថ្លែងអំណរគុណ និងលើកទឹកចិត្តឱ្យបន្តយកចិត្តទុកដាក់គាំទ្រដល់ការរៀន និងបង្រៀនឱ្យបានល្អប្រសើរ ដោយគូសបញ្ជាក់ថា “ការអប់រំត្រូវតែមានភាពធន់ ការអប់រំត្រូវតែបន្តតាមរយៈនវានុវត្តន៍ស្របតាមបរិបទជាក់ស្តែង”។

ទន្ទឹមនឹងនេះ លោកបណ្ឌិតសភាចារ្យ បានបញ្ជាក់ជាថ្មីនូវការបន្តគាំទ្រឱ្យអស់ពីលទ្ធភាពដល់បុគ្គលិកអប់រំ លោកគ្រូអ្នកគ្រូ និងសិស្សានុសិស្សទាំងអស់ដែលរងផលប៉ះពាល់ជាមួយការចូលរួមចំណែកពីសប្បុរសជន និងភាគីពាក់ព័ន្ធទាំងអស់ ដោយបានរំលេចជាថ្មីនូវការថ្លែងអំណរគុណយ៉ាងជ្រាលជ្រៅដល់សប្បុរសជន និងដៃគូអភិវឌ្ឍន៍នានា ចំពោះការបន្តចូលរួមគាំទ្រដល់វិស័យអប់រំនៅកម្ពុជា នាពេលកន្លងមក ពិសេសក្នុងអំឡុងជម្លោះព្រំដែនជាច្រើនខែមកនេះ៕

អត្ថបទ ៖ សំអឿន