អភិបាលខេត្តកែប លើកទឹកចិត្តឲ្យប្រជាកសិករចិញ្ចឹមសត្វដើម្បីផ្គត់ផ្គង់ជីវភាពគ្រួសារ និងកាត់បន្ថយការនាំចូល

នៅថ្ងៃទី២២ ខែកក្កដា ឆ្នាំ២០២៦ លោក សោម ពិសិដ្ឋ អភិបាលខេត្តកែប បានដឹកនាំប្រតិភូ និងអាជ្ញាធរពាក់ព័ន្ធអញ្ជើញចុះពិនិត្យសកម្មភាព និងស្ថានភាពទូទៅនៃកសិដ្ឋានចិញ្ចឹមជ្រូករបស់ប្រជាកសិករគំរូមួយកន្លែង ដែលមានទីតាំងស្ថិតនៅក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប។

​ក្នុងឱកាសនោះលោក សោម ពិសិដ្ឋ បានសម្តែងការកោតសរសើរ និងវាយតម្លៃខ្ពស់ចំពោះខិតខំប្រឹងប្រែងរបស់ប្រជាកសិករជាម្ចាស់កសិដ្ឋាន ដែលបានចាប់យកមុខរបរចិញ្ចឹមសត្វតាមបច្ចេកទេសទំនើប ធានាបាននូវអនាម័យ សុវត្ថិភាពចំណីអាហារ និងមានការគ្រប់គ្រងបរិស្ថានបានយ៉ាងល្អប្រសើរ។

លោកអភិបាលខេត្តបានគូសបញ្ជាក់ថា ការពង្រីកវារីវប្បកម្ម និងការចិញ្ចឹមសត្វនៅក្នុងមូលដ្ឋាន គឺជានយោបាយអាទិភាពដ៏សំខាន់មួយក្នុងការ​បង្កើនប្រាក់ចំណូលលើកកម្ពស់ជីវភាពរបស់គ្រួសារកសិករឱ្យកាន់តែល្អប្រសើរឡើងបានមួយកម្រិតបន្ថែមទៀតផង។ ធានាការផ្គត់ផ្គង់សាច់ជ្រូកស្រស់ សុវត្ថិភាព ដល់ទីផ្សារក្នុងខេត្ត និងតំបន់ជុំវិញ និងកាត់បន្ថយការនាំចូលសាច់ពីខាងក្រៅ និងបង្កើតការងារជូនប្រជាពលរដ្ឋក្នុងមូលដ្ឋាន។

​ទន្ទឹមនឹងនេះ លោកអភិបាលខេត្ត ក៏បានណែនាំដល់មន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងអាជ្ញាធរមូលដ្ឋាន ឱ្យបន្តចុះជួយគាំទ្រផ្នែកបច្ចេកទេស ថែទាំសុខភាពសត្វ (ការចាក់វ៉ាក់សាំងការពារជំងឺ) និងសម្រួលដល់ការចម្លងបច្ចេកទេសល្អៗទាំងនេះទៅកាន់ប្រជាកសិករផ្សេងទៀតនៅក្នុងសហគមន៍ ដើម្បីរួមគ្នារក្សាសន្តិសុខស្បៀង និងអភិវឌ្ឍន៍សេដ្ឋកិច្ចគ្រួសារឱ្យកាន់តែរឹងមាំ៕

អត្ថបទ៖ សឹង រ៉ាត់