និស្សិតវិទ្យាស្ថានតេជោសែន ចុះកម្មសិក្សាអំឡុងវិស្សមកាល ដើម្បីពង្រឹងជំនាញ និងបទពិសោធការងារជាក់ស្តែង

វិទ្យាស្ថានតេជោសែនសាធារណការ និងដឹកជញ្ជូន នៅរសៀលថ្ងៃទី២០ ខែកក្កដា ឆ្នាំ២០២៦ បានបង្ហាញសកម្មភាពចុះកម្មសិក្សារបស់និស្សិតសម្រាប់ឆ្នាំសិក្សា ២០២៥-២០២៦ ដែលរៀបចំឡើងក្នុងអំឡុងពេលសម្រាកឆមាស ដើម្បីតម្រង់ទិស បណ្ដុះបណ្ដាល និងពង្រឹងសមត្ថភាពឱ្យនិស្សិតទទួលបានបទពិសោធការងារជាក់ស្តែង មុនឈានចូលឱកាសការងារពិតប្រាកដ។

កម្មសិក្សានេះ មាននិស្សិតសរុបចំនួន ៩៥នាក់ ត្រូវបានបែងចែកទៅកាន់ទីតាំងផ្សេងៗ រួមមាន អគ្គនាយកដ្ឋាន មន្ទីរសាធារណការ និងដឹកជញ្ជូនរាជធានី-ខេត្ត កំពង់ផែស្វយ័ត នាយកដ្ឋាននានាចំណុះក្រសួងសាធារណការ និងដឹកជញ្ជូន ព្រមទាំងក្រុមហ៊ុនឯកជនជាច្រើន។

វិទ្យាស្ថានបានបញ្ជាក់ថា កម្មវិធីកម្មសិក្សានេះ ត្រូវបានរៀបចំឡើងក្រោមការយកចិត្តទុកដាក់ និងការគាំទ្រពីថ្នាក់ដឹកនាំក្រសួង និងថ្នាក់ដឹកនាំវិទ្យាស្ថាន ក្នុងគោលបំណង ដើម្បីតម្រង់ទិស និងបណ្ដុះបណ្ដាល ឱ្យនិស្សិតមានទំនុកចិត្ត ទទួលបានបទពិសោធការងារ និងបានអនុវត្ដជំនាញរបស់ខ្លួន នៅទីតាំងការងារជាក់ស្ដែង។

ជាមួយគ្នានេះ ការសហការយ៉ាងជិតស្និទ្ធរវាងមន្ត្រី បុគ្គលិក និងស្ថាប័ននានាចំណុះក្រសួងសាធារណការ និងដឹកជញ្ជូន បានធ្វើឱ្យការរៀបចំកម្មសិក្សាឆ្នាំនេះប្រព្រឹត្តទៅដោយរលូន និងមានប្រសិទ្ធភាព។

ជាពិសេស ផ្អែកទស្សនវិស័យវែងឆ្ងាយរបស់ថ្នាក់ដឹកនាំក្រសួង និងវិទ្យាស្ថាន និស្សិតចាប់ផ្តើមចុះកម្មសិក្សាតាំងពីឆ្នាំទី២ ក្នុងអំឡុងវិស្សមកាល ដើម្បីពង្រឹងសមត្ថភាពវិជ្ជាជីវៈ និងជួយឱ្យនិស្សិតអាចសម្របខ្លួនទៅនឹងការងារជាក់ស្តែងបានកាន់តែងាយស្រួល ក្រោយបញ្ចប់ការសិក្សា។

សកម្មភាពនេះ ត្រូវបានចាត់ទុកថា ជាផ្នែកសំខាន់មួយក្នុងការអភិវឌ្ឍធនធានមនុស្សប្រកបដោយគុណភាព សម្រាប់វិស័យសាធារណការ និងដឹកជញ្ជូន ក៏ដូចជាការចូលរួមលើកកម្ពស់ការអភិវឌ្ឍសង្គម និងសេដ្ឋកិច្ចជាតិប្រកបដោយចីរភាព៕